Qabil Hüseynli: "Bu bir daha sübut edir ki, Ermənistanın ərköyünlüyünə onlar məqsədli şəkildə dözüm göstərir"
Ermənistan silahlı qüvvələri işğal olunmuş Azərbaycan ərazilərində növbəti dəfə hərbi təlim və yanğınlar törədib. Erməni silahlı qüvvələrinin müxtəlif qoşun birləşmələrinin Ağdamın işğal altında olan Uzundərə ərazisində keçirdiyi təlimlər başa çatandan sonra böyük bir sahə yandırılıb. Yanğınlar işğal altında olan Ağdam şəhərinin ətrafına qədər yayılıb. Cəbhəyanı kəndlərdən yanğınları müşahidə etmək mümkündür.
Təlimdə toplar, reaktiv artilleriya qurğuları, minaatanlar, eləcə də zirehli texnikalardan istifadə olunub.
Ermənistan ordusunun təlim atışlarının səsi cəbhəyanı yaşayış məntəqələrində, qonşu rayonların ərazilərində eşidilib.
Azərbaycan xarici işlər naziri Elmar Məmmədyarov
Ermənistanın Azərbaycanın işğal olunmuş Ağdam rayonunda keçirdiyi hərbi məşq və təlimləri danışıqlar prosesini pozmağa yönəlmiş ciddi təxribat adlandırıb.
Maraqlıdır ki, Ermənistanın bu cür harın addımına beynəlxalq təşkilatlar heç bir reaksiya verməyib. Bu nə ilə bağlı ola bilər?
Politoloq Qabil Hüseynlinin sözlərinə görə, bu təlimlərin birinci məqsədi 2-5 aprel döyüşlərinin ermənilərdə yaratdığı ruh düşkünlüyü, qorxu hissini aradan qaldırmaqdır: "Ermənistan öz əhalisinə göstərməlidir ki, arxasında Rusiya kimi nəhəng bir dövlət var, yeni silahlar alıb. Bu silahlar guya ölkələr balansında Ermənistanın xeyrinə kəskin dəyişikliklər edib. Hətta bundan istifadə edərək təmas xətti boyunca təlimlər keçirməyə belə cürət edib. Bu təlimlərin bir məqsədi də Azərbaycan tərəfində ruh düşkünlüyü yaratmağa yönəlib. Ermənistan bununla demək istəyir ki, biz güclüyük, müharibəyə hazırıq, istənilən döyüşlərdə qalib gəlməyə imkanımız çatar. Bütün bunlar hamısı erməni cəmiyyətinin gözünə kül üfürməkdir. Bu aciz vəziyyətdə qalmış ölkənin müharibəqabağı təbliğatıdır.
Ermənilər gözəl bilir ki, indiki şəraitdə danışıqları hansı formada olursa-olsun pozmaq ən birinci şərtdir. Çünki danışıqlar prosesi işğal edilmiş rayonların bu və ya digər formada geriyə qaytarılması ilə nəticələnəcək və ermənilər işğal etdikləri torpaqları geriyə qaytarmalı olacaq. Bu da erməni cəmiyyətində kəskin qarşıdurma meylləri yaradacaq. Ermənistanın danışıqlar prosesini pozmağa yönəlik addımları ortadadır. Bu, təbii ki, sülhdən dəm vuran beynəlxalq qurumları narahat etməlidir. Ancaq təəssüflər olsun ki, heç bir reaksiya verməyiblər. Heç bu məsələdə sülhməramlı missiyasını üzərinə götürən dövlətlərin də səsi çıxmadı. Bu bir daha sübut edir ki, Ermənistanın ərköyünlüyünə onlar məqsədli şəkildə dözüm göstərir".
Məhəmmədəli QƏRİBLİ