Qarabağ münaqişəsinin həllinin uzanması bu gün Ermənistanda getdikcə daha çox narahatlıq predmetinə çevrilən məqamlardan biri qismində çıxış edir. Burada hesab edilir ki, ölkənin düşdüyü problemlərdən xilas yolu məhz Qarabağ konfliktinin həllindən keçir. Amma o da bəllidir ki, rəsmi İrəvan münaqişənin həllini mümkün qədər çox uzatmağa çalışır.
Ermənistanda bu fonda açıq şəkildə vurğulanır ki, əslində, hakimiyyətdə olan Qarabağ klanına münaqişənin həlli sərf etmədiyindən belə vəziyyət yaranıb. Çünki hakimiyyət məhz bu münaqişə səbəbindən ölkə daxilində istədiyi addımları atır. Bununla bağlı olaraq Qarabağ klanından narazılıqların artması da müşahidə olunur. Hakimiyyət rəhbərliyi isə əsasən Qarabağdan olan erməniləri əsas vəzifələrə təyin etməkdə davam edir.
Bu arada Ermənistan prezidenti Serj Sarkisyan yeni hökumətdə ilk təyinatlar edib. Sarkisyanın sərəncamı ilə Vaçe Qabrelyan baş nazirin müavini, beynəlxalq iqtisadi inteqrasiya və islahatlar naziri, David Arutunyan isə hökumət aparatı rəhbəri postlarında qalıb. Ermənistanda yeni maliyyə naziri Vardan Armanyan, nəqliyyat və rabitə naziri Vaan Martirosyan, kənd təsərrüfatı naziri İqnatiy Arakelyan, energetika və təbii sərvətlər naziri isə Aşot Manukyan təyin olunub. Sarkisyan, həmçinin, Aleksan Arutunyanı Prezident Administrasiyası rəhbərinin müavini təyin edib. Bu şəxslərin çoxu, o cümlədən yeni baş nazir də Qarabağ bölgəsindəndir. Ermənistanda dərc edilən "Aykakan Jamanak" qəzetinin məlumatına görə, hökumətdə kadr dəyişiklikləri ilə yanaşı, struktur dəyişiklikləri də gözlənir. Qeyd olunur ki, ölkənin yeni təyin olunmuş baş naziri Karen Karapetyan dövlət gəlirlərinin axınına və qanunsuz dövriyyəyə nəzarət etmək üçün öz kadrlarından birini təyin etmək istəyir. Həmin şəxs isə "Qazprom-Ermənistan" QSC-nin direktoru Vardan Arutyunyandır: "Artıq Vardan Arutyunyanın Gömrük Xidmətinin rəhbəri təyin oluna bilməsi məsələsi barədə müzakirələr keçirilib". Hesab olunur ki, yeni komanda da Dağlıq Qarabağ məsələsinin həllini uzadacaq. Halbuki, Ermənistan üçün xilas planı təklif edənlər bildirir ki, Qarabağ münaqişəsi tezliklə həll olunmalı və bununla da dünya iqtisadiyyatına çıxış əldə edilməlidir.
Erməni yazar Akop Badalyan bununla bağlı qeyd edir: "Ermənistan 25 il müstəqil olsa da, Qarabağ və ordudan başqa heç nə qazanmayıb. Bu gün sosial-iqtisadi problemlərin başında bu iki faktor dayanır. Müstəqillik Ermənistana heç nə gətirmədi. Hazırda geosiyasi proseslər Qarabağ məsələsində də güzəştə getməyə vadar edir. Çünki Ermənistanın öz müstəqilliyinə ciddi təhlükələr var. Ölkədə heç bir sahənin inkişaf etməməsi, heç bir nailiyyətin əldə olunmaması hər kəsi təhlükə altına qoyur. Ermənistan müstəqilliyin verdiyi imkanlardan istifadə etməlidir. Müasirləşdirmə, texnoloji inkişaf və dünya iqtisadiyyatına çıxış əldə olunmalıdır".
Ümumiyyətlə, ermənilərin böyük əksəriyyəti anlayır ki, hazırda dünya iqtisadiyyatına çıxışın yeganə yolu Qarabağ münaqişəsinin həlli, Türkiyə və Azərbaycanla sərhədlərin açılması, regional layihələrə qoşulmaqdır. Akop Badalyan qeyd edir: "Biz bu 25 ildə hərbiləşmiş kriminal oliqarxiya qazandıq. Erməni cəmiyyəti əsrin dörddə birini "karantində" yaşayıb". Hazırda diqqət həm də ona yönəldilib ki, iqtisadi tənəzzül, sosial böhran Ermənistanda miqrasiya tempini artırıb. Bu barədə həqiqətlər isə işğalçı ölkənin hökuməti tərəfindən ciddi-cəhdlə gizlədilir. Ermənistan Statistika Komitəsinə miqrasiya ilə bağlı məlumatların yayılması qadağan olunub. Sosioloq Ruben Yeqanyan isə qeyd edir ki, 1991-ci ildən indiyədək Ermənistanı 1,5 milyon insan birdəfəlik tərk edib. O deyib ki, hər il ölkədən geri qayıtmamaq şərtilə 35 mindən çox Ermənistan vətəndaşı köçür: "Miqrasiya ilə bağlı statistik məlumatlar hökumət tərəfindən ciddi-cəhdlə gizlədilir. Hətta Ermənistan Statistika Komitəsinə bu barədə xəbər yaymaq qadağan edilib". Amma rellıq Ermənistanın sürətlə boşaldığını göstərir və bu vəziyyətdə Azərbaycan ərazilərinin işğalının davam etdirilməsi də mümkünsüz sayılır.
Nahid SALAYEV