Əli Orucov: "İstənilən halda, Azərbaycan məsələni diqqətdə saxlamalı, bu yöndə diplomatik fəaliyyətini artırmalıdır"
NATO Ermənistana məxsus 130 ədəd köhnə texnikanın utilizasiyası üçün 1,3 milyon avro yardım edəcək. Yayılan məlumata görə, bunu erməni mətbuatına açıqlamasında Ermənistan Müdafiə Nazirliyinin rəsmi nümayəndəsi, təhlükəsizlik siyasəti idarəsi rəhbərinin müavini Mqer İsraelyan deyib.
O bununla bağlı açıqlamasında onu da bildirib ki, Ermənistanla NATO arasında Etimad Fondu yaradılacaq: "Yaxın iki ayda Ermənistan və NATO hərbi texnikanın utilizasiyası və Azərbaycanla sərhəd zonasının minalardan təmizlənməsi üçün birgə Etimad Fondu yaradacaq. Eyni zamanda, sərhədyanı əhalinin mina təhlükəsindən xəbərdar edilməsi ilə bağlı onlara vaxtında informasiya çatdırılması metodları da təkmilləşdiriləcək".
Məlumat üçün qeyd edək ki, Ermənistan və NATO arasında əməkdaşlıq 2005-ci ilin dekabr ayında imzalanan Fərdi tərəfdaşlıq planına uyğun olaraq aparılır.
Burada diqqətçəkən məqam ondan ibarətdir ki, minaların təmizlənməsi işinin Azərbaycan-Ermənistan sərhəddində, yoxsa işğal olunmuş ərazilərdə aparılacağı konkret göstərilməyib. Yəni məsələnin bu tərəfi açıq qalıb. Baxmayaraq ki, əsasən işğal olunmuş ərazilər minalanıb.
Məsələyə münasibət bildirən AMİP Mərkəzi Şurasının üzvü Əli Orucovun sözlərinə görə, bu, erməni təbliğatının növbəti spekulyasiyasıdır: "İşğal olunmuş ərazilər Azərbaycanın ərazisidir. Orada yaradılan qondarma separatçı rejim heç bir ölkə tərəfindən tanınmayıb. O cümlədən düşünmürəm ki, NATO kimi ciddi bir qurum məhz işğal olunmuş ərazilərdə minaların təmizlənməsinə yardım göstərsin. Çox güman ki, Ermənistan rəsmiləri köhnə texnikanın utilizasiyası ilə bağlı NATO-nun yardım qərarını təhrif olunmuş formada təqdim edir. Bütün bunlara rəğmən, arxayınlaşmaq olmaz. Bununla bağlı Azərbaycan NATO-ya rəsmi sorğu göndərməlidir. Başqa bir tərəfdən, NATO-nun Ermənistanla belə bir fond yaratmaq istəyi də başadüşülən deyil. Çünki NATO rəsmiləri yaxşı bilir ki, Ermənistan müstəqil dövlət deyil, Rusiyanın satelletidir. İstənilən halda, Azərbaycan məsələni diqqətdə saxlamalı, bu yöndə diplomatik fəaliyyətini artırmalıdır".
Vidadi ORDAHALLI