Vüqar Qədirov: "Birmənalı surətdə demək olar ki, əhali oranı dözümsüz yaşayış şəraitindən tərk edir"
Ermənistan və qondarma rejim olan "DQR"də əhali acınacaqlı şərait ucbatından daimi yaşayış yerlərini tərk edir. Xüsusilə də Dağlıq Qarabağın işğal altında saxlanan ərazilərində bu sarıdan acınacaqlı vəziyyət hökm sürür. Vəziyyətdən çıxış yolu tapmaq üçün qondarma rejim müxtəlif vədlər versə də, əhali onlara inanmır.
Bu günlərdə qondarma rejimin "baş nazir"i bəyan edib ki, cəbhə bölgəsinə yaxın ərazilərdən guya Azərbaycanın vəhşiliyi səbəbindən 7 min nəfər daimi yaşayış yerlərini tərk edib. Ermənilərin bu əraziləri tərk etməsinin əsl səbəbləri nədir?
Ekspert Vüqar Qədirov qəzetimizə açıqlamasında bildirdi ki, işğal altındakı ərazilərdə əhali doğrudan da dözülməz şəraitdə yaşayır: "Ermənistanın özündə vəziyyət ürəkaçan deyil. Dağlıq Qarabağda müxtəlif vədlərlə əhalini saxlamağa cəhd edirlər, lakin dözülməz şərait onları həmin əraziləri tərk etməyə vadar edir. Hətta erməni rəsmilərinin verdiyi şirnikləndirici vədlər belə onları həmin yerlərə qaytarmaq gücündə deyil. Məlumat yayıldı ki, işğal altındakı Ağdərə rayonunun bu ilin aprelində faktiki olaraq Azərbaycan ordusunun nəzarətinə keçən, ermənilərin məskunlaşdığı Talış kəndindən qaçan ailələrin bir hissəsinə Ağdərənin Alaşan kəndində 20 yeni ev ayrılıb. Bundan əvvəl Ermənistan hakimiyyəti Talış kəndindən qaçan erməni ailələrinin geri qaytarılmasına çalışıb. Lakin Talış erməniləri bundan imtina edir.
Dağlıq Qarabağın "təhlükəsizlik şurasının katibi", general Vitali Balasanyan isə erməniləri kəndə qayıtmağa dəvət edərək deyib ki, Talış kəndinin statusu dəyişdirilərək rayona çevriləcək. Bu cür şirnikləndirici vədlər də effekt verməyib. Ardınca qondarma rejimin "baş nazir"i bütün məsuliyyəti Azərbaycanın üstünə atmaq istəyib, amma bu da yerli əhaliyə inandırıcı görünmür. Birmənalı surətdə demək olar ki, əhali oranı dözümsüz yaşayış şəraitindən tərk edir".
Məhəmmədəli QƏRİBLİ