"Həmin mərkəzlər bir qədər fərqli spektr yaradır ki, şübhədən yayına bilsinlər"
Milli Şura adı ilə keçirilən, əslində isə AXCP-nin təşkil etdiyi 11 sentyabr mitinqindən sonra bir sıra gizlinlərin üstü açılmış oldu. Hiss olunur ki, bəzi regional güclər, gizli servislər və dini cərəyanlar Azərbaycanda sabitliyi pozmaq, xaos yaratmaq və bunun da nəticəsində hakimiyyəti zorla ələ keçirmək barədə razılığa gəlib.
Bu strategiya xüsusilə də FETÖ-nün Türkiyədə həyata keçirmək istədiyi hərbi çevriliş cəhdindən sonra daha da açıq müstəvidə özünü büruzə verir. Proseslərin gedişi göstərir ki, ABŞ-Gülən şəbəkəsi-bəzi region ölkələri Azərbaycanda siyasi proseslərin normal axarını çərçivədən çıxarmaq, cəmiyyətdə gərginlik, qarşıdurma yaratmaq üçün birgə plan həyata keçirir. FETÖ-yə bağlı olan müxalifət nümayəndələrinin həbsindən sonra sanki radikal müxalifətə əlavə impuls verildi.
Bəzi ekspertlər də bir-birinə zidd mövqedə olan müxtəlif səpkili qüvvələrin hazırda eyni müstəvidə çıxış etməsini təəccüblə qarşılayır. ABŞ-dakı müəyyən qüvvələr, Gülən hərəkatı, regionumuzdakı məlum islamçı dövlət və AXCP-nin eyni hədəfləri bölüşməsi həqiqətən düşündürücüdür.
Hazırkı məqamda bu qüvvələri bir olmağa vadar edən maraq nədən ibarət ola bilər?
Millət vəkili Aydın Mirzəzadə qəzetimizə açıqlamasında bildirdi ki, bu spektr təsadüfən formalaşmayıb: "Maraqları birləşdirən faktorlar bəllidir. Eyni mərkəzdən təlimat və maliyyə alırlar. Sadəcə, həmin mərkəzlər bir qədər fərqli spektr yaradır ki, şübhədən yayına bilsinlər. Məqsəd ölkədə xaos yaratmağa hesablanıb. Ancaq görünən budur ki, sosial bazaları çox zəifdir. Bu səbəbdən də xalqın adından danışa bilmirlər. Cəmiyyətdən sosial güc almaq onlar üçün asan deyil. Fikir verirsiniz ki, adətən bu cür aksiyalar ölkəmizdə mühüm tədbirlər öncəsi keçirilir. Yenə həmin qüvvələr meydandadır. Həm xaricdən sifariş verənlər, həm də daxildəki icraçılar eynidir. ABŞ-da Azərbaycandakı insan haqlarının vəziyyətilə bağlı dinləmələr keçirilir. Bəzi Avropa qəzetləri Azərbaycan barədə tənqidi yazıları intensivləşdirib. Burdakılar da durmadan mitinq keçirməkdə maraqlıdır. Azərbaycan hakimiyyətinin belə oyunlarla bağlı kifayət qədər təcrübəsi var. Hesab edirəm ki, bu cür destruktiv fəaliyyətdə iştiraka razılıq verənlər heç bir nəticə əldə edə bilməyəcək. Xaricdəki anti-Azərbaycan fəaliyyəti səngiyən kimi burdakı icraçılar da öz evlərinə və qərargahlarına çəkiləcək".
Məhəmmədəli QƏRİBLİ