Məhərrəm Zülfüqarlı: "Sarkisyan yenə tarixi təhrif etməklə özündən saxta bir tarixçə düzəltməyə can atıb"
Şəlalə Cəsur: "Bunu da Sarkisyanın növbəti yalanı kimi qəbul etməliyik"
Məlum olduğu kimi, Ermənistan da öz müstəqillik gününü 28 may tarixində qeyd edir. Bu münasibətlə keçirilən təntənəli dövlət tədbirindəki çıxışında Ermənistan prezidenti Serj Sarkisyan yenə tarixi təhrif edib. O bildirib ki, Ermənistan 1918-ci ilin 28 mayında 543 illik fasilədən sonra yenidən öz müstəqilliyinə qovuşa bildi.
Çox maraqlıdır ki, Ermənistan prezidenti etdiyi çıxışında öz ölkəsini klassik dövlətlər sırasına aid etmək istəyir, hətta bir az da irəli gedərək onlardan önə keçməyə can atır. Sarkisyanın məntiqilə yanaşdıqda belə çıxır ki, Ermənistan dövlətçiliyinin 7 əsrə yaxın tarixi var. Çünki 1918-ci ilin üstündən bir əsrlik müddət keçib. Bunun da üzərinə Sarkisyanın dediyi 543-ü gələndə həmin rəqəm alınır.
Ermənistanın belə bir dövrü əhatə edən dövlətçilik tarixi olubmu?
Tarix üzrə fəlsəfə doktoru Məhərrəm Zülfüqarlı qəzetimizə açıqlamasında bildirdi ki, Sarkisyan yenə tarixi təhrif etməklə özündən saxta bir tarixçə düzəltməyə can atıb: "Ermənilər bütün dünyaya Balkanlardan yayılıb. Onların ilk yaşayış yeri məhz həmin ərazilər olub. Müxtəlif vaxtlarda dövlət adında nəsə yaratmağa cəhd ediblər, ancaq hər dəfə də etdikləri xəyanətlər səbəbindən buna nail ola bilməyiblər. Sonra onların kompakt yaşadığı yer Türkiyə ərazisi olub. Orada da etdikləri xəyanət hamıya bəllidir. Ən son mərhələdə isə ərazilərimizə köçürülüblər. 1918-ci ildə bizim Milli Şuranın onlara etdiyi güzəşt səbəbindən özlərinin müstəqil dövlətini elan edə bildilər. Bunun üçün də bizə minnətdar olmalıdırlar. Ancaq bunun əvəzində biz, əksinə, nankorluq görürük".
Digər tarixçi Şəlalə Cəsur da hesab edir ki, ermənilərin tarixdə iddiaları çox olub, amma onları sübuta yetirə bilməyiblər: "Hətta indiki İrəvanın, ermənilərin iddia etdiyi kimi, Erebuniyə aidliyinin heç bir tarixi və faktiki əsası yoxdur. Digər tərəfdən, Erebuni bir tarixi abidə kimi yenə ermənilərə deyil, urartululara məxsusdur. Çünki e.ə II minilliyin II yarısı - I minilliyin I yarısına aid qədim mixi yazılar da bunu təsdiq edir.
Ümumən ermənilərin toplum olaraq Cənubi Qafqaza heç bir aidiyyəti yoxdur. Bundan başqa, Azərbaycan alimləri yüksək peşəkarlıq göstərərək, XX əsrin 70-ci illərində yapon alimlərinin tədqiqatlarından bəhrələndilər, odontoloji tədqiqat üsulundan istifadə edərək, bölgədəki xalqların hansının yerli, hansının gəlmə olduğunu araşdırarkən, ermənilər gəlmə xalqlar arasında öz yerini tutub. Ona görə də konkret olaraq istər indiki Ermənistan ərazisinin, istərsə də Cənubi Qafqazın yerli xalqı olmaları ilə bağlı bütün iddialarının heç bir elmi və tarixi əsası yoxdur.
Ermənilərin bu regiona kütləvi köçürülməsi Çar Rusiyasının Şimali Azərbaycanı işğal etməsi ilə bağlıdır. Ancaq onların orta əsrlər və ya daha əvvəlki dövrdə köçməsi kimi faktlara çox az şəkildə rast gəlinir. Söhbət Azərbaycan Qaraqoyunlu dövlətinin hökmdarı Cahan şahın icazəsi ilə indiki Türkiyənin Sivas şəhərindəki erməni kilsəsinin katalikosluğunun 1441-ci ildə Eçmüədzin kilsəsinə köçürülməsi qərarından gedir. Təxminən 300-ə qədər din xadimi Eçmüədzin adlanan əraziyə köçürülüb. Amma, bütövlükdə, ermənilərin Cənubi Qafqazda kompakt şəkildə yaşaması faktı olmayıb. Azərbaycan Səfəvilər dövlətinin hökmdarı I Şah Abbas (1587-1629) XVII əsrin əvvəlində qərar qəbul etmişdi ki, Eçmüədzini indiki İsfahan şəhərinin yaxınlığında yerləşən Culfa şəhərinə köçürsün. Söhbət İran Culfasından gedir.
İndi Ermənistan adlanan ərazi 1918-ci ildə 9 min kvadratkilometr həcmdə Azərbaycan Milli Şurası tərəfindən güzəştə gedilib. Güzəştə getmənin hansı şərtlər daxilində baş verməsi tədqiqatlar nəticəsində bizə məlumdur. Ermənilər qaraçılara bənzər köçəri bir xalq olub, onların elə bir zəngin dövlətçilik tarixi ola bilməz. Bunu da Sarkisyanın növbəti yalanı kimi qəbul etməliyik".
Məhəmmədəli QƏRİBLİ