ABŞ rəsmilərinin son açıqlamaları bu ölkənin Rusiya ilə münasibətlərinin yaxşılaşmaq əvəzinə daha da pisləşəcəyini göstərir. Yaranmış vəziyyətdə digər Qərb ölkələrinin, o cümlədən NATO-nun ABŞ-ın yanında yer alacağına dair isə indidən Rusiya mediasında böyük hay-küy qaldırılıb.
Bildirilir ki, Brüsseldəki NATO sammitində iştirak edən ABŞ prezidenti Donald Trampın Rusiyanı təşkilat üçün ən böyük təhlükə adlandırması vəziyyəti yenidən gərginləşdirib. Bu fonda diqqət həm də ona yönəldilir ki, Rusiya-NATO qarşıdurması kifayət qədər geniş coğrafiyanı əhatə edəcək. İlk növbədə Yaxın Şərqdə tərəflərin qarşıdurmasının daha da dərinləşməsi gözlənir. Amma Qafqaz, Şərqi Avropa, Orta Asiya da qarşıdurma məkanına daxil edilir.
Hazırda həm Rusiya, həm də NATO Qafqaza gedərək daha çox diqqət ayırmağa başlayıb. NATO Parlament Assambleyasının sədri Paolo Allinin Tiflisdə verdiyi açıqlamalar təşkilatın regiona marağının daha da artdığını göstərir. Alli Gürcüstanın Avropa və Avroatlantik məkana tam inteqrasiyasını dəstəklədiyini bildirib. O qeyd edib ki, regionda sabitliyin bərqərar olması NATO-nun əsas məqsədlərindən biridir. İndi əsas məsələlərdən biri də NATO-nun Gürcüstanda hərbi infrastrukturunun qurulmasıdır. Artıq Kreml NATO-nun hərbi infrastrukturunun Gürcüstanda yerləşdirilməsinin Cənubi Qafqazda sabitlik üçün təhlükə yaradacağını bildirib.
NATO-nun Gürcüstanda təlim bazası, hərbi məktəb və logistika mərkəzinin yaradılması isə, Moskvaya görə, Rusiya üçün ciddi təhdiddir. Rusiyalı hərbi ekspert, istefada olan polkovnik Viktor Baranes qeyd edir ki, Rusiyanın cavab reaksiyası gedərək sərtləşəcək: "Mən Qafqazda yeni zenit-raket komplekslərin, tank əleyhinə silahların, artilleriya sistemlərinin peyda olacağını istisna etmirəm. Düşünürəm ki, Abxaziyada və Cənubi Osetiyada, Ermənistanda olan olan hərbi bazalarımız daha da gücləndiriləcək".
Eyni hal Orta Asiyada da müşahidə olunur. Artıq məlumat verildiyi kimi, Rusiya ilk dəfə olaraq "İsgəndər-M" raket kompleksini MDB-də terrorizmlə mübarizə üzrə keçirilən təlimdə iştirak üçün Tacikistana göndərib. Bəllidir ki, Rusiya Tacikistandakı 201-ci hərbi bazasına əlavə hərbi qüvvələr yerləşdirib. Rusiyanın Mərkəz Hərbi Dairəsinin komandanı, general-polkovnik Vladimir Zarudnitskinin sözlərinə görə, hərbi bazaya "Uraqan" reaktiv yaylım atəşi sistemləri ilə təchiz edilmiş divizion yerləşdirilib. Eyni zamanda bu postsovet respublikasına ilk dəfə "İsgəndər-M" operativ-taktiki raketləri çatdırılıb. Bu raket sistemləri "Düşənbə-Antiterror-2017" hərbi təlimlərində iştirak edir. Manevrlər mayın 30-da başlayıb. Generalın bildirdiyinə görə, habelə Düşənbə ətrafındakı "Ayni" aerodromuna Su-24M bombardmançıları yerləşdirilib. Bu aviaqruplaşma da birgə təlimlərə qatılacaq. 220 millimetrlik "Uraqan" raket sistemləri canlı qüvvəni və zirehsiz texnikanı məhv etmək üçündür. "İsgəndər-M" isə 500 kilometr mənzilli taktiki raket kompleksidir. Nüvə başlığı daşıya bilir. İndi Rusiyanın "İsgəndər-M"ləri Tacikistana göndərməkdə bir sıra hədəfinin olduğu ehtimalı irəli sürülür. Belə ki, Tacikistan Əfqanıstanla həmsərhəddir. "İsgəndər-M"lərin Tacikistandakı rus bazasına yerləşdirilməsi terrorçuların Mərkəzi Asiyaya girişinin qarşısını kəsə bilər. Lakin əsas hədəfin Əfqanıstanda yerləşən NATO gücləri olduğu deyilir. Raketlərin yerləşdiyi ərazi də əfqan torpaqlarındakı NATO bazalarına yaxındır. Rusiyanın "layf.ru" portalı isə yazır ki, Moskva yaxın vaxtlarda digər cavab zərbəsi də vura bilər.
Söhbət bilavasitə ABŞ sərhədlərinin yaxınlığında hərbi zavodların tikintisindən gedə bilər. Bildirilir ki, Rusiya ABŞ-ın "arxa bağçası" hesab edilən Latın Amerikasında böyük çəkiyə malikdir. Hətta bunun "soyuq müharibə" dövründə SSRİ-nin regionda malik olduğu çəkidən də çox olduğu bildirilir. Moskva hazırda Latın Amerikası ölkələri olan Kuba, Nikaraqua və Venesuelada böyük təsirə malikdir. "Layf.ru"ya məlum olub ki, Rusiyanın Xarici İşlər Nazirliyi region dövlətləri ilə əməkdaşlığın sonrakı inkişafı üzrə təkliflərini prezident Vladimir Putinə təqdim edib. Müvafiq idarələr artıq öz təkliflər üzərində işləməyə başlayıb. Xüsusi olaraq, Hərbi-texniki əməkdaşlıq üzrə Federal Xidmətinə Latın Amerikasının bir sıra dövlətləri ilə əlaqələrin inkişaf etdirilməsi tapşırılıb. İlk növbədə Venesuela, Braziliya və Perudan söhbət gedir. Saytın mənbələri bildirir ki, Federal Xidmətə hərbi texnika, onların hissələri və silahların çatdırılması üzrə komplekt tədbirlərin hazırlanması tapşırılıb. Hər şeydən əvvəl Braziliya, Peru və Venesuela nəzərdə tutulur. Latın Amerikasının silah bazarı uğrunda mübarizə aparmaq üçün sifarişçilərin ərazisində hərbi zavodların tikintisi də istisna edilmir. "Layf.ru" yazır ki, bu məsələ üzərində Hərbi-texniki əməkdaşlıq üzrə Federal Xidmət işləyir. Rusiyanın artıq ABŞ sərhədlərinə qədər gedərək burada hərbi mövqelərini gücləndirməsi isə onun ABŞ-la qarşıdurmasının daha da dərinləşməsini istisna etmir. Çünki ABŞ Rusiyanın onun sərhədlərinə qədər gəlməsini özü üçün çox böyük təhdid sayır.
Tahir TAĞIYEV
:none'>Tahir TAĞIYEV