Elçin Mirzəbəyli: "Bu onların arxasında duranların kimliyini sübuta yetirir"
Rusiyanın "REGNUM" və "İnterfaks" agentlikləri, "Jam" jurnalı, Almaniyanın "Zuerst" jurnalı Dağlıq Qarabağdakı separatçı rejimin informasiya tribunasına çevrilib.
Məsələ ondadır ki, Xankəndidə fəaliyyət göstərən və qondarma separatçı rejimin diqtəsi altında var gücü ilə Azərbaycana qarşı təbliğat aparan "Artsakh press"in rəhbərliyi agentliyin yaradılmasının 3 illiyini qeyd edib. Agentliyin "uğurları"ndan danışan direktor Baqram Poqosyan "Artsakh press"in bir sıra xarici agentlik və qəzetlərlə sıx əlaqə yaratdığını qeyd edib. Bu sırada İran paytaxtı Tehranda nəşr olunan "Alik" qəzeti və Moskvada çıxan "Jam" jurnalı ilə əməkdaşlıq barədə memorandum imzalanması xüsusi vurğulanıb. Bundan əlavə, Suriyada nəşr olunan "Qandsazar" qəzeti, Rusiyanın məşhur "REGNUM" informasiya agentliyi ilə sıx əlaqələr xüsusi qeyd edilib. Bu yaxınlarda "İnterfaks" agentliyi, eləcə də Almaniyanın həftəlik "Zuerst" jurnalı ilə də əlaqələrin qurulmasına başlanmasından söz açılıb. Tədbirin gedişində Moskvadakı "Jam" jurnalının baş redaktoru ilə telekörpü yaradılıb.
Bütün bunlar onu göstərir ki, separatçı qurum bu kimi vasitələrdən istifadə edərək öz təbliğatını aparır. Təəssüfləndirici hal isə ondan ibarətdir ki, dünyada bir sıra tanınmış media orqanları buna alət olur. Bunun qarşısını necə almaq olar? Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, bununla bağlı informasiya müharibəsi gücləndirilməlidir: "Təəssüflər olsun ki, qonşu dövlətlərin bəzi media orqanlarının separatçı qurumda fəaliyyət göstərən media qurumları ilə əlaqələr qurması artıq sübut edilib. Bununla bağlı dəfələrlə Azərbaycan tərəfinin mövqeyi açıqlanıb. Bu məsələdə qonşularımız səmimi münasibət sərgiləmir və özlərinin elan etdiyi prinsiplərə uyğun mövqe nümayiş etdirmirlər. Məsələn, qonşu İran müsəlmanların təəssübünü çəkdiyini bildirsə də, sərhədlərinin beş addımlığında Azərbaycan torpaqlarının işğal olunması faktına dözür. "REGNUM" agentliyinə gəldikdə isə, sözügedən media orqanı ermənipərəst dairələrə məxsusdur. Mütəmadi olaraq öz informasiya siyasətlərində Ermənistanın maraqlarını öndə tuturlar. Bu da onların arxasında duranların kimliyini sübuta yetirir. Digər tərəfdən, ola bilsin ki, hansısa ikinci, üçüncü dərəcəli KİV-in də qondarma qurumdaki media orqanları ilə əlaqəsi var. O üzdən hesab edirəm ki, bütün bunların araşdırılmasına ehtiyac var. Belə halların qarşısını almaq üçün birinci növbədə Azərbaycan torpaqları işğaldan azad edilməlidir. Çünki bizim bütün danışdıqlarımız nəticəsizdir. Səbəb isə torpaqların hələ də işğal altında olmasıdır. Ancaq buna baxmayaraq, belə hallara qarşı informasiya mühitində mübarizəni genişləndirmək lazımdır. Onlarla əməkdaşlıq edən mətbuat orqanları barəsində beynəlxalq media qurumlarına müraciət etmək və bu şəxslərin fəaliyyətinin medianın prinsiplərinə zidd olduğunu, separatizmi dəstəkləmək anlamına gəldiyini demək lazımdır. Ən başlıcası isə, güclü olmaq və informasiya məkanında üstünlüyümüzü daha da möhkəmləndirmək lazımdır".
Vidadi ORDAHALLI