Qabil Hüseynli: "Görünən budur ki, hətta Ermənistan kimi ölkənin daxili rəyində belə anti-Rusiya ovqatı var"
Ermənistan KİV-i ölkə daxilində Avropa institutlarından birinin keçirdiyi rəy sorğusunun maraqlı nəticələrini açıqlayıb. "Kiserqi" Avropa Tədqiqatlar Mərkəzinin keçirdiyi rəy sorğusunun nəticələrinə görə, Ermənistan əhalisinin 37 faizi Rusiyanı təhlükəli ölkə sayır. Rəyi soruşulanların 14 faizi isə Ukrayna hadisələrində Rusiyanı günahkar bilir. Ermənistanın daxilində bu anti-Rusiya ovqatı nə ilə bağlıdır?
Politoloq Qabil Hüseynli qəzetimizə açıqlamasında bildirdi ki, bunun başlıca səbəbi aparılan sorğunun əhatə etdiyi kontingentlə bağlıdır: "Görünür, belə bir sorğu ziyalılar və tarixi hadisələrdən baş çıxaran respondentlər arasında aparılıb. Əldə olunan nəticələr məni də dərindən təəccübləndirdi. Düşmən ölkə olsa da, onların gəldiyi qənaəti alqışlayıram. Çünki Rusiya doğrudan da qorxulu ölkədir. İmperiya olanda da, sonrakı dönəmlərdə də işğalçılıq siyasəti yürüdüb. Ekspansiya etdiyi yerlərdə isə öz qanunlarını, üsul-idarəsini qoyub. Ağlı başında olan, kitab oxuyan hər bir şəxs bunu gözəl bilir və anlayır. Ermənistanın hazırda yerləşdiyi Qafqazın da işğalı Rusiyanın adı ilə bağlı olub. Düzdür, ermənilərə bundan sonra gözəl şərait də yaradılıb. Onların müstəqil dövlət olmasına imkan verilib. Buna baxmayaraq, vicdanını itirməyib düz danışan ermənilərin hələ də olduğu üzə çıxır. Ukrayna məsələsilə də bağlı gəlinən qənaət tam doğrudur. Çünki Rusiya güc faktorundan istifadə edərək Ukraynanın bir hissəsini işğal etdi. Müasir dönəmdə bunun edilməsi çox təəccüblü qarşılansa da, Rusiya heç nəyə məhəl qoymadan, köhnə ambisiyasında qaldığını diqqətə çatdırdı. Dünyanın əksər ölkələrində Ukraynadakı hadisələrə görə Rusiya qınanılır. Belə bir vəziyyətin Rusiyanın yaxın müttəfiqlərindən olan Ermənistanda da üzə çıxması təəccüblü olsa da, normaldır. Görünən budur ki, hətta Ermənistan kimi ölkənin daxili rəyində belə anti-Rusiya ovqatı var. Deməli, sadə xalqla Ermənistan siyasi rəhbərliyi arasında ciddi uçurumun olması üzə çıxır. Xalq başqa cür düşünür, hakimiyyət başqa. Xalqın iradəsinə söykənməyən hakimiyyəti isə yalnız təlatümlər gözləyə bilər. Ermənistanda bu şəkildə anti-Rusiya ovqatının olmasının digər səbəbi isə sadə erməni xalqının zillət içində yaşamasıdır. Onlar düşünür ki, sadə xalqa lazım olmayan münaqişəyə onları məhz Rusiya sürükləyib. Faktiki olaraq, Ermənistanda yaşanan iztirab və kasıbçılıq sırf münaqişə faktoruna bağlıdır. Nisbətən imkanı olanlar ölkəni tərk edib. İmkanı olmayanlar isə Ermənistanın daxilində çabalayır. Təbii ki, onların ovqatı Rusiyanın əleyhinə köklənəcək. Sorğuda səs verənlərin gəldiyi qənaətə şərik çıxıram və erməniləri bu doğru mövqedə qalmağa dəvət edirəm. Əminliklə demək olar ki, əhalinin bu rəyindən həm Rusiya, həm də Ermənistan hakimiyyətinin xəbəri var. Avtoritar rejimlər xalqın iradəsilə hesablaşmadığı üçün, düşünmürəm ki, bundan bərk narahat olacaqlar".
Məhəmmədəli QƏRİBLİ