Namiq Heydərli: "Təbiidir ki, xalqın bu seçimi dövlətin qüdrətli olmasını şərtləndirir"
Referendumdan öncə bəzi beynəlxalq dairələrin dəstəyilə ölkədəki müəyyən qüvvələr stabilliyi pozmağa cəhd etdi. Təşkil edilən bir sıra uğursuz mitinqlər bir daha sübut etdi ki, xalq pozuculuğa qarşıdır. Bunu referendumun nəticələri və seçki məntəqələrində seçicilərin bildirdiyi fikirlər bir daha sübut etdi.
Bu gün yaxın regionlarda baş verən hadisələr bir daha onu təsdiqləyir ki, imperialist qüvvələr müstəqil siyasət yürüdən milli dövlətləri dağıtmağa, kölə halına salmağa cəhdlər göstərir. Bunun üçün isə bütün imkanlardan istifadə edirlər. Bununla bağlı Bakının Sabunçu rayonundakı 311 nömrəli tam orta məktəbin yeni binasının açılış mərasimində çıxışı zamanı Azərbaycan Prezidenti İlham Əliyev bildirib ki, "Bizim işimizə qarışmaq istəyənlərin sayı da az deyil. Bu illər ərzində müxtəlif dövrlərdə bizim işimizə qarışmaq istəyənlər öz məqsədlərini güdürdülər. O məqsədlər bizim məqsədlərlə üst-üstə düşmür. Bizim məqsədimiz müstəqillikdir, azadlıqdır, xalqın firavanlığıdır. Bəzi xarici dairələrin məqsədi isə tam başqadır - bizə diktə etmək, Azərbaycanı alətə çevirmək, Azərbaycan xalqının iradəsini qırmaq və ondan sonra Azərbaycan kimi qüdrətli ölkədən öz məqsədləri üçün istifadə etməkdir".
Elə 26 sentyabr tarixində keçirilən referendum zamanı müşahidələr göstərdi ki, xalq "ölkədə stabillik" şüarı ilə hərəkət etdi.
Xalqın bu seçimi etməsi dövlətin güclü olmasını şərtləndirən amil sayıla bilərmi?
Politoloq Namiq Heydərli qəzetimizə açıqlamasında bildirdi ki, xalq hakimiyyətin və dövlətin əsas dayağı sayılır: "Aydındır ki, bütün təxribatların törədilməsi və ya ölkədə stabilliyin pozulmasına yönəlik addımlar xalq kütlələrini yanlış istiqamətə sapındırmağa hesablanır. Xüsusilə də seçkiöncəsi qanunvericilik çərçivəsində seçki prosesinə qatıla bilməyən "Milli Şura" və Müsavat Partiyasının bir sıra Qərb ölkələrinin səfirliklərinə təşrif buyurandan sonra mitinq keçirmək haqda qərar verməsi də bunu bir daha təsdiq etdi.
"Milli Şura"nın sədri Cəmil Həsənlinin Strasburqa səfəri, ABŞ Konqresində, Haaqada Azərbaycanla bağlı müzakirələrin təşkili də antiazərbaycançı qüvvələrin vəziyyəti gərginləşdirmək üçün yenidən hərəkətə keçdiyinin əyani sübutu idi. Lakin 11 və 17-18 sentyabr aksiyaları müxalifətin rüsvayçı məğlubiyyətini bir daha ortaya qoydu. Onların Konstitusiyamıza təklif edilən əlavə və dəyişikliklərlə əlaqədar keçirilən 26 sentyabr referendumu ilə bağlı yaydığı cəfəngiyyat dolu bəyanatları, mitinq-şouları da məhz stabilliyin pozulmasına, xalqı çaşdırmağa yönəlmişdi. Ancaq, göründüyü kimi, xalq inkişafı və stabilliyi seçdi. Təbiidir ki, xalqın bu seçimi dövlətin qüdrətli olmasını şərtləndirir. Çünki hakimiyyətin əsas dayağı xalqdır. Bununla bəzi çirkin niyyətli beynəlxalq dairələr gördü ki, Azərbaycan dövlətçiliyi xalqın dəstəyilə daha güclü və qüdrətlidir".
Məhəmmədəli QƏRİBLİ