Elman Nəsirov: "Ölkəmiz yalnız o ideyaları, təşəbbüsləri qəbul edir, dəstəkləyir ki, onlar Azərbaycanın milli mənafeyinə söykənir"
Azərbaycan Prezidenti İlham Əliyev Azərbaycanın milli bayramı - Respublika Günü münasibətilə keçirilən rəsmi qəbulda deyib ki, daxili siyasətdə Azərbaycanda bundan sonra da təhlükəsizlik təmin edilməlidir: "Deyə bilərəm ki, Azərbaycanda daxili risq mənbələri mövcud deyil".
Dövlət başçısı qeyd edib ki, mümkün olan risqlər xaricdə formalaşır: "Belə olan halda, biz ölkəmizi bundan sonra da xarici risqlərdən qorumalıyıq, həm fiziki nöqteyi-nəzərdən, eyni zamanda, düzgün siyasət aparmaqla. Biz sərhəd mühafizəsini kifayət qədər gücləndirmişik və bu istiqamətdə əlavə addımlar atılacaq. Eyni zamanda, Azərbaycan bizə sərf etməyən, şübhə doğuran heç bir beynəlxalq hərəkətlərə, avantüralara qoşulmur. Baxmayaraq ki, müxtəlif tərəflər bizi müntəzəm olaraq bu hərəkətlərə cəlb etməyə çalışırdılar. Bu gün də belə səylər var. Ancaq Azərbaycan bizə sərf etməyən heç bir hərəkətə, təşəbbüsə qoşulmur və qoşulmayacaq. Biz bu siyasəti uzun illərdir ki, aparırıq. Bəzən buna görə də müxtəlif yerlərdən Azərbaycana təzyiqlər göstərilir və bizə qarşı kampaniyalar aparılır. Ancaq indiki şərait, bugünkü beynəlxalq vəziyyət bir daha göstərir ki, bu, yeganə düzgün siyasətdir. Çünki bu gün bölgədə, dünyada risqlər, təhlükələr artır, təhlükə mənbələri genişlənir, əfsuslar olsun ki, bizim coğrafiyamızda sabitlik təmin edilmir, əksinə, ildən-ilə vəziyyət daha da gərginləşir. Ona görə təhlükəsizlik məsələləri ön planda olmalıdır".
Ölkə başçısı mümkün olan risqlərin xaricdə formalaşmasını vurğulamaqla nəyə işarə edib?
Millət vəkili, politoloq Elman Nəsirovun sözlərinə görə, dövlət başçısı öz çıxışında Azərbaycanın daxili və xarici siyasəti ilə bağlı çox mühüm tezisləri dilə gətirib: "Dünyada yeni-yeni çağırışlar, təhdidlər yaranmaqdadır. Ona görə də təhlükəsizlik məsələsi hər şeydən öndə dayanır. Sevindirici haldır ki, Azərbaycanın daxilində təhlükəsizliklə əlaqədar hər hansı təhdid, problem yoxdur. Təhlükəsizliklə bağlı risqlər yalnız xaricdən ola bilər. Prezident İlham Əliyev məhz bu amilləri nəzərə alaraq vurğuladı ki, müəyyən siyasi dairələr Azərbaycanı müxtəlif təxribatlara, oyunlara təhrik etmək, bir sıra təşəbbüslərə qoşmaq istəyir. Lakin Azərbaycan heç zaman belə planların tərkib hissəsi olmayıb və bundan sonra da olmayacaq. Ölkəmiz yalnız o ideyaları, təşəbbüsləri qəbul edir, dəstəkləyir ki, onlar Azərbaycanın milli mənafeyinə söykənir, dövlətçilik maraqlarına uyğundur. Bundan kənar heç bir təşəbbüsə Azərbaycan qoşulmayacaq. Azərbaycanın öz yolu var, işimiz haqq işidir, öz sözümüzün də sahibiyik. Azərbaycan öz hədəfləri olan dövlətdir. Bu hədəflərə çatmaq üçün konkret addımlar atılır. Dövlətimizlə yalnız bərabər hüquq və qarşılıqlı faydalı əməkdaşlıq çərçivəsində danışmaq, yalnız bu kontekstdə münasibətlər qurmaq olar. Azərbaycan məhz bu prinsiplərdən çıxış edərək, xarici ölkələrlə münasibətlərini tənzimləyir. Burada ən mühüm məqam budur ki, heç bir halda ölkəmizin daxili işinə qarışmaq olmaz. Necə ki, Azərbaycan da başqa dövlətlərin daxili işlərinə qarışmır. Ölkəmiz tam müstəqil xarici siyasət kursu həyata keçirir. Bu zaman digər xarici ölkələrin maraqlarına da hörmətlə yanaşır. Prezident İlham Əliyev bu kimi fikirlərlə bir daha bəyan edib ki, Azərbaycanla yalnız xoşməramlı münasibətlər qurmaq olar. Bu münasibətlərdən hər iki tərəf qazanacaq".
Məhəmmədəli QƏRİBLİ