Üzeyir Cəfərov: "Digər tərəfdən isə, beynəlxalq ictimaiyyətə mesaj verirlər ki, guya Azərbaycan aparılan sülh danışıqlarında səmimi deyil"
Sentyabrın sonlarında və ya oktyabrda Azərbaycan ordusunun Qarabağda yeni hücumu mümkündür. Bu barədə Ermənistan ordusunun birinci Qarabağ müharibəsi dövründə kəşfiyyat-diversiya dəstəsinin komandiri olmuş Vova Vardanov Ermənistan KİV-inə deyib. Kəşfiyyatçı Vardanov hesab edir ki, Azərbaycana aprel döyüşlərindən sonra nəticələr çıxarmaq üçün 2-3 ay vaxt lazım idi.
Onun sözlərinə görə, apreldən sonra erməni qüvvələri təmas xəttində müəyyən işlər görüb, ancaq həmişə ayıq olmaq və yeni hücuma cavab verməyə hazırlaşmaq lazımdır.
"Praktiki olaraq indi bütün hərbi hissələrdə nəticə çıxarmağa çalışırlar, son dəyişikliklər bizim rəqibə daha adekvat cavab verməyimizi təmin edir. Ancaq biz lazımi nəticə çıxarmasaq, yeni hücum cəhdi mümkündür" - Vardanov deyib.
Ermənistan tərəfdən səsləndirilən bu tip təxribatçı fikirlər nəyə hesablana bilər?
Hərbi ekspert Üzeyir Cəfərovun sözlərinə görə, bu, Ermənistan tərəfinin növbəti təxribatı sayıla bilər: "Vardanov hazırda hərbi xidmət keçmirsə, bu informasiya onda hardan ola bilər? Aydındır ki, ona bunu dedizdirirlər. Qeyd olunur ki, aprel döyüşlərindən sonra 2-3 ay lazım idi ki, Azərbaycan özünə gəlsin. Gülməli yanaşmadır. Çünki həmin döyüşlərdə Azərbaycan nəyə qadir olduğunu düşmənə göstərdi. Əminəm ki, hələ indiyə kimi ermənilər özünə gələ bilməyib. Vardanovun açıqlamasında müxtəlif məqsədlər güdülə bilər. Birincisi, onlar istəyir ki, danışıqlar prosesini pozmaq üçün edəcəkləri hərbi təxribatı indidən sığortalasın. Yəni cəbhədə planlaşdırdıqları gərginlik yaratmaq cəhdlərini Azərbaycanın üstünə atsınlar. Digər tərəfdən isə, beynəlxalq ictimaiyyətə mesaj verirlər ki, guya Azərbaycan aparılan sülh danışıqlarında səmimi deyil. Guya biz hər an prosesi pozmaqda maraqlıyıq. Təbii ki, bu cür təxribat xarakterli çıxışlarla bizi yayındırmaq mümkün deyil. Biz nəinki oktyabrda, istənilən an düşmənin edəcəyi təxribata cavab verməyə hazırıq. Hələ ki, sülh danışıqlarının tələblərinə riayət edirik. Ancaq istənilən zaman torpaqlarımızı işğaldan azad etməyə hazır olmalıyıq. Bunu bizə kimsə qadağan edə bilməz".
Məhəmmədəli QƏRİBLİ