Üzeyir Cəfərov: "Heç bir dövlət onlara nə nüvə silahı verəndir, nə də bu şəraiti yaradandır"
"Ermənistanın güclü hərbi mexanizmi olmalıdır. Deyərdim ki, bütün Ermənistan boyunca hərbi nöqteyi-nəzərdən vacib sistem yaratmaq lazımdır, qisas silahı və xəbərdarlıq silahları olmalıdır". Bunu erməni mətbuatına açıqlamasında general-leytenant Norat Ter-Qriqoryants deyib.
81 yaşlı general bir az da irəli gedərək bildirib ki, Ermənistanın nüvə silahı olmalıdır: "Bizə nüvə silahı lazımdır. Lakin bizdə bu yoxdur. Nəyə görəsə Pakistana, İsrailə bu silaha yiyələnməyə imkan yaradıblar, həmin silahdan Türkiyədə də var. Nəyə görə MAQATE və BMT, kobud dillə desək, belə bir göstəriş verməsin ki, Ermənistanda da nüvə silahının əldə olunmasına şərait yaradılsın və heç bir əclaf bundan sonra Ermənistana hücum etməsin.
Keçmiş sovet məkanında və bütünlükdə dünyada alimlərimiz hər zaman silahların, texnikanın, peyklərin, nüvə silahının yaradılmasında iştirak ediblər. Başqa sözlə, Ermənistanın müvafiq hərbi elmi mütəxəssisləri var".
Məlumat üçün qeyd edək ki, Norat Ter-Qriqoryants 1981-ci ildə SSRİ müdafiə nazirinin əmri ilə Əfqanıstanda SSRİ SQ-nin 40-cı ordusu komandanının birinci müavini təyin edilib. 1992-1995-ci illərdə Ermənistan SQ-nin Baş Qərargah rəisi, müdafiə nazirinin birinci müavini vəzifəsində işləyib. 1995-ci ildə Ermənistanı tərk edib.
Nəzərə alsaq ki, nüvə silahlarının yayılmamasına dair beynəlxalq sazişlər var və aparıcı dövlətlər bunda maraqlıdır, o zaman erməni generalın bu cür fitnəkar çağırışlarla çıxış etməsinin arxasında nə dayanır?
Məsələyə münasibət bildirən hərbi ekspert Üzeyir Cəfərovun sözlərinə görə, bu, ermənilərin növbəti fitnəkarlığıdır: "Özünü Pakistan, İsrail kimi ölkələrlə müqayisə edən bir dövlətdən nə gözləmək olar?! Zaman-zaman ermənilər belə fikirlər səsləndirib. Onların bu sərsəm fikirlərinə diqqət yetirən olmayacaq. Ancaq yenə də fikirlər səsləndirirlər ki, bizə nüvə silahı lazımdır. Əvvəla kimdir Ermənistana hücum edən? İndiyə qədər Ermənistana kimsə hücum edib? Əksinə, Ermənistan başqa ölkələrin ərazisinə təcavüz edir. Azərbaycan buna əyani misaldır. Eyni zamanda, Türkiyə və Gürcüstana yönəlik ərazi iddiaları var. Ona görə də heç bir dövlət onlara nə nüvə silahı verəndir, nə də bu şəraiti yaradandır. Sadəcə, sarsaqlayırlar və güman edirlər ki, kimsə onları eşidəcək. Ermənistanın hazırkı siyasi-hərbi rəhbərliyini eşidən yoxdur, qaldı ki, hansısa ehtiyatda olan generalın o cür fikirlər səsləndirməsini kimsə eşitsin. Heç bir ciddi adam belə sərsəm və fitnəkar bəyanatlara fikir verən deyil". Vidadi ORDAHALLI