Qabil Hüseynli: "Ölkəmiz barədə həqiqətləri ətraflı şəkildə onların nəzərinə çatdırmaq həm də Azərbaycanın təbliğatı üçün önəmli rol oynayır"
Bakıda keçirilən Beynəlxalq Humanitar Forumda Prezident İlham Əliyev çıxış edib. Prezident bildirib ki, Forum beynəlxalq aləmdə böyük hörmət qazanıb.
Dövlət başçısı qeyd edib ki, Azərbaycan beynəlxalq humanitar əməkdaşlığa hər zaman böyük önəm verir: "Humanitar əməkdaşlıq ölkələr arasında əlaqələrdə böyük rol oynayır. Azərbaycanda 2 ildən bir Mədəniyyətlərarası Dialoq Forumu keçirilir. Bir neçə il əvvəl Bakıda dünya dinlərinin liderlərinin görüşü və digər beynəlxalq tədbirlər keçirilib. Azərbaycan həm də mötəbər idman yarışlarında əməkdaşlıq edir. Bu il Bakıda "Formula-1" və Şahmat Olimpiadası, ötən il isə İlk Avropa Oyunları keçirilib. İlk Avropa Oyunları müsəlman ölkəsi Azərbaycanda baş tutub. Bu, dinlərarası dialoqa töhfə sayıla bilər. Gələn il isə Bakıda İslam Həmrəylik Oyunları keçiriləcək. Azərbaycan bu yolla gedir".
Prezident çıxışında ermənilərin işğal edilmiş Azərbaycan ərazilərində törətdiyi əməlləri də Forum iştirakçılarının nəzərinə çatdırıb. Xatırladıb ki, BMT Təhlükəsizlik Şurasının qəbul etdiyi 4 qətnamədə erməni silahlı qüvvələrinin işğal olunmuş torpaqlardan çıxarılması tələb olunur. Ermənistan isə buna məhəl qoymur. "Bu böyük ədalətsizlikdir. Qətnamələrin icra mexanizmi yoxdur. Bəzən BMT qətnamələri saatlar, günlər ərzində icra edilir, işğalçı cəzalandırılır. Bizə gələndə bu qətnamələr 20 ildir icra edilmir" - dövlət başçısı deyib.
İlham Əliyev vurğulayıb ki, işğal amilinə baxmayaraq, Azərbaycan müstəqil dövlət kimi güclənir. Prezident deyib ki, son 13 il ərzində Azərbaycanda 3 mindən çox məktəb, 600-dən çox xəstəxana tikilib. Məcburi köçkünlər üçün 90-dan çox qəsəbə salınıb, 250 mindən çox məcburi köçkünə yeni evlər verilib. Azərbaycanın böyük valyuta ehtiyatları var, işsizliyin, yoxsulluğun azaldılması üçün ciddi addımlar atılıb. Azərbaycanda yoxsulluq və işsizlik 5 faiz həcmindədir.
"Biz fəxr edirik ki, 25 ildir müstəqil yaşayırıq. Taleyimiz öz əlimizdədir, heç kimdən asılı deyilik. Gözəl ölkə qurmuşuq, bundan da gözəl olacaq" - İlham Əliyev nitqində deyib.
İlham Əliyevin Azərbaycan haqda dedikləri ölkəmizin təqdimatı və təbliğatı baxımından nə deməkdir?
Politoloq Qabil Hüseynlinin sözlərinə görə, Prezidentin Forumun açılışında geniş nitqlə çıxış etməsi iştirakçılar tərəfindən böyük maraqla qarşılanıb: "Azərbaycan Prezidenti İlham Əliyev V Bakı Beynəlxalq Humanitar Forumundakı çıxışında dünyanı düşündürən məsələlərə toxundu və belə bir çıxışa həqiqətən böyük ehtiyac duyulurdu. Prezidentin çıxışında islam dünyasının problemləri, müsəlman aləminin məruz qaldığı müharibələr, insanların öz yurd-yuvalarından qaçqın düşməsi və digər bu kimi aktual problemlər bütün dəqiqliyi ilə əksini tapdı. Bununla yanaşı, ölkə başçısı Azərbaycan barədə, xüsusilə də Dağlıq Qarabağ probleminin mahiyyəti və rastlaşdığımız ikili standartlar haqqında tədbir iştirakçılarına ətraflı məlumat verdi. Prezident diqqəti Azərbaycanın inkişafına da yönəltdi. O, tədbirdə iştirak edənlərin nəzərinə çatdırdı ki, ölkəmiz müharibə şəraitində yaşamasına baxmayaraq, inkişaf edir. Prezident iqtisadi cəhətdən əldə etdiyimiz uğurlar barədə rəqəmlərlə müfəssəl məlumat verdi. Ev sahibliyi etdiyimiz Forum geniş və sanballı auditoriyanı əhatə edir. Bu baxımdan da ölkəmiz barədə həqiqətləri ətraflı şəkildə onların nəzərinə çatdırmaq həm də Azərbaycanın təbliğatı üçün önəmli rol oynayır".
Məhəmmədəli QƏRİBLİ