Şimal qonşumuzun hərb sənayesi dünyanın müxtəlif regionlarında getdikcə daha böyük təhdid mənbəyinə çevrilir. Moskva, belə görünür ki, hərb sənayesinin məhsullarından istifadə etməklə müxtəlif bölgələrdə, məsələn, elə Qafqazda gərgin vəziyyətin qalmasında maraqlıdır.
Hər halda, Ermənistana verilən "İsgəndər" raketləri bunun təsdiqidir. Düzdür, iddialar da səslənir ki, Ermənistanda hərbi paradda nümayiş olunan "İsgəndər-M" Rusiyanın Gümrüdəki 102-ci hərbi bazasından gətirilib. Rusiyalı hərbi ekspert Aleksandr Xramçixin də "İsgəndər" raketlərinin Ermənistana məxsus olmadığını bildirib. Həmçinin, Karen Karapetyan adlı erməni ekspert bu oyunun Ermənistan rəhbərliyi tərəfindən aprel döyüşlərindən sonra mənəvi-psixoloji cəhətdən sarsılmış erməni xalqını sakitləşdirmək və antirusiya fikirlərindən yayındırmaq üçün qurulduğunu deyib.
Ermənistan müdafiə nazirinin müavini David Tonoyan isə bildirib ki, Rusiya bu raketləri Ermənistana verərkən raketlər haqda heç bir beynəlxalq öhdəliyi və razılaşmanı pozmayıb. Xatırladaq ki, rəsmi Bakı hələlik Ermənistanın Rusiyadan "İsgəndər" raketləri almasını şərh etməyib. Amma müdafiə naziri, general-polkovnik Zakir Həsənovun təsdiq etdiyi döyüş hazırlığı planına əsasən, Raket və Artilleriya Qoşunlarının hərbi hissə və birləşmələri döyüş atışlı təlimlər keçirib.
Müdafiə Nazirliyinin məlumatına əsasən, aprel ayında əldə edilmiş döyüş təcrübəsi nəzərə alınmaqla səhra şəraitində keçirilən artilleriya təlimlərində bölmələrin qarşılıqlı əlaqədə fəaliyyəti, atəşin idarə olunması və müxtəlif şəraitli atəş mövqelərindən tapşırıqlar yerinə yetirilib. Optik və radiotexniki kəşfiyyat vasitələri, pilotsuz uçan aparatlar, eləcə də xüsusi təyinatlıların artilleriya kəşfiyyatı icra edilməklə şərti düşmənin döyüş düzülüşünün bütün dərinliyində örtülü və açıq mövqelərdəki tək və qrup halında, o cümlədən hərəkətdə olan hədəflər məhv edilib. Təlimə cəlb olunan müxtəlif raket sistemləri və artilleriya qurğuları heyətlərinin döyüş hazırlığı, bacarığı və qarşılıqlı fəaliyyəti Müdafiə Nazirliyinin rəhbərliyi tərəfindən yüksək qiymətləndirilib. Bu da o deməkdir ki, ermənilər hətta məlum raketləri alsalar belə, vəziyyət dəyişmir. Sadəcə problem odur ki, Moskva ermənilərlə bağlı belə addıma gedərsə, bu onun Qafqazda vəziyyəti gərginləşdirmək istəməsinin göstəricisi olacaq. Amma Kremlin silah siyasəti təkcə Qafqazda yox, daha böyük məkanda təhdid yaradır.
Hətta indi Qərb ölkələri də Rusiyanın hərbi gücə arxalanan siyasətindən ciddi narahatlıq duyur. İş o yerə çatıb ki, ABŞ Silahlı Qüvvələrinin qərargah rəislərinin Birləşmiş komitəsinin rəhbəri Cozef Danford Rusiyanın təcavüzkar hərəkətlərini ölkənin milli maraqları üçün ən böyük potensial təhlükə adlandırıb: "Rusiya prezidenti Vladimir Putinin Ukrayna, Krım, Gürcüstandakı hərəkətlərinə baxdıqda, bu mənə deməyə əsas verir ki, Rusiyanın davranışları və mühüm qaynar nöqtələrdə silahlanma həcmi onları bizim üçün əsas çağırışa və ABŞ-ın milli maraqları üçün ən böyük potensial təhlükəyə çevirir". ABŞ Hərbi Hava Qüvvələrinin generalı, prezident Barak Obama tərəfindən namizədliyi Birləşmiş Ştatların Strateji Komandanlığının rəhbəri postuna irəli sürülmüş Con Hayten ölkə üçün əsas təhdidlərin Rusiyadan gəldiyini açıqlayıb. General Senatda onun namizədliyinin müzakirəsi zamanı ABŞ üçün ən böyük təhlükənin Rusiya və Çin olduğunu deyib. Namizədliyinin təsdiqlənməsindən sonra general Hayten ABŞ-ın nüvə və kosmik qüvvələrinə, eləcə də kütləvi qırğın silahları ilə mübarizəyə cavabdeh olacaq. Xatırladaq ki, bundan əvvəl ABŞ-ın müdafiə naziri Eşton Karter Rusiyanın dünya düzənini pozmağa çalışdığını və qlobal təhlükəsizlik üçün əsas təhdid olduğunu elan edib.
Bu arada "Taktiki raket silahlanması" korporasiyasının (KTRV) baş direktoru Boris Obnosov "Kommersant" nəşrinə müsahibəsində maraqlı bir iddia ilə çıxış edib ki, Rusiya tezliklə nüvə silahının sahibi ola bilər. Onun sözlərinə görə, bu cür raketlərin yaradılması hava hücumundan müdafiə sistemlərini əhəmiyyətli dərəcədə zəiflədəcək.
Daha əvvəl Danimarkaranın "Jyllands-Posten" nəşri yazıb ki, Rusiyanın yeni supersilahı güc balansını pozacaq. Bu silahlar silah sənayesinin son yeniliyidir. Yeni hipersəsli raketlərin sürəti səsin sürətindən 12 dəfə çox olacaq, yəni sürət saatda 15 min kilometr təşkil edəcək. Hipersəsli nüvə raketləri raket əleyhinə bütün müasir müdafiə sistemlərini dağıdacaq. Müdafiə sistemləri raketə sadəcə olaraq reaksiya verə bilməyəcək. Danimarka Hərbi Akademiyasının hərbi hava əməliyyatları bölməsinin başçısı Karsten Marrup "Jyllands-Posten" nəşrinin əməkdaşı ilə söhbətində deyib: "Hipersəsli raketlər Yer kürəsinin istənilən nöqtəsində istənilən hədəfi çox tez müddətdə vurmağa qadirdir. Raket əleyhinə müdafiə sistemləri müdafiə olunmaq üçün sadəcə vaxt tapmayacaq". Onun sözlərinə görə, bu raketlər dünyada ən müasir müdafiə sisteminə malik ABŞ üçün də ekstremal çağırış olacaq: "Amerikalıların bugünkü raket əleyhinə müdafiə sistemi qitələrarası ballistik raketlərlə mübarizəyə hesablanıb. Mən əmin deyiləm ki, bu sistem hipersəsli raketə qarşı dura biləcək". Onun sözlərinə görə, hipersəsli silahı birinci kimin əldə etməsi iki super dövlətin münasibətlərinə də təsir göstərəcək: "Ruslar hipersəsli raketləri hazırlasa, dünyada güc balansında aşkar dəyişiklik olacaq və balans rusların xeyrinə olacaq. Amma ilk olaraq amerikalılar silahlanmaya hipersəsli bombardmançısını qəbul etsələr, o halda balans ABŞ-ın xeyrinə olacaq".
Nahid SALAYEV