Mehman Muradlı: "Bu, beynəlxalq qanunvericiliyin də tələbidir"
Azərbaycan Respublikasının BMT yanında Daimi Nümayəndəliyi tərəfindən "Azərbaycanın işğal olunmuş ərazilərində qanunsuz iqtisadi və digər fəaliyyətlərlə bağlı üçüncü tərəflərin məsuliyyətinə dair hüquqi rəy" adlı sənəd BMT Təhlükəsizlik Şurası və Baş Məclisinin sənədi kimi yayılıb.
Sənəddə Ermənistanın Azərbaycanın işğal olunmuş ərazilərində qanunsuz iqtisadi və digər fəaliyyətləri müxtəlif istiqamətlər üzrə təsnif edilir, Ermənistanın əməllərinin qanunsuzluğunun hüquqi əsaslandırılması və üçüncü tərəflərin hüquqi məsuliyyətinə dair hüquqi rəy təmin edilir. Hüquqi rəydə belə bir müddəa da var: "Ağırlaşdırılmış məsuliyyət kimi bütün dövlətlər tərəfindən Ermənistanı məsuliyyətə cəlb etmək və ona qarşı tədbirlərin görülməsi, o cümlədən sanksiyaların tətbiq edilməsi, cinayət və mülki işlərin açılması".
Göründüyü kimi, sənəddə Ermənistanın etdiyi qanunsuz əməllərə görə cəzalandırılması, hətta ona qarşı sanksiyaların tətbiq edilməsi də daxil olmaqla, üç istiqamətdə təsir etmək ideyası öz əksini tapır. Bunun edilməsi mümkündürmü?
Hüquqşünas Mehman Muradlı qəzetimizə açıqlamasında bildirdi ki, bu tələbin həyata keçməsi tam mümkündür: "Əvvəla belə bir sənədin hazırlanaraq BMT-də Azərbaycan adından yayılması çox müsbət haldır. Çünki BMT dünyanın ən nüfuzlu qurumlarından biri kimi tanınır. Sənəd tam arqumentləşdirilib və faktlar üzrə təqdim edilib. Sübut olunur ki, Ermənistan torpaqlarımızı işğal altında saxlamaqla yanaşı, uzun illər ərzində onlardan istifadə etməklə başqa bir cinayət əməlinə yol vermiş olub. Sənəddə Ermənistanın yol verdiyi cinayətlər barədə detallı danışıldığı üçün, xırdalığa varmayacam. Hesab edirəm ki, hüquq pozuntusu ilə bağlı istənilən iddianın irəli sürülməsi əsaslandırılırsa, ona mütləq cəza da tələb edilməlidir. Əks halda, edilən tələb qeyri-ciddi səslənə bilər. Ermənistan etdiyi əməllərlə beynəlxalq qanunları və konvensiyaları da pozub. Elə sənədin yayıldığı BMT-nin qüvvədə olan qətnamələrini icra etmir. İşğalda saxladığı torpaqlardan qanunsuz olaraq öz məqsədləri üçün istifadə edir. Bütün bunlar Ermənistanın məsuliyyətə cəlb edilməsi və etdiyi əməllərdən əl çəkməsinə dair tələblərin irəli sürülməsinə əsas verir. Bəli, doğru olaraq qeyd edilir ki, dövlətlər buna reaksiya verib Ermənistana qarşı sanksiyaların tətbiqində iştirak etməlidir. Sənədi mükəmməl sayıram. Orada göstərilən faktlar Ermənistanın cinayət məsuliyyətinə cəlb olunması və ona qarşı sanksiyaların tətbiqinə əsas verir. Bu, beynəlxalq qanunvericiliyin də tələbidir".
Məhəmmədəli QƏRİBLİ