Vüqar Qədirov: "Azərbaycanda legitim hakimiyyət mövcuddur, xalq hər zaman Prezidentini və dövlətini dəstəkləyir"
Bu gün Azərbaycanın regionda lider dövlətə çevrilməsi, mühüm, əhəmiyyətli layihələrin iştirakçısı və təşəbbüsçüsü qismində çıxış etməsi hər kəs tərəfindən təsdiqlənir, qəbul edilir.
Müxtəlif nüfuzlu beynəlxalq qurumlar, ayrı-ayrı dövlət və hökumət başçıları, ekspertlər Azərbaycanın müstəqillik illərində güclü dövlət və vətəndaş cəmiyyəti quruculuğu sahəsində əldə etdiyi böyük uğurları, hazırkı dövrdə dinamik inkişafını xüsusi vurğulayır. Azərbaycanın davamlı inkişafı, onun beynəlxalq nüfuzunun yüksəlməsi, ölkədə təhlükəsizlik və sabitlik bəzi dairələri ciddi narahat edir. Artıq təsdiqini tapıb ki, ABŞ və Qərbin anti-Azərbaycan dairələri hər dəfə ölkəmiz üçün mühüm əhəmiyyət kəsb edən hadisələr ərəfəsində fəallaşır, demokratiya adı altında müxtəlif QHT şəbəkəsi və media vasitəsilə ölkəmizə qarşı çirkin kampaniya təşkil edir.
Çox təəssüflər olsun ki, həmin "beyin mərkəzləri" Azərbaycanı hədəf seçir. Onlar Azərbaycanda olmayan və baş verməyən hadisələri ssenariləşdirib ictimai fikri manipulyasiya etmək məqsədilə dövriyyəyə buraxır.
Amma başa düşmürlər ki, "yalan ayaq tutar, amma yeriməz".
Uğurla keçirilən referendum ərəfəsində də belə hadisələr baş verdi. BMT-nin xüsusi məruzəçisinin hesabatı, Venesiya Komissiyasının hesabatı bu qəbildən diqqəti cəlb edir.
Ancaq nəticə ortadadır. Xalq referenduma gedərək öz gələcəyi üçün səs verdi. Bəzi beynəlxalq dairələrin apardığı antitəbliğatın referendumun nəticələrinə təsiri oldumu?
Referndumun təbliğat prosesində yaxından iştirak edən QHT rəhbəri Vüqar Qədirov qəzetimizə açıqlamasında bildirdi ki, belə hallarla ölkəmiz çox rastlaşıb: "Nə qədər ironik çıxsa da, deməliyəm ki, artıq belə çirkin kampaniyalara qarşı mübarizə aparmaqda təcrübə qazanmışıq. Referendum ərəfəsində belə halın olacağını gözləyirdik. Əlbəttə, biz həmin qüvvələrin öz eyiblərini açıb göstərməklə onlara "öz gözündəki tiri gör" deyirik. Bu dəfə də həmin dairələrin antiazərbaycançı təxribatları, çirkin oyunları, "qara-piar" kampaniyaları nəticə vermədi. Nəticə göz qabağındadır. Çünki Azərbaycanda legitim hakimiyyət mövcuddur, xalq hər zaman Prezidentini və dövlətini dəstəkləyir. Belə olan təqdirdə heç bir təsir və təzyiq Azərbaycanı öz müstəqil yolundan döndərə bilməyəcək".
Məhəmmədəli QƏRİBLİ