Yeganə Hacıyeva: "Bunun qarşılıqlı fayda daşıyacağına əminəm"
Martın 9-da Müdafiə Nazirliyinin Beynəlxalq Hərbi Əməkdaşlıq İdarəsində Azərbaycan Respublikası və Böyük Britaniya müdafiə nazirlikləri arasında qərargah danışıqları keçirilib. Tədbirdə iki ölkə arasında müdafiə sahəsində əməkdaşlığın cari vəziyyəti, perspektiv istiqamətləri nəzərdən keçirilib, təlim, təhsil, sülhməramlı əməliyyatlar üzrə əməkdaşlıq, eləcə də regional təhlükəsizlik məsələləri müzakirə olunub.
Danışıqların yekunu olaraq "Azərbaycan Respublikasının Müdafiə Nazirliyi və Birləşmiş Krallığın Müdafiə Nazirliyi arasında 2017/2018-ci maliyyə ili üçün hərbi əməkdaşlıq Planı" imzalanıb.
"Azərbaycanın NATO-nun Əfqanıstanda keçirdiyi missiyada iştirakını yüksək qiymətləndiririk. Böyük Britaniya Azərbaycanla hərbi əlaqələrin daha da möhkəmləndirilməsində maraqlıdır". Böyük Britaniya və Şimali İrlandiya Birləşmiş Krallığı Müdafiə Nazirliyinin beynəlxalq siyasət üzrə direktoru Nick Gurr (Nik Qurr) müdafiə naziri Zakir Həsənovla görüşündə belə deyib. Bu haqda Müdafiə Nazirliyinin press-relizində bildirilir. Məlumatda qeyd edilir ki, Nick Gurr Böyük Britaniyanın Azərbaycanın ərazi bütövlüyünü və suverenliyini tanıdığını vurğulayıb. Dağlıq Qarabağ münaqişəsinin beynəlxalq hüquq normaları və prinsipləri çərçivəsində həllinin tərəfdarı olduğunu söyləyib.
Z.Həsənov qonağa regiondakı hazırkı vəziyyət barədə məlumat verib. O vurğulayıb ki, Ermənistanın Dağlıq Qarabağ münaqişəsinin nizamlanması ilə bağlı danışıqlarda tutduğu qeyri-konstruktiv mövqeyi beynəlxalq və regional təhlükəsizliyə ciddi təhdid yaradır.
Görüşdə hərbi, hərbi-texniki sahədə əməkdaşlığın perspektivləri, regional, dəniz, enerji resurslarının təhlükəsizliyi, terrorizmlə birgə mübarizə məsələləri də diqqət mərkəzində olub.
Bu görüşün əhəmiyyəti barədə ekspertlər nə düşünür?
Politoloq Yeganə Hacıyeva qəzetimizə bildirdi ki, Azərbaycan öz xarici siyasət kursunda çoxvektorlu xəttə önəm verir: "Bu o deməkdir ki, biz bütün güc mərkəzləri və ölkələrlə balanslı siyasət yürüdürük. Böyük Britaniya dünyanın qüdrətli, söz sahibi olan ölkələrindəndir. Buna görə də həmin ölkə ilə əməkdaşlıq bizim üçün önəmlidir. Azərbaycanın deyilən ölkə ilə sıx münasibətləri mövcuddur. Bu bütün sahələri əhatə edir. Hərbi sahədə əməkdaşlığın daha da genişlənməsi çox önəmlidir. Ordu rəhbərliyi arasında aparılan qarşılıqlı fikir mübadiləsi, perspektiv imkanların müzakirəsi önəmlidir. Azərbaycan müharibə şəraitində yaşadığı üçün, müxtəlif ölkələrin ordularına aid təcrübələrdən yararlanmalıdır. Bu da təbiidir. Eyni zamanda, biz Böyük Britaniyanın da təmsil olunduğu antiterror koalisiyasında yaxından iştirak etmişik ki, bunu da gələn qonaqlar fəxrlə vurğulayıb. Növbəti il üçün ordularımız arasında əməkdaşlıq planının hazırlanması olduqca sevindiricidir. Təbii ki, hərbi sahəni əhatə etdiyi üçün, əməkdaşlığın nədən ibarət olması detalları açıqlanmır. Amma, istənilən halda, bunun qarşılıqlı fayda daşıyacağına əminəm".
Məhəmmədəli QƏRİBLİ