Ramil Hüseynov: "Ermənistanın Avrasiya İttifaqından ziyan görəcəyi məlum idi"
Brüsselə səfəri zamanı Ermənistan prezidenti Serj Sarkisyan bildirib ki, Ermənistan həm Avropa İttifaqı, həm də Avrasiya İqtisadi İttifaqı ilə əməkdaşlıq edəcək. Guya bu, AB və Avrasiya İttifaqı üçün hər hansı problem doğurmayacaq.
Ancaq reallıq ondan ibarətdir ki, Ermənistanda seçkilər yaxınlaşdıqca, AİB-ə qarşı çıxışlar artmaqdadır. Ermənistanda seçkilər ərəfəsi baş verən siyasi qalmaqallar və Serj Sarkisyanın son günlər ardıcıl xarici səfərlər etməsi erməni ictimaiyyətində yaranan narazılıqları daha da coşdurub.
"Ermənistan Avrasiya İttifaqına girməsəydi, vəziyyəti daha yaxşı olardı". Bunu Ermənistanın keçmiş baş naziri Qrant Baqratyan deyib. Onun sözlərinə görə, bu quruma üzvlük ötən 2 ildə onlara 800 milyon dollara başa gəlib: "Biz Avrasiya İttifaqına üzv ölkələrlə 2011-ci ildən bir ticarət məkanındayıq. O vaxtdan indiyə qədər ticarətdə heç nə dəyişməyib. Əgər Avrasiya İttifaqı, Avropa kimi, hər kəslə azad ticarət zonası yaratsaydı, o zaman neytrallığımızı qorumaq mümkün idi. Amma indi neytrallığı qorumaq mümkün deyil. Avrasiya İttifaqı Rusiyanın nəzarəti altındadır. Belə şəraitdə Ermənistan ya gərək onun maraqları ilə hesablaşsın, ya da onunla vidalaşsın. Məncə, biz bu ittifaqdan çıxmalıyıq. Təhdidlər üzərində ittifaq qurmaq olmaz. Bizim bu təşkilatdakı 2 illik üzvlüyümüz İrəvana 800 milyon dollara başa gəlib. Biz Aİİ-nin üzvü olmaqla səhv addım atdıq. İrəvan Avrasiya İttifaqında 200 milyon dollar qazandı, amma Avropada 21 milyard dollar itirdi".
Baqratyan kimi digər tanınmış şəxslər də Aİİ-dən çıxmaqla bağlı çağırışlar edir. Ümumilikdə, bu çağırışlar Rusiya-Ermənistan münasibətlərinə necə təsir edəcək?
Məsələyə münasibət bildirən VİP-in sədr müavini Ramil Hüseynovun sözlərinə görə, Aİİ-dən çıxmaqla bağlı çağırışların miqyası genişlənəcəksə, şübhəsiz, bu, iki ölkə münasibətlərini pisləşdirə bilər: "Bu baxır proseslərin hansı həddə qədər inkişaf etməsinə. Qərbpərəst qüvvələr parlamentdə üstünlük əldə edə bilsələr və onlara ciddi ictimai dəstək olsa, o zaman məsələyə yenidən baxılacaq. Bu da, öz növbəsində, Rusiya-Ermənistan münasibətlərini pisləşdirəcək. Ancaq Ermənistanın sabiq prezidenti Robert Köçəryan bu günlərdə bildirdi ki, aprelin 2-də seçki yox, pul kisələrinin yarışı olacaq. Bu o deməkdir ki, Serj Sarkisyan rəhbərlik etdiyi Respublikaçılar Partiyasını saxta yolla parlamentdə otuzduracaq. Daha sonra baş nazir olacaq və əvvəlki kimi Rusiyanın yedəyində hərəkət edəcək. Nəzərə almaq lazımdır ki, Rusiya hazırkı komandanı 1998-ci ildə Ermənistanda hakimiyyətə gətirdi. Ermənistanın Aİİ-dən ziyan görəcəyi məlum idi. Ona görə ki, işğalçı ölkə Rusiya ilə birbaşa həmsərhəd deyil. Həmçinin, açıq dənizə çıxışı yoxdur. Belə olan halda, əlbəttə ki, Ermənistanın bu ittifaqdan fayda götürəcəyi real görünmür. Nə qədər ki, Ermənistanda Rusiya hərbi bazası var, təşəbbüs Moskvapərəst elitanın əlindədir, bu ölkə Aİİ-dən çıxmayacaq".
Vidadi ORDAHALLI