Zakir Əhmədov: "Ölkə iqtisadiyyatında tənəzzül meylləri özünü daha çox göstərir, nəinki artım tempi"
Ermənistanın dövlət borcu 6 milyard dolları aşıb. İqtisadi vəziyyətin kəskinləşməsi sıravi vətəndaşların köçünün sürətlənməsi baxımından ciddi təhlükə kimi dəyərləndirilir. 1 may tarixinə olan məlumata görə, Ermənistanın dövlət borcu artaraq 6 milyard 37,4 milyon dollar olub ki, bunun da 5 milyard 514,3 mln. dolları hökumətin borcudur.
Daha bir maraqlı fakt odur ki, bu il beş ay ərzində dövlət borcu 95,3 milyon dollara qədər artıb və yanvar ayının 1-i üçün bu rəqəm 5 milyard 942,1 milyon olub.
Sarkisyanın vəzifədə olduğu 9 il ərzində Ermənistanın davamlı olaraq dövlət borcu artıb. 2008-ci ildə bu məbləğ 1,9 milyard dollar olubsa, indi borc 6 mlrd. dolları aşıb və ilin sonunda borcun 6,5 milyarda yaxınlaşacağı göstərilir.
Karen Karapetyanın baş nazirliyi dövründə isə Ermənistanın dövlət borcu yarım ildə, faktiki olaraq, 552,5 milyon dollara qədər artıb. Yaranan vəziyyət ilk baxışdan çox ciddi görünür. Maraqlıdır, Karapetyanın dediyi kimi, ölkə iqtisadiyyatı inkişaf edirsə, nədən Ermənistanın dövlət borcunun həcmi artır?
Ermənistan iqtisadi layihələrin həyata keçirilməsi məqsədilə borc pul götürür. Lakin, bunun əksinə olaraq, iqtisadiyyatı daha da pisləşir, hökumətin səyləri heç bir nəticə vermir. Araşdırmalar nəticəsində aydın olur ki, alınan borc rüşvət şəklində paylanır, dövlət idarələrinin məmurları tərəfindən mənimsənir.
2017-ci il dövlət büdcəsinin rüblük hesabatında göstərilir ki, büdcə kəsirinin maliyyələşdirilməsinin daxili mənbələri 33,4 milyard, xarici mənbələri isə 14,2 milyard təşkil edib.
Bu arada isə prezident Sarkisyan parlamentdə ambisiyalı vədlərlə çıxış edib. O bildirib ki, 2040-cı ilə qədər Ermənistanda ümumdaxili məhsul istehsalının həcmi 60 milyard dollara qədər artacaq. Ümumilikdə, bu nə dərəcədə realdır və Ermənistan buna nail ola bilərmi? Məsələyə münasibət bildirən ekspert Zakir Əhmədovun sözlərinə görə, səslənən fikirlər real deyil: "Ermənistan iqtisadiyyatının ümumi mənzərəsi elə vəziyyətdədir ki, ÜDM-in yaxın perspektivdə ciddi şəkildə artacağından danışmaq tamamilə yersizdir. Ona görə ki, ölkə iqtisadiyyatında tənəzzül meylləri özünü daha çox göstərir, nəinki artım tempi. Açıq dənizə çıxışı olmayan, həmsərhəd olduğu 4 ölkədən ikisi ilə sərhədləri bağlı olan, əlverişli nəqliyyat xətlərinin keçmədiyi bir ölkə iqtisadiyyatda bu cür uğurları necə əldə edə bilər?! İlbəil ölkə borclanır və bu geridönməz bir hal alıb. Ağır iqtisadi-sosial vəziyyət üzündən ölkəni əsasən əmək qabiliyyətli əhali tərk edir. Hər il minlərlə ölkə vətəndaşı xarici ölkələrə üz tutur. Digər tərəfdən, Ermənistan dünya bazarına elə bir texnologiya və yaxud da digər məhsul çıxarmır ki, bu, böyük həcmdə valyuta gəlirlərinin daxil olmasına gətirib çıxarsın. O baxımdan, Ermənistanda ÜDM həcminin 60 milyard dollara çatacağı xəyaldır". Vidadi ORDAHALLI
