Günel Fərhadqızı: "Bu müddət ərzində Azərbaycan bir çox iqtisadi layihələrin reallaşmasında lokomotiv rolunu oynayıb"
İlqar Vəlizadə: "Cənubi Qafqazda bu təşkilatın yeganə üzvü Azərbaycandır"
Azərbaycan 2006-cı və 2012-ci illərdə İqtisadi Əməkdaşlıq Təşkilatının iki zirvə görüşünə ev sahibliyi edib. İqtisadi Əməkdaşlıq Təşkilatının 2012-ci ildə Bakıda keçirilmiş sonuncu zirvə görüşündə ölkəmiz sədrliyi öz üzərinə götürüb.
Bu mötəbər quruma rəhbərlik dönəmində Azərbaycan qurumun fəaliyyətinə hansı töhfələr verib?
İqtisadçı Günel Fərhadqızı qəzetimizə bildirdi ki, Azərbaycan təşkilata sədrliyi dövründə onun inkişafına və regional əməkdaşlığın dərinləşdirilməsinə böyük töhfə verib: "İqtisadi Əməkdaşlıq Təşkilatına üzv olan bütün dövlətlərlə gözəl münasibətə malik olduğundan, Azərbaycan tərəfdaşları ilə istər ikitərəfli, istərsə də çoxtərəfli müstəvidə iqtisadi əlaqələrini möhkəmləndirib. Biz İqtisadi Əməkdaşlıq Təşkilatındakı fəaliyyətimizdə müxtəlif sivilizasiyaları və mədəniyyətləri birləşdirməklə bağlı səylərimizi əsirgəməmişik. Bu müddət ərzində Azərbaycan bir çox iqtisadi layihələrin reallaşmasında lokomotiv rolunu oynayıb. Qəzvin-Rəşt-Astara dəmir yolu layihəsi üzrə işlər aparılır.
İƏT-in birinci yüksək səviyyəli işçi qrupunun iclasını təşkil etmişik. Azərbaycan İƏT-in digər dövlətlərinə əlavə əməkdaşlıq imkanları yaradan layihələrin reallaşmasına can atıb.
Biz, həmçinin, 2013-cü və 2014-cü illərdə enerji, regional inteqrasiya və sosial-iqtisadi inkişaf üzrə birinci və ikinci beynəlxalq konfransların təşəbbüskarı olmuşuq. 2013-cü və 2014-cü illərdə biz iqtisadiyyat üzrə ixtisaslaşan elm adamlarının bir araya gələrək iqtisadi inkişaf və əməkdaşlıq məsələlərini müzakirə etməsi məqsədilə İƏT-ə üzv dövlətlərin iqtisadi beyin mərkəzlərinin birinci və ikinci Bakı forumlarını təşkil etmişik. Bir sözlə, 2012-ci ildən etibarən İƏT-in sədri qismində Azərbaycan qurumun möhkəmləndirilməsi və inkişafında böyük uğurlara imza atıb".
Politoloq İlqar Vəlizadə isə hesab edir ki, Azərbaycanın bu təşkilata üzv olması təsadüfi deyil və rəhbərliyi dövründə böyük işlər görüb: "Azərbaycan, ümumiyyətlə, bütün regional əməkdaşlıq təşkilatlarında iştirak edir. Bunun əsas səbəbi regionda iqtisadi sahədə baş verən proseslərdə səmərəli iştirak etmək və öz töfhəsini verməkdən ibarətdir. Beləliklə, bu, bölgəmizdə gedən iqtisadi-siyasi proseslərdə fəal iştirak etməklə, bu proseslərə müəyyən təsir etmək məqsədini daşıyır. İƏT çərçivəsində gedən proseslər bizim üçün maraqlıdır. Biz 1985-ci ildə yaranan bu təşkilata 1992-ci ildə qoşulmuşuq. Cənubi Qafqazda bu təşkilatın yeganə üzvü Azərbaycandır və əlbəttə ki, Azərbaycan burada aparıcı rollardan birini oynayır. Biz digər təşkilat üzvləri ilə layihələr həyata keçirməkdə maraqlıyıq və çalışırıq ki, təkcə nəqliyyatla bağlı deyil, investisiya, turizm və yüksək texnologiyalarla bağlı layihələr olsun. Bu həm Azərbaycana, həm də Azərbaycanla əməkdaşlıq edən ölkələrə kifayət qədər mənfəət gətirəcək" .
Məhəmmədəli QƏRİBLİ