Qulu İsmayılov: "Azərbaycanın mövqeyi odur ki, regionda tranzit daşımalarının mərkəzinə çevrilsin"
İranda prezident seçkilərində növbəti dəfə qələbə qazanan Həsən Ruhani Tehranda keçirilən ilk mətbuat konfransında deyib ki, İranla Azərbaycan arasında yaxşı əlaqələr və koordinasiya olunmuş qarşılıqlı münasibətlər mövcuddur.
İran prezidenti daha sonra qeyd edib: "Azərbaycan İranın ən yaxşı qonşusudur. İki ölkə arasında münasibətlər İranın 11-ci hökuməti dövründə və Azərbaycan Prezidenti İlham Əliyevin hakimiyyəti dövründə yaxşı inkişaf edib".
H.Ruhani əlavə edib ki, iki ölkə arasında əməkdaşlıq və əlaqələr bundan sonra da davam edəcək və İranla Azərbaycan arasında münasibətlər strateji xarakterlidir.
İranın yeni seçilmiş prezidenti bildirib: "İki ölkə arasındakı münasibətlər artıq ikitərəfli formatı keçmiş, Azərbaycanın iştirakı ilə digər ölkələrlə, o cümlədən 2016-cı ildə Rusiya prezidenti Vladimir Putinin iştirakı ilə üçtərəfli görüşlər keçirilmişdi".
H.Ruhanı vurğulayıb ki, bu əməkdaşlıq davam edəcək və növbəti üçtərəfli görüş, böyük ehtimalla, tezliklə Tehranda keçiriləcək.
İranın yeni seçilmiş prezidentinin ilk açıqlamasında üçtərəfli formatda görüşün vacibliyindən danışması necə şərh edilə bilər?
İqtisadçı Qulu İsmayılov qəzetimizə açıqlamasında bildirdi ki, bu formatın önəmi siyasi olmaqla yanaşı, həm də iqtisadi əhəmiyyətlidir: "Tərəflər, xüsusilə də hazırda iqtisadi sanksiyalar və blokada ilə hədələnən İran bunu gözəl anlayır. Azərbaycan-Rusiya-İran üçtərəfli əməkdaşlıq formatı Azərbaycan Prezidenti tərəfindən irəli sürülüb və müsbət bir modeldir. Çünki Azərbaycanın başqa formatda da əməkdaşlıq təcrübəsi var: Azərbaycan-Türkmənistan-Türkiyə, Azərbaycan-Gürcüstan-Türkiyə, Azərbaycan-İran-Türkiyə, üstəgəl də Azərbaycan-Rusiya-İran. Bu da hər 3 dövlətin maraqlarına xidmət edir, nəqliyyat dəhlizi yaradır. Bununla Rusiya Yaxın Şərqə çıxış imkanı qazanır, İran isə Avropa bazarına çıxış imkanı qazanır. Düşünürəm ki, bu layihə başa çatdıqdan sonra hər 3 dövlətin xeyrinə xidmət edəcək. Üstəlik də Azərbaycanın bu nəqliyyat xətti vasitəsilə bölgədəki rolu daha da artacaq. Çünki, bundan başqa, indi Bakı-Tiflis-Qars dəmir yolu xətti də işə düşməlidir. Çindən gələn mallar Qazaxıstan və Azərbaycan üzərindən Avropaya daşınacaq. Həmçinin, TAP və TANAP layihələri. Bütün bu layihələr, o cümlədən, Azərbaycan-Rusiya-İran üçtərəfli əməkdaşlıq formatı Azərbaycanın bölgədəki rolunun artmasına xidmət edir. Bu layihə ticarət dövriyyəsinin inkişafına gətirib çıxaracaq. Azərbaycanın ixrac imkanları İranla, demək olar ki, eynidir. Biz də Rusiya bazarına qida məhsulları, meyvə-tərəvəz məhsulları ixrac edirik. İranın milyardlarla ölçülən bazarı var. İran da qida, meyvə-tərəvəz məhsulları, həm də quru meyvələr ixrac edir. Bu əməkdaşlıq platforması hərtərəfli yaxşıdır. Bölgədə stabil inkişafa nail olmaq istəyirsənsə, hər iki ölkə ilə münasibətləri normal səviyyədə saxlamaq lazımdır. Xüsusilə neftin qiymətinin ucuzlaşdığı indiki şəraitdə iqtisadiyyatın digər istiqamətlərini inkişaf etdirməyə ciddi ehtiyac var. Bu istiqamətdə İran və Rusiya böyük bazar hesab oluna bilər. Azərbaycan bu üçtərəfli əməkdaşlıq formatında daha çox enerji layihələrində maraqlıdır. İkinci istiqamət tranzit daşımalarıdır. Azərbaycanın mövqeyi odur ki, regionda tranzit daşımalarının mərkəzinə çevrilsin".
Məhəmmədəli QƏRİBLİ