Məhəmməd Əsədullazadə: "Ermənistanın bu mövqeyi bir daha danışıqları sabotaj etməyə hesablanıb"
Dağlıq Qarabağ məsələsinin həllində hər hansı irəliləyişə nail ola bilməyən ATƏT yenidən bölgədə fəallıq nümayiş etdirməyə cəhd göstərir. Qurumun baş katibi Lamberto Zanyerin regiona səfərinə də bu prizmadan yanaşmaq mümkündür.
Mayın 30-da Ermənistana səfər edən Zanyer xarici işlər naziri Edvard Nalbandyanla görüşüb. Bildirilib ki, Minsk Qrupunun həmsədrləri Ermənistan, Azərbaycan və işğal altında olan Dağlıq Qarabağa səfər edəcək və bu istiqamətdə müvafiq danışıqlar aparacaq. Azərbaycan və Ermənistan prezidentlərinin görüşü barədə müəyyən təkliflərin irəli sürüləcəyi də müzakirə olunub. Həmsədrlərin səfəri ərəfəsində Nalbandyan, həmişə olduğu kimi, prosesləri qabaqlamağa çalışıb. O, ATƏT-in baş katibinə bildirib ki, Azərbaycan cəbhədə atəşkəsin pozulması ilə əlaqədar insidentlərin araşdırılması mexanizminin tətbiqinə qarşı çıxıb. Halbuki, Azərbaycan dəfələrlə bəyan edib ki, sözügedən mexanizmin tətbiqi işğal olunmuş ərazilərin boşaldılmasından sonra mümkündür. Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, ATƏT sədri Lamberto Zaynerin Ermənistana səfəri çərçivəsində bu ölkənin xarici işlər naziri E.Nalbandyanla görüşündə Qarabağ münaqişəsi müzakirə edilsə də, əsasən tam erməni yalanları üzərində informasiya ilə məlumatlandırılıb: "Nalbandyan münaqişənin həllindən yayınaraq, status-kvonun qorunmasına xidmət edən atəşkəsə nəzarət mexanizminin qurulmamasını qabardıb. Qeyd edim ki, ötən il Azərbaycan, Rusiya və Ermənistan prezidentlərinin görüşündə monitorinq qrupunun genişlənməsi və atəşkəsi müəyyən edən mexanizmin qurulması müzakirə edilsə də, razılıq əldə olunmayıb. Qeyd edim ki, Ermənistan cəbhə xəttində monitorinq qrupunun genişləndirilməsi üçün çalışmaqla danışıqlarda əsas olan ərazilərin boşaldılmasından yayınır. Ermənistanın bu mövqeyi bir daha danışıqları sabotaj etməyə hesablanıb. Azərbaycan insidentlərin araşdırılması mexanizminə qarşı çıxmaqda haqlıdır. Çünki bu, davamlı olaraq, status-kvonu qoruyacaq. Ermənistan da danışıqlarda manipulyasiya edəcək. Ermənistana mütləq təzyiq edilməlidir ki, kompromis danışıqlara başlasın. ATƏT-in Minsk Qrupu həmsədrlərinin səfəri öncəsi Nalbandyanın bu qeydləri danışıqların əsas məğzindən yayınmaqdır. Ermənistanın bu avantürası cəbhədə lokal əməliyyatları yaxınlaşdırır. Minsk Qrupunun həmsədrləri gəlsə də, ortada ciddi təkliflər yoxdur. Sadəcə, atəşkəsi qorumaq üçün regiona təşrif buyururlar".
Vidadi ORDAHALLI