Fikrət Sadıqov: "Bütün bunlara rəğmən, qarşı tərəfə adekvat cavab veririk"
ATƏT-in Minsk Qrupunun həmsədrlərinin Bakı səfərinin ardınca Qarabağ cəbhəsində vəziyyət yenidən kritikləşib. İşğalçı ordunun Azərbaycan ərazisindəki bölmələrinin açdığı atəş nəticəsində martın 11-də ordumuzun bir əsgəri şəhid olub.
Azərbaycan Ordusu isə düşmənin hərəkətini cavabsız qoymayıb və ona sarsıdıcı zərbələr endirib. Müdafiə Nazirliyinin martın 12-də yaydığı məlumatda deyilir ki, Ermənistan silahlı qüvvələrinin dayaq məntəqəsinə endirilən artilleriya atəşi nəticəsində düşmən 5 nəfərədək itki verib.
Bu arada Ermənistanın işğalı altındakı Talış kəndinin sakinlərinin zorla kəndə qayıtmağa məcbur edildiyi xəbəri yayılıb. 2016-cı ildə 120 ailənin yaşadığı kənd aprel döyüşlərindən sonra tamamilə boşaldılmışdı. Azərbaycan Ordusunun azad etdiyi strateji yüksəklik kəndi tamamilə nəzarət altında saxlamağa imkan verdiyi üçün, sakinlər daha kəndə dönmək istəmir. Ancaq Ermənistan rəhbərliyi mülki əhalini Azərbaycan əsgərinin nişangahına çevirməklə əlavə xal qazanmaq, həm də əhalinin arxasında gizlənib mövqelərimizi atəşə tutmaq istəyir. Ermənistan Talışın erməni əhalisini kəndə qaytarmaqla həm də Cocuq Mərcanlı qayıdışına "cavab" verməyə, dirəniş göstərməyə çalışır.
Bütün bu gərginliyin həmsədrlərin səfərindən dərhal sonra baş verməsi də suallar yaradır. Digər tərəfdən, təəssüf doğuran hal budur ki, Minsk Qrupunun həmsədrləri Azərbaycanda olarkən nə fevralın 24-25-də, nə ondan sonrakı təxribat-diversiya hərəkətlərinə görə Ermənistanı qınayacaq mövqe ortaya qoymadı.
Bütün hallarda, ermənilərin həmsədrlərin səfərindən sonra cəbhədə təxribatlara əl atmasının arxasında nə durur?
Məsələyə münasibət bildirən keçmiş diplomat, politoloq Fikrət Sadıqovun fikrincə, bunda ermənilərin bir neçə məqsədi var: "Əvvəla ermənilərin cəbhədə təxribatları, səbəbdən asılı olmayaraq, daim baş verir. Bunu ötən illər ərzində dəfələrlə müşahidə etmişik. Bütün bunlara rəğmən, qarşı tərəfə adekvat cavab veririk. Ancaq müşahidələr göstərir ki, ermənilər hansısa vacib görüş ərəfəsində və yaxud da həmsədrlərin səfərindən sonra belə təxribatlara daha çox əl atır. Həmçinin, Ermənistanda seçki keçirilən ərəfədə buna əl atırlar. Məlum olduğu kimi, aprelin 2-də Ermənistanda keçiriləcək parlament seçkilərinə sayılı günlər qalıb. Cəbhədə atəşkəsi pozmaqla Ermənistan rəhbərliyi ictimai diqqəti seçkidən yayındırmaq istəyir. Bu minvalla xarici oyunçulara nümayiş etdirmək istəyirlər ki, guya Azərbaycan onlara sakit yaşamağa imkan vermir. O üzdən son günlər cəbhədə hərbi təxribatların sayı artıb. Bütün bunlara baxmayaraq, biz istənilən vəziyyətə hər zaman hazır olmalıyıq".
Vidadi ORDAHALLI