Qabil Hüseynli: "Hadisələrin bu cür inkişafı Dağlıq Qarabağ münaqişəsinin həllinə yeni impulslar verə bilər"
G7-nin sammitinin yekunları üzrə qəbul olunmuş kommünikedə deyilir ki, böyük 7-lik beynəlxalq hüquqa əsaslanan, bütün dövlətlərin ərazi bütövlüyünü, suverenliyini və siyasi müstəqilliyini təmin edən və insan hüquqlarının müdafiəsinə zəmanət verən beynəlxalq intizamın möhkəmlənməsində maraqlıdır: "Dünyanın milyonlarla günahsız insanlara toxunan, gələcək nəsillərin sağlam inkişafına mane olan münaqişələrin həllinə tam sadiqliyimizə ehtiyacı var".
Qeyd edək ki, G7-nin 43-cü sammiti 26-27 may tarixlərində İtaliyanın Taormine şəhərində keçirilib. Sammit Almaniyada və Fransada keçirilən prezident seçkilərindən sonra keçməsi və ABŞ prezidenti Donald Trampın və Fransa prezidenti Emmanuel Makronun G7 liderləri ilə ilk görüşü olması səbəbindən böyük siyasi əhəmiyyət daşıyırdı.
Göründüyü kimi, böyük 7-lik beynəlxalq hüquqa əsaslanan, bütün dövlətlərin ərazi bütövlüyünü, suverenliyini və siyasi müstəqilliyini təmin edən bir mövqe ortaya qoyub. Bunun Dağlıq Qarabağ probleminin həllinə nə kimi təsiri ola bilər?
Politoloq Qabil Hüseynlinin sözlərinə görə, G7 formatında qəbul edilən qərarlara olduqca ciddi yanaşmaq lazımdır: "Çünki həmin formatda təmsil olunan ölkələr, demək olar ki, dünyanın idarə edilməsinə başlıca yön verənlərdir. Belə bir yekun qərarın qəbul edilməsi bizim üçün vacibdir. Düzdür, ayrı-ayrılıqda bütün ölkələr ərazi bütövlüyü məsələsini qabardır. Ancaq dünyanın böyük ölkələrini hazırda məhz bu məqam maraqlandırırsa, deməli, dünyadakı qaynar nöqtələrlə bağlı yeni yanaşmalar ortaya qoyulacaq. Biz Dağlıq Qarabağ münaqişəsi çərçivəsində ərazi bütövlüyümüzün pozulmasından ciddi əziyyət çəkirik. Həmin sammitin sonunda intizamın yaradılması kimi fikir də yekun qətnamədə öz əksini tapıb. Belə bir detala fikir verək: "Dünyanın milyonlarla günahsız insanlara toxunan, gələcək nəsillərin sağlam inkişafına mane olan münaqişələrin həllinə tam sadiqliyimizə ehtiyacı var". Bu da həmin yekun qətnamədən bir sitatdır. Yəni mövcud münaqişələrin həllini prioritet kimi ortaya qoyur. Bizə məsələyə ədalətli və prinsipial yanaşma vacibdir. Görünür, anti-Rusiya mövqeyində dayanan ölkələr münaqişələrin həlli ilə bağlı konkret və prinsipial yanaşma ortaya qoymaqda maraqlıdır. Hadisələrin bu cür inkişafı Dağlıq Qarabağ münaqişəsinin həllinə yeni impulslar verə bilər. Təbiidir ki, G7 üçün yalnız Dağlıq Qarabağ münaqişəsi prioritet təşkil etmir. Krım, Dnestryanı, Siriya və s. problemlər də nəzərdə tutulur. İstənilən halda, bizim üçün bu yanaşma məqbuldur və Dağlıq Qarabağ probleminin həllində yeni bir səhifə açacağına ümidlər yaradır".
Məhəmmədəli QƏRİBLİ