Rauf Zeyni: "Çünki belə olan təqdirdə, Sarkisyan rejiminin əsl iç üzü elə öz vətəndaşları tərəfindən açıqlanacaq"
"Azərbaycan-Ermənistan Sülh Platforması"nın Avropa Parlamentində və başqa beynəlxalq təşkilatlarda həyata keçirilməsinin tərəfdarıyıq. Bu mesajı həm Avropa Parlamentində, həm burada, həm də başqa beynəlxalq təşkilatlarda səsləndiririk. Bunu Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Avropa Parlamentinin Azərbaycanda səfərdə olan nümayəndə heyəti ilə görüşdən sonra jurnalistlərə deyib.
S.Seyidov bildirib ki, ancaq bu qarşılıqlı münasibətlər ikitərəfli olmalıdır: "Azərbaycan həm danışıqlara, həm də əlaqələri qurmağa hazırdır. Qarşı tərəfin razılığının olması isə sual altındadır. Əminəm ki, açıq, sərbəst və bu şəkildə təşkil olunmuş komitələr arasında münasibətlər həm Azərbaycan Parlamenti ilə Avropa Parlamenti arasında münasibətləri yüksək səviyyəyə qaldıracaq, həm də Azərbaycanın ən ağrılı problemi - Dağlıq Qarabağ probleminin açıq-aşkar həqiqətlərinin Avropa ictimaiyyətinə çatdırılmasında böyük rol oynayacaq".
S.Seyidovun bu təklifinin nə kimi əhəmiyyəti ola bilər?
"Azərbaycan-Ermənistan Sülh Platforması"nın fəaliyyətində yaxından iştirak edən Milli Qeyri-Hökumət Təşkilatları Forumunun prezidenti Rauf Zeyni qəzetimizə açıqlamasında bildirdi ki, belə bir təklifi o da dəstəkləyir: "Bilirsiniz ki, belə bir təşəbbüs ilk dəfə Bakıda keçirilən konfransda irəli sürüldü və dəstəkləndi. İlk dəfə olaraq hər iki ölkənin ziyalıları, politoloqları belə bir layihənin həyata keçirilməsinin zəruriliyindən danışdılar. Qısa müddət ərzində həyata keçirilən iş böyük effekt verdi. Dünyanın müxtəlif ölkələrindən bu platformaya qoşulmaq istəklərini bəyan edənlər oldu. Hətta layihə o qədər cəzbedici oldu ki, bir neçə erməni ziyalısı Azərbaycana səfər etdi. Ermənistan və Dağlıq Qarabağın ərazisində yaşayan insanlar platformaya qoşulduqlarını bəyan etməkdən də çəkinmədi. Hazırda "Sülh Platforması"na qoşulduğuna görə çoxlu sayda həbsə atılan erməni var. Onlara məhz sülhə tərəf çıxdıqlarına görə olmazın işgəncələr verilir. Bu baxımdan da "Sülh Platforması"nın Avropa Parlamentində və başqa beynəlxalq təşkilatlarda həyata keçirilməsinin tərəfdarıyıq. Çünki belə olan təqdirdə, Sarkisyan rejiminin əsl iç üzü elə öz vətəndaşları tərəfindən açıqlanacaq. Biz bunun şahidi olmuşuq. Hətta Ermənistanın ən tanınmış jurnalistləri, hüquq müdafiəçilərinin analoji çıxışları ilə biz artıq tanışıq. Çalışmalıyıq ki, Səməd Seyidovun bu təklifinin həyata keçirilməsinə nail olaq. Bizim belə bir platformanın beynəlxalq təşkilatlar səviyyəsində həyata keçirilməsindən heç bir çəkinəcəyimiz yoxdur".
Məhəmmədəli QƏRİBLİ