Mübariz Əhmədoğlu: "Nəticədə İŞİD əmələ gəldi, milyonlarla insan yerindən-yurdundan olub Avropaya üz tutdu"
Dünyanın müxtəlif ölkələrində hər cür problemlər yaşanır. Qərb, ABŞ isə özünə yaxın bildiyi ölkələrdəki mənfi faktlara susqunluqla yanaşır. Ancaq özünə yaxın bilmədiyi ölkələrdə baş verənlərə qarışır, buna siyasi motiv qatır. Lazım bildiyi vaxt orada hakimiyyəti dəyişir. Bütün bunlar isə Qərbin ikili standartlarının göstəricisidir. Halbuki, bu cür yanaşma beynəlxalq hüquq normalarına hörmətsizlikdir.
Görünən odur ki, bəzi dövlətlərin inkişafı onların maraqlarına uyğun gəlmir. Bunu pozmaq üçün müxtəlif yollara əl atırlar. Bu zaman daha çox ölkə müxalifətinə dəstək verirlər. Bunun isə hakimiyyətə qarşı təzyiq olduğu hamıya məlumdur.
ABŞ və onun Avropadakı müttəfiqləri bu cür çirkli oyunu illərdir davam etdirir və müxtəlif bəhanələrlə müstəqil ölkələrin daxili işlərinə müdaxilə edir, sabit cəmiyyətlərdə xaos yaradır, hakimiyyət çevrilişləri ssenariləri həyata keçirir. Amma onların demokratiyaya nə cür dəstək verdikləri çoxdan həqiqi üzünü göstərib. Müxtəlif ölkələrdə həyata keçirdikləri hakimiyyət çevrilişi və hərbi müdaxilə ssenariləri qanlı müharibələrə, on minlərlə insanın ölümünə, sosial-iqtisadi infrastrukturun dağılmasına və ölkələrin viran qalmasına səbəb olub.
Məsələn, ABŞ və onun partnyorları bu gün Əfqanıstan, İraq, Misir, Liviya, Suriya və digər ölkələrə "demokratiya" gətirib və oranın nə günə düşdüyü gözümüzün önündədir. Qərb orada baş verən fəlakətlərə görə birbaşa cavabdehlik daşıyır. Sözügedən ölkələrin gələcəyinin necə olacağı qaranlıq görünür. Ona görə də ABŞ və digər Qərb dövlətlərinin müxtəlif ölkələrdə tətbiq etdiyi hakimiyyət dəyişikliyi ssenariləri dünyada geniş humanitar böhranın yaranmasında necə rol oynayır? Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, aparılan məlum siyasət böyük humanitar fəlakətə səbəb olub: "Bu danılmaz reallıqdır. İndiyə qədər dünyada belə beynəlxalq humanitar fəlakət yox idi. Bunu məhz Qərb yaratdı. Təbii ki, başda ABŞ olmaqla. Demokratiya adı altında Liviyə dağıdıldı. Ölkə 3 hissəyə bölündü. Halbuki, Liviya o bölgənin donoru, sabitlik mənbəyi idi. O cümlədən İraq da sabit dövlət idi. İndi nəinki İraq, ətrafındakı Suriya də ölü zonaya çevrilib. Bunu məhz hakimiyyət dəyişiklikləri ssenariləri etdi. Nəticədə İŞİD əmələ gəldi, milyonlarla insan yerindən-yurdundan olub Avropaya üz tutdu. Bütün bunlar beynəlxalq humanitar böhranı dərinləşdirir. Bu mövcud reallıq region üçün təhlükə mənbəyidir".
Vidadi ORDAHALLI