İngiltərənin Mançester şəhərində stadionda konsert zamanı törədilən terror bu təhdiddən heç kimin sığortalanmadığını bir daha açıq şəkildə meydana qoydu. Hadisələrin inkişaf axarı terror təhdidinin MDB ölkələri üçün də keçərli olduğunu göstərir və bu xüsusda edilən rəsmi xəbərdarlıqların sayı artır. Belə ki, Rusiya Federal Təhlükəsizlik Xidmətinin rəhbəri Aleksandr Bortnikov bu xüsusda vəziyyətin heç də yaxşı olmadığını diqqətə çatdırıb.
Onun sözlərinə görə, beynəlxalq terror təşkilatlarının coğrafi fəaliyyəti genişlənir, onların hücumlarının intensivliyi artır: "Moskva MDB dövlətlərinin nümayəndələrinin daha çox terror hücumlarına cəlb edilməsindən narahatdır. Terrorçular fərqli sosial şəbəkələrdə aktiv təbliğat aparırlar. Onlar qaçqın adı altında müxtəlif qaynar nöqtələrdən digər ölkələrin ərazisinə daxil olur, burada daxili təhlükəsizliyə təhdid yaradırlar. Bütün bunlar MDB ölkələrinin təhlükəsizliyi üçün də təhdid formalaşdırır". Aleksandr Bortnikov vurğulayır ki, İŞİD dəyişən situasiyaya çox tez adaptasiya olur: "İŞİD-ə son zamanlar böyük zərbələr endirilib. Buna rəğmən, terror təşkilatı dəyişən situasiyaya uğurla adaptasiya olunur və öz resurslarını tez bərpa edir".
O vurğulayıb ki, MDB ölkələrinin birbaşa sərhədində yerləşən Əfqanıstan və Yaxın Şərq regionunda vəziyyət xüsusi narahatlıq yaradır: "İŞİD, "Cəbhət-ən-Nüsra" kimi terror təşkilatlarının yaratdığı təhdid bu günün reallığıdır. MDB üzvü və digər ölkələr üçün daha bir təhdid mühacir terrorçuların çıxdıqları ölkələrə geri qayıtması və bu ölkələrdə aktivləşməsidir".
Xatırladaq ki, ötən ay da eyni xəbərdarlıqla Rusiya prezidenti Vladimir Putin çıxış edib: "Demək olar ki, bütün MDB ölkələri terror hücumları üçün potensial hədəfdir. Təəssüf ki, bununla bağlı vəziyyət düzəlmir. MDB ölkələri, terrorla yanaşı, başqa təhdidlərlə də qarşılaşır. Bura mütəşəkkil cinayətkarlıq, narkotik vasitələrin qanunsuz dövriyyəsi, korrupsiya və xarici qüvvələrin ölkələrin daxili siyasi vəziyyətinə təsiri daxildir". Putin Suriyadakı rusiyalı döyüşçülərin ölkəsinə dönməsinin Rusiya üçün böyük bir təhdid yaradacağını və buna icazə verməyəcəyini dəfələrlə dilə gətirib. Amma bu ilin mart ayında Çeçenistanda hərbi bazaya edilən hücumda yeddi rus əsgərinin öldürülməsi, apreldə isə Peterburqdakı metro stansiyasında təşkil edilən intihar hücumunda 14 vətəndaşın və eyni gündə Həştərxanda iki polisin silahlı hücum nəticəsində öldürülməsi İŞİD-in hələ də Rusiya daxilində yenidən əməliyyat keçirmə imkanında olduğunu göstərir. Rusiya müdafiə nazirinin müavini Anatoli Antonov isə bildirir ki, İŞİD öz fəaliyyətini Avropa, Rusiya, Qafqaz, Mərkəzi Asiyada genişləndirmək niyyətindədir.
Qeyd edək ki, İŞİD sıralarında Rusiya və MDB ölkələrindən olan yüzlərlə döyüşçü var. Onların geri qayıtması isə MDB ölkələrində terror təhdidini daha da artırır. Ekspertlər bildirir ki, Suriyada daxili müharibənin başlanması ilə birlikdə İŞİD-in əvvəl İraq, sonra Suriyada xilafət elan etməsi Şimali Qafqazdakı dinamikaya da təsir edir. Xüsusən də Rusiyanın Suriya siyasəti terrorçuların burada rus hakimiyyətinə qarşı daha aktiv fəaliyyətə keçməsinə gətirib çıxarır. Amma təhlükə tək MDB-ni deyil, əslində Qərb ölkələrini də bürüməkdədir. Bu xüsusda şərqşünas Ivan Yakovin İŞİD-in dünyadakı fəallığının artacağından ehtiyatlanır. Çox sayda İŞİD döyüşçüsünün öz vətəninə, əsasən də Avropa ölkələrinə döndüyünü xatırladan Yakovin vurğulayır ki, Avropa və digər ölkələrdə terror təhlükəsi artacaq. Mütəxəssisin sözlərinə görə, Almaniyada ümummilli seçkilər gözlənildiyindən, bu ölkə daha böyük təhlükə ilə üzləşəcək. Yakovin xatırladır ki, Mançesterdə törədilmiş terror aktı da Britaniyada cəmi iki həftə sonra baş tutacaq seçkilər ərəfəsinə düşür. O hesab edir ki, Böyük Britaniyada seçkilər sona çatandan sonra terrorçuların əsas hədəfi Almaniya olacaq. Yakovin deyir ki, terrorçular 15 il öncə İspaniyada vağzalda törətdikləri partlayışdan dərs çıxarıblar. Onlar artıq bilirlər ki, seçkidən öncə törədilmiş terror aktının köməyilə seçkinin nəticələrinə təsir göstərə bilərlər: "Həmin vaxt İspaniyada sosialistlər qalib gəldi və dərhal ispan qoşunlarını İraqdan çıxardılar. İndi bir çoxları həmin effekti təkrarlamaq istəyir, ancaq bir qədər fərqli şəkildə. İndi onların məqsədi başqadır. Onlar Avropa ölkələrində ultrasağçı partiya və təşkilatların hakimiyyətə gətirilməsinə çalışırlar. Bu yolla yerli müsəlman əhalini özlərinə cəlb etmiş olacaqlar. Beləliklə bütün dünyada, xüsusən də Avropada cihadçıların sıraları dolacaq. Düşünürəm ki, onlar öz hərəkətlərini məhz buna kökləyir. Bilirsiniz, vəziyyət belədir: terrorçular və ultrasağçılar bir-birini nifrətlə qidalandırır. Nə qədər çox terror aktı olsa, ultrasağçılar o qədər qazanır. Ultrasağçıların siyasəti nə qədər sərt olsa, narazı müsəlmanların sayı bir o qədər artır. Sonradan onları terrorçu təşkilata cəlb etmək mümkün olur".
Tahir TAĞIYEV