Ramil Hüseynov: "Bu kimi sənədlərin hüquqi baxımdan müəyyən əhəmiyyəti var"
Məlum olduğu kimi, Azərbaycan Respublikasının BMT yanında Daimi Nümayəndəliyi tərəfindən "Azərbaycanın işğal olunmuş ərazilərində qanunsuz iqtisadi və digər fəaliyyətlərlə bağlı üçüncü tərəflərin məsuliyyətinə dair hüquqi rəy" adlı sənəd BMT Təhlükəsizlik Şurası və Baş Məclisinin sənədi kimi yayılıb.
Sənəddə Ermənistanın qanunsuz əməllərini ört-basdır etmək və beynəlxalq hüququn norma və prinsiplərini, BMT Təhlükəsizlik Şurasının qətnamələrini təhrif edərək üzərinə düşən öhdəlik və məsuliyyətdən yayınmaq cəhdlərini nəzərə alaraq bir sıra məsələlər ortaya qoyulub. Həmçinin, BMT-nin baş katibinə Xarici İşlər Nazirliyi tərəfindən hazırlanmış "Azərbaycanın işğal olunmuş ərazilərində qanunsuz iqtisadi və digər fəaliyyətlər" adlı müfəssəl hesabat təqdim edilib. Hesabatda faktlar, rəqəmlər və statistik məlumatlarla sübut olunur ki, Ermənistan həmin ərazilərdə qanunsuz fəaliyyətlə məşğuldur.
Sənədin təmin etdiyi hüquqi rəyə görə, Ermənistan Azərbaycanın işğal olunmuş ərazilərində qanunsuz əməllərin həyata keçirilməsinə məsuliyyət daşıyan tərəfdir. Bu qanunsuz əməllərin bir qismi beynəlxalq hüququn imperativ normalarından irəli gələn öhdəliklərin ciddi surətdə pozulmasıdır. Bu sıraya aid edilən məsələlərdən biri də işğaldan əvvəl həmin ərazidə yaşayan insanların maraqlarının aliliyini nəzərə almadan, işğal olunmuş ərazilərin təbii resurslarının istismar edilməsidir. Ümumən sənəddə göstərilən bu məqam nə deməkdir?
Məsələyə münasibət bildirən VİP-in sədr müavini Ramil Hüseynov buna aydınlıq gətirərək bir sıra məqamlara toxundu: "Məsələ ondadır ki, Dağlıq Qarabağla yanaşı, ətraf 7 rayon da işğal edilib. Belə ki, həmin rayonlarda erməni yaşamırdı. Ermənilər istər Dağlıq Qarabağdakı azərbaycanlıların yaşadığı yaşayış məntəqələrini, istərsə də ətraf rayonlardakı kənd və qəsəbələri məhv edərək yer üzündən siliblər. Bütün tarixi məhv ediblər. Həmin ərazilərdə qanunsuz fəaliyyətləri nəticəsində təbii resursları vəhşicəsinə istismar edirlər. Nəticədə oraların ekologiyasına, flora və faunasına ciddi ziyan dəyib. Nəzərə almırlar ki, torpaqlar geri qaytarıldıqdan sonra, məcburi köçkünlər öz dədə-baba yurdlarına qayıdan zaman məhz bu səbəbdən bir sıra çətinliklərlə üzləşəcək. Ümumilikdə, bu kimi sənədlərin qəbul olunması torpaqların geri qaytarılmasını hansısa formada tezləşdirməsə də, hüquqi baxımdan bunun əhəmiyyəti var. O üzdən, biz hər zaman bu istiqamətdə çoxşaxəli iş görməliyik. Səylərimizi mümkün olan qədər artırmalıyıq".
Vidadi ORDAHALLI