"Azərbaycan hakimiyyəti bu məsələyə görə Rusiyaya sərt etiraz etməlidir ki, problem həllini tapsın"
Rusiyanın Ermənistana əvəzsiz silah bağışlaması Dağlıq Qarabağ münaqişəsinin yenidən qızışdırılması anlamına gələ bilər. Ancaq şimal qonşumuzdan fərqli olaraq, Azərbaycan rəhbərliyi Rusiya ilə həm ATƏT-in həmsədr ölkələrindən biri kimi, həm də qonşu dövlət kimi münasibətləri daim yaxşı saxlamağa çalışır.
Azərbaycan bu istiqamətdə daim addımlar atıb. Ölkəmiz, prinsipial olaraq, Qərb ölkələrinin Rusiyaya tətbiq etdiyi iqtisadi sanksiyaların əleyhinə çıxdı. Amma təəssüflər olsun ki, Rusiya Qarabağ probleminin həll olunmasında irəliləyişə nail olmaq əvəzinə, Ermənistanı silahlandırmaqda davam edir. Özü də silahı onlara bəxşiş olaraq verir.
Rusiya tərəfindən Ermənistana silahlar pulla verilsəydi, bu, Azərbaycanı o qədər də narahat etməzdi. Çünki hər bir ölkənin digər ölkədən müqavilə əsasında silah almaq hüququ var. Rusiya bizə silahlar satanda Ermənistanda bununla əlaqədar mitinqlər oldu, onların siyasətçiləri Rusiyanın əleyhinə çıxışlar etdi. Amma Rusiyanın hakim dairələri bildirdi ki, Azərbaycana silah müqavilə əsasında satılıb və bundan sonra da bu əməkdaşlıq davam edəcək. İndi isə silahları işğalçı ölkə olan Ermənistana bağışlaması Azərbaycanın onlarla münasibətdə atdığı addımların müqabilində doğru sayıla bilməz.
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, Rusiya bu məsələdə çox böyük yanlışlığa yol verib: "Təbiidir ki, Azərbaycan Rusiya ilə münasibətlərdə yaxın qonşuluq münasibətlərini daima qoruyub saxlayıb. Bunu sanksiyaların tətbiqi zamanı Azərbaycanın davranışına baxmaqla görmək olar. Təəssüflər olsun ki, bunun müqabilində Rusiya başqa addımlar atır. Ermənistana silahı satmır, peşkəş edir. Bu, terrorçuya verilən dəstək anlamına gəlir. Ermənistanın "Əl-Qaidə" ilə heç bir fərqi yoxdur. İşğalçı bir ölkəyə silah vermək onun əməllərinə şərik olmaq anlamına gəlir. Mənə elə gəlir ki, bu məsələyə görə Azərbaycan Rusiya ilə münasibətlərini yenidən nəzərdən keçirməlidir. Hələ 94-95-ci illərdə hazırda həyatda olmayan tanınmış rus generalı Lebed 92-ci ildə Ermənistana Rusiya tərəfindən bir milyardlıq silahın verildiyini açıqladı. Həmin vaxt verilən silah Ermənistanın fəallaşması və bunun da nəticəsində torpaqlarımızın işğal edilməsinə səbəb oldu. İndi də yəqin növbəti dəfə Ermənistanın könlünü alıb onları fəallaşdırmaq istəyirlər. Biz Rusiyanın Azərbaycandakı səfirliyinə öz etirazımızı bildirmişik. Hətta aldığımız məlumata görə, sentyabr ayında Rusiyada separatçı rejimlərin başçıları toplaşacaq. Dağlıq Qarabağın qondarma rəhbərinin təmsil olunacağı gözlənir. Səfirliyə bildirdik ki, bu baş tutsa, birbaşa Rusiya əleyhinə aksiyalar keçirəcəyik. Azərbaycan hakimiyyəti bu məsələyə görə Rusiyaya sərt etiraz etməlidir ki, problem həllini tapsın".
Məhəmmədəli QƏRİBLİ