"Mənə elə gəlir ki, ciddi qurum belə yanlışlığa yol verməməlidir"
Prezident İlham Əliyev Avropa İttifaqı-Azərbaycan Parlament Əməkdaşlıq Komitəsinin nümayəndə heyəti ilə görüşü zamanı bir sıra beynəlxalq təşkilatların və ayrı-ayrı dövlətlərin yaydığı hesabatlarda ölkəmizə qarşı necə qərəzli olduğunu sübut edən mövqe ortaya qoyub.
Prezident Avropa Parlamenti ilə əməkdaşlığın bərpası üçün bəzi məsələlərin aydınlaşdırılmasını istəyərək bildirib ki, Avropa Parlamentinin bir il bundan əvvəl qəbul etdiyi qətnamə bizim münasibətlərimizdə ciddi geriləmə yaradıb: "Bu çox böyük təəccüb doğurdu. Biz Azərbaycanda bunu çox düşməncəsinə, qeyri-düzgün, səhv informasiya və qərəzə əsaslanan addım və ölkəmizin reputasiyasına zərər vermək cəhdi kimi qəbul edirik.
Buna aydınlıq gətirmədən irəliləmək və gələcək işlərimizi planlaşdırmaq çətin olacaq. Məndə bununla bağlı sənəd var. Bilmirəm sizin hamınız bu barədə məlumatlısınız, yoxsa yox, yəqin ki, məlumatlısınız. Lakin mən bəzi məsələləri qeyd etmək istərdim. Burada çox məsələ var, lakin düşünürəm ki, bəzilərini qeyd etməyə dəyər. Yəqin ki, sizin üçün mənim bununla bağlı şərhlərimi öyrənmək yaxşı olar.
Burada deyilir ki, son bir neçə ildə ümumilikdə Azərbaycanda insan haqları ilə bağlı vəziyyət pisləşib. Bu doğru deyil. Azərbaycanda insan haqları ilə bağlı vəziyyət yaxşılaşır. Ölkəmiz demokratik inkişafa və insan haqlarının qorunması işinə sadiqdir. Düşünürəm ki, burada insan haqlarının qorunması ilə bağlı vəziyyət daha müsbət qiymətləndirmə tələb edir. Burada bilmirəm qəsdən və ya yanlışlıqla səhv informasiyaya əsaslanan bir neçə məsələ var. Onlardan biri odur ki, jurnalistlər və vətəndaş cəmiyyəti nümayəndələri davamlı hədə və təqiblərə məruz qalırlar. Onların arasında Meydan TV-nin direktoru Emin Milli ölümlə hədələnib. Bu, səhvdir və yalandır. O, heç vaxt ölümlə hədələnməyib. Bilmirəm niyə burada belə yazılıb. Ola bilsin ki, bu, yenə də Azərbaycan əleyhinə kampaniyanın bir hissəsidir.
Hüquq müdafiəçisi Emin Hüseynov saxta ittihamlarla üzləşəndən sonra İsveçrədən sığınacaq istəyib və Azərbaycan vətəndaşlığından məhrum edilib. Bu da səhv informasiyaya əsaslanır. Bu şəxs mənə məktub yazaraq onu vətəndaşlıqdan məhrum etməyi xahiş edib. Bu, Azərbaycan qanunvericiliyinə əsasən edilib. Onu bir neçə ay səfirliyində gizləndiyi İsveçrənin xarici işlər naziri buraya gələrək öz təyyarəsi ilə İsveçrəyə aparıb. Bununla bağlı Azərbaycan Xarici İşlər Nazirliyi və İsveçrə Xarici İşlər Nazirliyi arasında razılıq əldə olunub. Sənədlər var, cənab Hüseynovun məktubu var. Heç kim onu vətəndaşlıqdan çıxarmayıb. Bu, yenə də daha bir yalandır."
İlham Əliyev döyülən, sonra isə xəstəxanada ölən jurnalist Rasim Əliyevlə bağlı məsələyə də toxunub: "Daha bir məsələ, guya jurnalist Rasim Əliyev sosial şəbəkələr vasitəsilə Prezident Əliyevi tənqid etdiyinə görə davamlı hədə və təhdidlər alandan sonra amansızcasına döyülərək Bakıda xəstəxanada dünyasını dəyişib. Bu, məni cinayət törətməkdə birbaşa ittiham etməkdir. Mən bunu yazanları məhkəməyə verə bilərəm. Təəssüf ki, idman xəbərlərindən yazan jurnalist Rasim Əliyev faciə nəticəsində dünyasını dəyişib. O, bəzi hərəkətlərinə görə tənqid etdiyi bir futbolçunun qohumları və fanatları tərəfindən döyülüb. Onlar onu döyüblər və bu bədbəxt hadisə olub. Bunun bizimlə heç bir əlaqəsi yoxdur. O, heç vaxt tənqid etməyib və hətta heç kim bu şəxsi tanımırdı. Bu, qəsdən manipulyasiya, mənim bununla əlaqəmin olmasına dair ittihamdır".
Prezidentin açıq şəkildə AP-nin qətnaməsində yer alan müddəaları təkzib etməsi bu qurumun indiyə qədər Azərbaycana qarşı qərəzli kampaniyalar apardığına sübut sayıla bilərmi?
Politoloq Qabil Hüseynli qəzetimizə bildirdi ki, İlham Əliyev çox gözəl mövqe ortaya qoydu: "Bəzən ölkə başçıları bu cür mövzulardan yayınır və ya daha diplomatik danışmağa üstünlük verir. Ancaq, göründüyü kimi, İlham Əliyev fərqli mövqe ortaya qoydu və qətnamədə Azərbaycanın əleyhinə işlədilən müddəaları bir-bir oxuyaraq, onlara aydınlıq gətirdi. Biz dəfələrlə beynəlxalq təşkilatların Azərbaycana qarşı qərəzli olmasını dilə gətirmişik. Ermənistanla müqayisədə bizə ikili standartlarla yanaşıldığını demişik. İlham Əliyev bunu bir daha əyani şəkildə sübut etdi. Yəqin bundan sonra beynəlxalq təşkilatlar etdiklərinin fərqinə varacaq ki, yalanları belə ifşa edilməsin. Özü məktub yazıb vətəndaşlıqdan imtina etmək istəyən şəxsi bunlar zorla vətəndaşlıqdan çıxarılan kimi qeyd edib. Mənə elə gəlir ki, ciddi qurum belə yanlışlığa yol verməməlidir".
Məhəmmədəli QƏRİBLİ