Aydın Mirzəzadə: "Referendumda bütün təklifləri cəmiyyət bəyəndi"
Azərbaycan daha bir mühüm siyasi hadisəni arxada qoydu. Məlum olduğu kimi, sentyabrın 26-da ölkədə Konstitusiyanın 29 maddəsinə əlavə və dəyişikliklər etmək məqsədilə ümumxalq səsverməsi (referendum) keçirildi. Referendumda iştirak edənlərin əksəriyyəti Konstitusiya islahatlarının lehinə səs verib.
Bir müsbət məqam da ondan ibarətdir ki, səsvermə prosesini izləyən istər yerli, istərsə də beynəlxalq müşahidəçilər referendumun nəticələrini yüksək qiymətləndirib, səsvermə prosesinin azad və ədalətli keçdiyini vurğulayıb.
Bununla yanaşı, Azərbaycan Konstitusiyasına dəyişikliklərlə bağlı keçirilən ümumxalq səsverməsinin (referendum) yekun nəticəsi açıqlanıb. Mərkəzi Seçki Komissiyasının sədri Məzahir Pənahovun sözlərinə görə, komissiyanın ümumi ölkə üzrə fəaliyyət göstərən 125 dairə üzrə 5627 seçki məntəqəsinin hamısından məlumatlar daxil olub. MSK sədri əlavə edib ki, respublika üzrə seçici fəallığı 69,7 faiz təşkil edib.
Diqqətçəkən məqamlardan biri də ondan ibarətdir ki, refefendumun rəsmi nəticələrinə görə, ən çox səs 2 məsələyə verilib: 1) prezident seçilmək üçün müddətin 5 ildən 7 ilə artırılması - bu maddəyə, həmçinin, prezidentin parlamenti buraxmaq səlahiyyəti də əlavə edilib; 2) prezident seçilmək üçün yaş senzinin (35 yaş) ləğv edilməsi. Bu 2 məsələ üzrə 91 faizdən çox səs verilib. Bunlardan sonra gələn isə vitse-prezidentlik institutunun yaradılmasıdır.
Ümumən bu məqamı ekspertlər necə dəyərləndirir?
Məsələyə münasibət bildirən millət vəkili Aydın Mirzəzadə bunu bir sıra amillərlə əlaqələndirdi: "Referendumda bütün təklifləri cəmiyyət bəyəndi. Bəzi təkliflər isə xüsusilə diqqət cəlb etdi. Prezidentin səlahiyyət müddətinin 5 ildən 7 ilə qaldırılması isə daha çox səs aldı. Bu da təsadüfi deyil. Ona görə ki, bu birbaşa cənab İlham Əliyevin şəxsi nüfuzunun yüksək olması ilə bağlıdır. O üzdən, bu maddəyə daha çox səs vermə cənab Prezidenti Prezident kimi görmək istəyənlərin çox olduğunu göstərdi. Bütövlükdə referendum çox uğurlu keçdi və xalq aktiv şəkildə səsvermədə iştirak etdi".
Vidadi ORDAHALLI