Məhəmməd Əsədullazadə: "Ermənistanın bu siyasəti regionda ümumi təhlükəsizliyi ciddi şəkildə təhdid etməkdədir"
Azərbaycan Respublikasının BMT yanında Daimi Nümayəndəliyi tərəfindən "Azərbaycanın işğal olunmuş ərazilərində qanunsuz iqtisadi və digər fəaliyyətlərlə bağlı üçüncü tərəflərin məsuliyyətinə dair hüquqi rəy" adlı sənəd BMT Təhlükəsizlik Şurası və Baş Məclisinin sənədi kimi yayılıb.
Sözügedən sənəddə nəzərdə tutulan məqamlar böyük marağa səbəb olub. Sənəddə göstərilir ki, beynəlxalq münasibətlərdə və münaqişələrin həlli prosesində qanunun aliliyinin təmin olunması mütləq xarakter daşıyır. Bütün beynəlxalq ictimaiyyət, müvafiq beynəlxalq təşkilatlar, ATƏT-in Minsk Qrupunun həmsədr ölkələri, əcnəbi hüquqi və fiziki şəxslər "Azərbaycanın işğal olunmuş ərazilərində qanunsuz iqtisadi və digər fəaliyyətlərlə bağlı üçüncü tərəflərin məsuliyyətinə dair hüquqi rəy" və Ermənistan-Azərbaycan, Dağlıq Qarabağ münaqişəsinin hüquqi aspektləri ilə əlaqədar Azərbaycanın təqdim etdiyi digər fundamental hüquqi hesabatları nəzərə almağa çağırılır.
O da məlumdur ki, bəzi siyasilər, digər tanınmış şəxslər qanunsuz olaraq işğal altında olan ərazilərə səfər edir. Bəzi əcnəbi şirkətlər qanunsuz olaraq həmin ərazilərdə fəaliyyət göstərir. Bu baxımdan sözügedən sənəd bunun qarşısının alınmasında nə kimi rol oynaya bilər?
Məsələyə münasibət bildirən politoloq Məhəmməd Əsədullazadənin sözlərinə görə, BMT-nin Baş Məclisi və Təhlükəsizlik Şurasına təqdim edilən "Azərbaycanın işğal olunmuş ərazilərində qanunsuz iqtisadi və digər fəaliyyətlərlə bağlı üçüncü tərəflərin məsuliyyətinə dair hüquqi rəy" adlı sənəd əsaslı bitərəf baxış təmin edərək, münaqişənin həlli ilə əlaqədar mövcud hüquqi öhdəlik və məsuliyyətin daha yaxşı başa düşülməsinə töhfə verir və bu istiqamətdə konkret təkliflərlə çıxış edir: "Qeyd edim ki, Azərbaycanın bu təşəbbüsü son illərdə Ermənistanın işğal etdiyi ərazilərdə apardığı tikinti-mədən və turizm kimi təxribatçı siyasətinin qarşısını almağa yönəlib. Azərbaycan bu sənədlə beynəlxalq təşkilatlarda Ermənistanın işğalçı ölkə kimi tanınmasını bir daha təsdiq etmiş oldu. Bu beynəlxalq sənəd Azərbaycanın ərazilərinə qanunsuz səfərlərin də qarşısını almalıdır. Ancaq erməni lobbisinin təsiri altında olan bəzi tanınmış şəxslərin Azərbaycanın işğal olunmuş ərazilərinə qanunsuz səfərlər həyata keçirməsi beynəlxalq hüquq normalarının ayaqlar altına atılması deməkdir. Qeyd edim ki, bəzi ölkələrin turizm və digər şirkətlərinin Qarabağda qanunsuz fəaliyyətinin qarşısının alınması üçün Azərbaycanın hüquqi müstəvidə mübarizəsi öz effektini verir. Təbii ki, Ermənistanın bu siyasəti regionda ümumi təhlükəsizliyi ciddi şəkildə təhdid etməkdədir. Azərbaycanın işğal olunmuş ərazilərinə qanunsuz səfərlər edənləri rəsmi Bakı İnterpola verməli və bu istiqamətdə sərt siyasət aparmalıdır".
Vidadi ORDAHALLI