Əli Orucov: "Ermənistanın digər etniklərə qarşı nə cür "münasibət" bəsləməsi göz qabağındadır"
İki gün əvvəl "Yaxın Şərqdə etnik və dini zorakılıq qurbanları" mövzusunda beynəlxalq konfrans keçirilib. Konfransda Ermənistan xarici işlər naziri Edvard Nalbandyan odlu-alovlu çıxış edib. O, çıxışı zamanı iddia edib ki, guya Ermənistan Yaxın Şərqdə həssas icmaları qorumaq üçün beynəlxalq ictimaiyyətin səylərinə öz töhfəsini verir.
Nalbandyan bunu müxtəlif arqumentlərlə əsaslandırmağa çalışıb. Onun sözlərinə görə, Ermənistan təxminən 22 min suriyalı qaçqına sığınacaq verib. Erməni nazirin fikrincə, baş verən hadisələr zamanı erməni yaşayış məntəqələri, kilsələr, məktəblər və mədəni strukturlar dağıdılıb. Buna baxmayaraq, guya minlərlə erməni Yaxın Şərqdə digər xalqlarla birgə yaşayır.
Diqqətçəkən məqamlardan biri də ondan ibarətdir ki, Nalbandyan son parlament seçkilərindən sonra digər etniklərin də parlamentə düşdüyünü deyib. Onun sözlərinə görə, parlamentdə təmsil olunan 4 deputat qrupundan 3-də digər etniklər - yezidilər, süryanilər və kürdlər təmsil olunur. Bunu xüsusi fəxrlə vurğulayıb. Halbuki, Ermənistan monoetnik ölkədir. Məgər orada digər etniklərin nümayəndəsi yaşayır? Məsələyə münasibət bildirən AMİP Siyasi Şurasının üzvü Əli Orucovun sözlərinə görə, bunlar Nalbandyanın növbəti şousudur: "Ermənistan barmaqla sayılacaq polietnik ölkələrdən biridir. Əhalinin nəinki 99, yüz faizi ermənilərdən ibarətdir. Orada məgər süryanilər yaşayır ki, onların nümayəndəsi parlamentdə təmsil olunsun?! O cümlədən, kürdləri deportasiya ediblər. Yəni orada sayı olduqca az olan yezidilər yaşayır. Yəni deməyim odur ki, bu, ermənilərin növbəti saxtakarlığıdır və bununla beynəlxalq ictimaiyyəti aldatmaq istəyirlər. Ermənistanın digər etniklərə qarşı nə cür "münasibət" bəsləməsi göz qabağındadır. Məsələ ondadır ki, məlum hadisələrdən sonra 200 mindən çox azərbaycanlı dədə-baba torpaqlarından didərgin salınıb. Onlardan biri də özüməm. Ona görə də bütün bu deyilənlər ermənilərin növbəti uydurmasıdır". Vidadi ORDAHALLI