Qulu İsmayılov: "ABŞ-ın bu layihəyə dəstəyini dayandırmaq üçün heç bir səbəbi yoxdur"
"Cənub Qaz Dəhlizi" layihəsinə siyasi dəstəyin nümayiş etdirilməsi üçün bu layihə üzrə Məşvərət Şurasının 3-cü iclasında ABŞ-ın yüksək səviyyədə təmsil olunması vacibdir. Bu sözləri energetika naziri Natiq Əliyev ABŞ Dövlət Departamentinin Enerji Ehtiyatları Bürosunun Enerji Diplomatiyası ofisinin direktoru Uilyam Silkvortla görüşü zamanı deyib. N.Əliyev hansı çətinlikləri nəzərdə tutaraq, ABŞ-ın dəstəyinin vacibliyini vurğulayıb?
İqtisadçı Qulu İsmayılov qəzetimizə açıqlamasında bildirdi ki, ABŞ-la Azərbaycan rəhbərliyi arasında aparılmış danışıqlar zamanı dəfələrlə təhlükəsizlik, iqtisadiyyat və enerji sahələrində əməkdaşlıq məsələləri müzakirə olunub:
"Enerji sahəsində əməkdaşlığa gəlincə, "Cənub Qaz Dəhlizi" təkcə Azərbaycan deyil, həmçinin, eyni enerji mənbəyindən çox asılı olan bütün Avropa ölkələri üçün vacibdir. Bu, ABŞ, Azərbaycan və Avropanın birgə layihəsidir. ABŞ-ın "Cənub Qaz Dəhlizi" layihəsinə dəstəyi dayandırması üçün heç bir səbəbi yoxdur. ABŞ-ın yeni seçilmiş prezidenti Donald Tramp, böyük ehtimalla, ölkənin xarici siyasətini dəyişməyəcək. Donald Trampın Cənubi Qafqazla bağlı siyasətinin necə olacağını bilmək çətindir. O bu barədə heç bir açıqlama verməyib və ümumiyyətlə onun xarici siyasət barədə açıqlamaları ziddiyyətlidir. Digər tərəfdən, "Cənub Qaz Dəhlizi" layihəsi kifayət qədər irəliləyib, qaz satışları ilə bağlı müqavilələr imzalanıb, tikinti işləri davam edir. Fikrimcə, ABŞ-ın bu layihəyə dəstəyini dayandırmaq üçün heç bir səbəbi yoxdur. Baxmayaraq ki, Trampın xarici siyasətlə bağlı verdiyi tək açıqlama bu layihəni dəstəkləməyən Rusiya ilə münasibətlərin normallaşması barədə olub. Ola bilər ki, müəyyən narahatlıq bu məqamla bağlı olub".
Məhəmmədəli QƏRİBLİ
