Rusiya-Azərbaycan münasibətlərinin tarixi aspektini düzgün qiymətləndirmək vacibdir. “Trend”in məlumatına görə, bunu Moskvada “Moskva-Bakı xətti: Qafqazın yeni geosiyasətinə doğru” konfransında Ümumrusiya Azərbaycanlıları Konqresinin (ÜAK) prezidenti Fazil Qurbanov deyib.
O qeyd edib ki, Azərbaycan və Rusiya liderləri İlham Əliyev və Vladimir Putinin dostluğu münasibətlərimizin inkişafı üçün möhkəm əsas yaradır. Onun sözlərinə görə, daha bir vacib fakt Rusiyaya terrorçu qüvvələrin daxil olmasının qarşısında Azərbaycanın güclü sədd olmasıdır.
Savelyev: “Azərbaycan regionda liderlik mövqeyinə yüksəlib”
Bu gün Rusiyanın bir sıra ölkələrlə münasibətlərinin sınaqdan keçdiyi bir vaxtda Azərbaycanla münasibətlər müxtəlif sahələrdə inkişaf edir. Bunu Rusiya-Azərbaycan parlamentlərarası dostluq qrupunun sədri, Rusiya Dövlət Dumasının deputatı Dmitri Savelyev deyib.
Onun sözlərinə görə, Rusiya ilə Azərbaycan arasında azad ticarət rejimi mövcuddur.
D.Savelyev qeyd edib ki, 25 il ərzində Azərbaycan regionda liderlik mövqeyinə yüksəlib, eləcə də əlverişli coğrafi vəziyyətini fəal şəkildə istifadə edir.
Deputat qeyd edib ki, çoxtərəfli Rusiya-Azərbaycan əməkdaşlığı yüksəliş dövrünü yaşayır.
Züqanov: “Rusiyanın Azərbaycanla strateji tərəfdaşlığının möhkəmləndirilməsi mühüm rol oynayır”
Beynəlxalq münasibətlərdə yaranan hazırkı mürəkkəb vəziyyətdə Rusiyanın Azərbaycanla strateji tərəfdaşlığının möhkəmləndirilməsi istisnasız mühüm rol oynayır. Bu sözlər RF Kommunist Partiyasının sədri Gennadi Züqanova aiddir. Sözügedən konfransda iştirak edən Züqanov qeyd edib ki, Azərbaycan məktəblərində rus dilinin öyrənilməsi iki ölkə arasında münasibətlərin möhkəmləndirilməsi baxımından böyük rol oynayır.
G.Züqanov bildirib ki, Azərbaycan-Rusiya münasibətləri həmişə prioritet olub, bu münasibətlər strateji tərəfdaşlıq və dostluğa söykənir.
Rusiyalı politoloq: “Yeni Bakının obrazı gələcəyin obrazıdır”
Yeni Azərbaycanın, yeni Bakının obrazı gələcəyin obrazlarıdır. Bu sözləri isə rusiyalı jurnalist, politoloq Aleksandr Proxanov deyib.
Ekspertin fikrincə, Azərbaycan Cənubi Qafqaz haqqında yeni təsəvvür formalaşdırır: “Mən Azərbaycanın daxili problemlərini bu gün necə həll etdiyini görmüşəm. Hazırda yeni Azərbaycan cəmiyyətinin formalaşması gedir”.
O vurğulayıb ki, Azərbaycan bir çox ölkələrlə münasibətlərini balanslaşdırır.
Fərhad Bədəlbəyli: "ATƏT-in Minsk Qrupunun yaradılması ən böyük səhvdir"
"ATƏT-in Minsk Qrupunun yaradılması ən böyük səhvdir". APA-nın Moskva müxbirinin verdiyi məlumata görə, bunu konfransda çıxış edən Dağlıq Qarabağ bölgəsinin Azərbaycanlı İcmasının üzvü, Bakı Musiqi Akademiyasının rektoru, bəstəkar Fərhad Bədəlbəyli bildirib.
ATƏT-in Minsk Qrupunun fəaliyyətini tənqid edən F. Bədəlbəyli bu qrupun 25 ildə Dağlıq Qarabağ münaqişənin həlli istiqamətində heç bir iş görmədiyini vurğulayıb: "Mən Dağlıq Qarabağın Azərbaycanlı İcmasının üzvüyəm. 25 ildir ki, həmsədrlərlə görüşürük. Onlar bu müddət ərzində heç bir iş görməyiblər. Ancaq biznes klassda gəlib, beş ulduzlu hotellerdə qalıblar. Yüksək maaş alıblar. Lakin bütün bunların qarşılığında bir addım belə qabağa atılmayıb. Minsk qrupunun yaradılması çox böyük və dəhşətli səhvdir. Çünki ABŞ və Fransanın münaqişənin həllində öz maraqları var. Onlar bu ölkələrdəki erməni diasporunun maraqlarını təmin edirlər. Əminəm ki, Rusiya, Azərbaycan və Ermənistan birlikdə bu münaqişəni həll edə bilərdilər".
Rusiyalı senator: "Moskva Qarabağ münaqişəsində nə vəkildir, nə də prokuror"
"Rusiya üçün əsas məsələ tərəfdaş olduğu ölkələrin xarici və daxili siyasətlərini özlərinin formalaşdırması, onların xarici dövlətlərin təsirindən kənar olmasıdır". Bunu isə Rusiya Federasiya Şurasının üzvü Andrey Klimov bildirib.
Ermənistan-Azərbaycan, Dağlıq Qarabağ münaqişəsinin nizamlanması məsələsinə toxunan rusiyalı senator münaqişə tərəflərinin özlərinin güzəştli həll yolunu tapmalı olduğunu söyləyib: "Rusiya nə vəkildir, nə də prokuror. Ümid edirik ki, tərəflər özləri güzəştli həll yolu tapacaq".
Azərbaycanlı deputat: “Ümid edirik ki, Putin nəhayət öz sözünü deyəcək və ədalət bərpa olunacaq”
“Təəssüflər olsun ki, biz 25 ildir doğulduğumuz torpaqlarda yaşaya bilmirik. Təəssüf ki, Azərbaycan torpaqları 25 ildir Ermənistanın işğalı altındadır". Bunu Milli Məclisin deputatı, Azərbaycanın Dağlıq Qarabağ İcmasının üzvü Rövşən Rzayev belə deyib.
O, Ermənistanın 25 ildir işğalçılıq siyasətini davam etdirdiyini söyləyib: "Mən Dövlət Dumasının MDB məsələləri üzrə iş komitəsinin keçmiş sədri Leonid Slutskinin sözlərini xatırlatmaq istəyirəm. O, görüşümüzdə bildirmişdi ki, Qarabağ münaqişəsini özümüz həll etməliyik, heç bir halda regiona dəxli olmayan ölkələr bu problemə müdaxilə etməməlidir. Rusiya, işğalçı Ermənistan və ərazisi işğal altında olan Azərbaycan var. Biz özümüz bu problemi həll etməyə borcluyuq. Konfransda təklif edərdim ki, Qarabağın azərbaycanlı və erməni icmaları arasında dialoq başlasın. Biz nə edə bilərik? Bu gün bu konfransda çox yüksək nüfuzlu siyasətçilər, ictimai-siyasi xadimlər iştirak edirlər. Onlar Qarabağın azərbaycanlı və erməni icmaları arasında dialoqun qurulmasına yardımçı ola bilərlər. MDB çərçivəsində Azərbaycan və Ermənistandan olan gənclər arasında dialoqun qurulması da vacibdir. Biz bütün bunları Rusiyadan, bu ölkənin ziyalılarından gözləyirik. Ümid edirəm ki, Rusiya prezidenti Vladimir Putin nəhayət öz sözünü deyəcək və ədalət bərpa olunacaq".
Qarabağ münaqişəsi ilə bağlı aparılan danışıqlar prosesindən danışan R. Rzayev bildirib ki, Azərbaycan münaqişənin nizamlanması prinsipləri ilə razıdır: "Güc və silah tətbiqinin yolverilməzliyi prinsipi ilə razıyıq, baxmayaraq ki, Qarabağda azərbaycanlılara qarşı silah tətbiq olunub, onlar güc yolu ilə yurdlarından qovulublar. Öz müqəddəratını təyin etmə prinsipi ilə də razıyıq. Ermənilər artıq müqəddəratlarını təyin ediblər. Onların Ermənistan adlı dövləti var. Üçüncü isə ərazi bütövlüyü prinsipidir. Bu ən əsas prinsipdir. Azərbaycanın ərazi bütövlüyü beynəlxalq ictimaiyyət tərəfindən tanınır. Onda Azərbaycanın ərazi bütövlüyü çərçivəsində referendum keçirilsin və bu referendumun nəticəsinə baxılsın”.
