Aqşin Əliyev: "Belə məntiq ortaya çıxır ki, Minsk Qrupunun həmsədri kimi Rusiya öz mandatına uyğun olmayan işlərlə məşğuldur"
Ötən həftə İrəvanda Ermənistanın formal müstəqilliyinin 25 illiyi münasibətlə hərbi paradın məşqləri olub. Bu məşqlərdə Ermənistanın Rusiyadan aldığı bəzi yeni silahlar, o cümlədən barəsində çoxdandır söz-söhbətlər gedən "İsgəndər-M" operativ-taktiki raketləri nümayiş etdirilib. İrəvan küçələrindən üzəri maskalanmış azı 3 belə raket kompleksinin keçdiyi görünüb. Lakin Ermənistan Müdafiə Nazirliyi məsələyə dair şərh verməyib.
Rusiyanın "Vedemosti" həftəliyi də Ermənistan Müdafiə Nazirliyindən şərh ala bilməyib. Rusiyanın silah ixracı ilə məşğul olan "Rosoboroneksport" dövlət korporasiyasının da telefonları cavab verməyib. Lakin korporasiyanın iki meneceri anonimlik şərti ilə təsdiq edib ki, Ermənistana bir divizion "İsgəndər-M" raket kompleksləri verilib. Mənbələr deyib ki, "Rosoboroneksport"un bu sövdələşməyə aidiyyəti yoxdur. Çünki raketlər KTMT çərçivəsində silah təchizatı razılaşması əsasında verilib. Bir divizionda dörd "İsgəndər-M" raket kompleksi var. Hər kompleks iki raket daşıyır.
Xatırladaq ki, Rusiya Ermənistana 200 milyon dollar güzəştli silah krediti verib. Həmin kredit əsasında alınacaq silahların siyahısında "İsgəndər-M" raketləri yer almırdı. "Rosoboroneksport"un meneceri deyib ki, raketlərin verilməsinə dair müqavilə həmin kreditdən vəsaitlər cəlb edilmədən həyata keçirilib. Xəbər verildiyi kimi, Ermənistan 200 milyon dollarlıq kredit hesabına Rusiyadan "Smerç" reaktiv yaylım atəşi sistemləri və "Solntsepyok" TOS-1A ağır odsaçan sistemləri almalıdır.
Ancaq bəzi hərbi ekspertlər qeyd edir ki, 200 milyonluq kredit formal bir rəqəmdir. Əslində Rusiya Ermənistana dəyəri milyardlarla ölçülən silah bağışlayıb. Bütün bu hallar Rusiyanın Minsk Qrupunda tərəfsiz olan həmsədrlik missiyasına nə dərəcədə uyğundur?
Ekspert Aqşin Əliyev qəzetimizə açıqlamasında bildirdi ki, təbii ki, bu, Rusiyanın neytrallıq mövqeyinə dərin şübhə salır: "Görünən budur ki, Moskva hər iki tərəfə silah satmaqda maraqlıdır. Hətta Rusiyanın xarici işlər naziri bir müddət əvvəl erməni jurnalistinin "Azərbaycana niyə silah satırsınız" sualına sərt cavab vermişdi. Onun cavabından belə çıxırdı ki, kimin pulu varsa, Rusiya ona silah satmaqda maraqlıdır. Ancaq Ermənistandakı son parad göstərdi ki, artıq burada söhbət hərbi balansın Ermənistanın xeyrinə dəyişmək cəhdindən gedir.
Aydındır ki, Moskvanın bizə silah satmaqda məqsədi heç də Azərbaycanın üstünlüyünü təmin etmək deyil.
Rusiyanın Ermənistana "İsgəndər-M" operativ-taktiki raket kompleksləri verməsini bölgədə balansı təmin etmək niyyəti kimi qiymətləndirmək olmaz.
Təsadüfi deyil ki, balansı təmin etmək üçün Rusiya Ermənistana bir sıra müasir silah hərbi sistemlər verməyi qərara aldı və bunun üçün güzəştli şərtlərlə işğalçı ölkəyə 200 milyon dollar məbləğində kredit ayırdı. Bu rəsmən açıqlanan rəqəmdir. Ancaq nümayiş edilən silahlardan görünür ki, məbləğ milyardla hesablana bilər.
Rusiya hazırda münaqişənin öz maraqları çərçivəsində həllinə çalışır və elə bir həll yolu istəyir ki, onun bölgədəki dayaqları daha da möhkəmlənsin.
Nümayiş olunan yeni silah növləri sübut edir ki, Rusiya bu məsələdə tam Ermənistana üstünlük verib. Tərəflərdən hər hansı birinin silahlanma yarışında önə çıxmasından və yaxud tərəflər arasında bu sahədə balansın yaranıb-yaranmamasından asılı olmayaraq, Rusiya yeni müharibənin başlanmasında maraqlı deyil. İstənilən halda, bu cür hərəkətlər Rusiyanın neytral vasitəçilik missiyasına kölgə salır. Bu hallar Ermənistanda arxayınçılıq yaradır və nəticədə o, işğalçılıq siyasətindən əl çəkmir. Onda belə məntiq ortaya çıxır ki, Minsk Qrupunun həmsədri kimi Rusiya öz mandatına uyğun olmayan işlərlə məşğuldur".
Məhəmmədəli QƏRİBLİ