"Sübut olunur ki, onun idarəçiliyi dönəmində siyasi opponentlərlə silah gücü ilə danışılıb"
Ermənistanda parlament seçkiləri yaxınlaşdıqca, siyasi dairələr arasında mübarizə gərginləşir. Erməni Milli Konqresi seçiciləri səslərini satmamağa çağırıb. Bu da parlamentin iclasında davaya səbəb olub.
"Yelk" blokunun üzvü Nikol Paşinyan Ermənistanda apreldə keçiriləcək parlament seçkilərinin indidən saxtalaşdırıldığını deyir. O bildirib ki, polisə sorğu göndərilib və yanvarın 1-dən fevralın 1-dək 7 mindən çox vətəndaşın öz qeydiyyat yerini dəyişdiyi məlum olub. Onlar hakimiyyətin istədiyi seçki dairələrində qeydiyyata salınır. Hakim Respublika Partiyasının deputatı Xosrov Arutunyan isə N.Poşinyanı tənqid edib və onları təxribatda gühanlandırıb. Beləliklə, ara qarışıb və deputatlar bir-birini təhqir edib.
2008-ci ilin 1 mart hadisələrinin müzakirəsi də parlamentin gündəliyindən çıxarılıb. Bu da müxalif partiyaların etirazı ilə qarşılanıb.
Ermənistan Milli Konqresi qərargahının bununla bağlı yaydığı bəyanatda bildirilir ki, 2008-ci ilin 1 mart iğtişaşları hələ də doğru-düzgün araşdırılmayıb. Həmin vaxt fevralın 19-da prezident seçkilərinin saxtalaşdırılmasına fasiləsiz olaraq on gün etiraz edən nümayişçilərlə hökumət qüvvələri arasında qarşıdurmada 10 nəfər öldürülüb, yüzlərlə insan yaralanıb. Bundan sonra ölkədə iyirmi günlük fövqəladə vəziyyət elan edilib. Hakimiyyətə loyal olmayan KİV-in fəaliyyəti dayandırılıb.
Seçki marafonunun əsas favoriti olan müxalifət namizədi Levon Ter-Petrosyan 2008-ci il seçkilərinin nəticələrini indiyədək tanımayıb. Onun təşkilatçılığı ilə paytaxtda 21 gün fasiləsiz etiraz aksiyaları keçirilib. Bəyanatda deyilir ki, qanlı 1 mart Ermənistanın tarixində rüsvayçı hadisədir. Eyni zamanda, oktyabrın 27-də parlamentə hücumdan sonra erməninin ermənini gülləbaran elədiyi ikinci böyük hadisədir. Xalqın qanını tökərək hakimiyyətə gələn Serj Sarkisyan rejimi bu illər ərzində Ermənistanı ancaq uçuruma aparıb. Əhali səfalət içindədir. Ölkə iqtisadiyyatı isə tamamilə iflasa uğrayıb. Ermənistan regionda təcrid vəziyyətinə düşüb.
Çox maraqlıdır ki, Ermənistanın daxilində baş qaldıran bu narazılıq Sarkisyanın Avropada "Karnegi" cəmiyyətindəki etdiyi çıxışla eyni vaxta təsadüf edir. Xatırladaq ki, həmin çıxışında Sarkisyan Ermənistanda olan "yüksək demokratik dəyərlər"dən bəhs edərək, avropalıları aldatmağa cəhd edib. Onun çıxışının məğzi məhz indiyə qədər keçirilən və qarşıdakı seçkilərlə bağlı olub.
Ermənistanda açıqlanan faktlar Sarkisyanın tam ifşası anlamına gələ bilərmi?
Siyasətçi Ramiz Tağıyev qəzetimizə açıqlamasında bildirdi ki, Sarkisyanın demokratiyadan danışması tam absurddur: "Bu adam hərbi cinayətkardır. Hakimiyyətə də həmin cinayətlərin dalğasında gəlib. Bunu Avropa bizdən gözəl bilir. Günah Sarkisyana o tribunanı verənlərdədir. Avropanın nüfuzlu fondları belə cinayətkarlara ağuş açmaqla öz reputasiyalarını ciddi şəkildə zədələmiş olur. Təəssüf edirəm ki, həmin fonddakılar Sarkisyanın yalanlarının qarşısına arqument qoymayıb. İrəvandakı siyasi qüvvələrin bəyanatından, əslində, Sarkisyanı Avropada yuxarı başa keçirənlər utanmalıdır.
Sübut olunur ki, onun idarəçiliyi dönəmində siyasi opponentlərlə silah gücü ilə danışılıb. Etirazçıların arasında ölənlərin sayı 10-larladır. Bütün bu faktlar Sarkisyanın növbəti fırıldağını ifşa etdi. İfşa edən mənbə isə özləridir. Bu cür faktlardan beynəlxalq qurumlar ciddi nəticə çıxararaq ikili standartlara son qoymalıdır".
Məhəmmədəli QƏRİBLİ