İlham Şaban: "Sözügedən maliyyə qurumlarından əldə olunan kreditlər Azərbaycan üçün hazırkı şəraitdə əlverişlidir"
"Biz Avropa Yenidənqurma və İnkişaf Bankından, Avropa İnvestisiya Bankından maliyyə vəsaitinin ayrılmasını gözləyirik". Bunu Prezident İlham Əliyev Münhen Təhlükəsizlik Konfransı çərçivəsində "Qiymətlərin sabitləşməsinə doğru? OPEC-in qayıdışı və neft geosiyasəti" mövzusunda Dəyirmi Masada deyib.
Dövlət başçısı nəzərə çatdırıb ki, Azərbaycan "Cənub Qaz Dəhlizi" layihəsinin bütün dörd seqmentinin səhmdarıdır və Azərbaycan investor qismində də çıxış edir: "Biz Dünya Bankından, beynəlxalq maliyyə təşkilatlarından, Asiya İnkişaf Bankından, Asiya İnfrastruktur Bankından vəsaitləri cəlb etdik. Biz Avropa Yenidənqurma və İnkişaf Bankından, Avropa İnvestisiya Bankından maliyyə vəsaitinin ayrılmasını gözləyirik. Beləliklə, bu, ölkəmizin təşəbbüskarı olduğu həqiqətən də geniş maliyyə, infrastruktur, texniki, enerji layihəsidir və biz bununla qürur duyuruq. Əlbəttə, bu ölkələr arasında yeni əməkdaşlıq formatı regionda tamamilə yeni bir əməkdaşlıq ruhunu yaradır. Bu, birgə bağlılıq, yəqinlik, etibarlılıq və tərəfdaşlıq yaradır. Beləliklə, layihə tamamlandıqdan sonra Avropa üçün təbii qaz təchiz edən etibarlı və yeganə yeni qaz mənbəyi qismində Azərbaycanın rolu əlbəttə ki, artacaq və Avropa təşkilatları ilə əlaqələrimiz güclənəcək".
Bütövlükdə, sözügedən bankların "Cənub Qaz Dəhlizi" layihəsinin reallaşmasında fəal iştirak perspektivlərini necə dəyərləndirmək olar?
Məsələyə münasibət bildirən Neft Araşdırmaları Mərkəzinin rəhbəri İlham Şabanın sözlərinə görə, sözügedən banklarla ötən il bəzi anlaşmalar əldə olunub: "Ümumilikdə, layihənin həyata keçirilməsi üçün beynəlxalq maliyyə qurumlarından 1,2 milyard dollar kredit alınıb. Təqribən bu qədər də kreditin bu il alınacağı gözlənir. Bu məqsədlə verilən kreditlərin faiz dərəcələri aşağıdır. Başqa bir tərəfdən onların qaytarılması 2020-ci ildən başlanacaq. Kreditlərin bəziləri 20 il, digərləri 30 il müddətinə götürülüb. Ona görə də verilən kreditlərin şərtlərini əlverişli hesab etmək olar. Ən əsası isə, sözügedən maliyyə qurumlarından əldə olunan kreditlər Azərbaycan üçün hazırkı şəraitdə əlverişlidir. Neft gəlirlərinin azaldığı bir şəraitdə yaxşı oldu ki, əlverişli şərtlərlə kredit ala bilirik. "Cənub Qaz Dəhlizi" layihəsi işə düşəndən sonra əldə olunan gəlir hesabına götürülən kreditlər qaytarılacaq. Bunun nəticəsində Neft Fondunun üzərinə yük düşməyəcək. Hesab edirəm ki, AYİB və AİB "Cənub Qaz Dəhlizi" layihəsinə lazımi vəsait ayıracaq".
Vidadi ORDAHALLI
