"Markovun bəyanatı bizim könlümüzü almağa yönəlib və ciddi heç nəyi ehtiva etmir"
Kollektiv Təhlükəsizlik Müqaviləsi Təşkilatının (KTMT) rəhbəri postuna Ermənistan nümayəndəsi təyin edildikdən sonra Rusiya Azərbaycanla hərbi əməkdaşlığı gücləndirməyə çalışacaq. Bu barədə tanınmış rusiyalı politoloq, prezident Putinin etibarlı şəxsi, Rusiya Federasiyası İctimai Palatasının üzvü Sergey Markov təşkilatda gözlənilən baş katib dəyişikliyini şərh edərkən bildirib.
Qeyd edək ki, az öncə qurumun hazırkı baş katibi, general Nikolay Bordyuja bəyan edib ki, yeni baş katibin adı KTMT-nin İrəvanda keçiriləcək iclasında bəlli olacaq və o, Ermənistan nümayəndəsi olacaq. Bu açıqlamadan bir neçə gün sonra "İnterfaks" həmin şəxsin Ermənistanın indiki müdafiə naziri Seyran Ohanyanın olacağı haqda məlumat yayıb.
"Ermənistan KTMT-nin tamhüquqlu üzvüdür. Ona görə də onun nümayəndələri qurumda hansısa vəzifə tutmaq hüququndan məhrum edilməyib. Ancaq bu halda mən düşünürəm ki, Rusiya belə bir təyinatın Bakıda neqativ qəbul ediləcəyini anlayır. Rusiya Azərbaycana da mühüm müttəfiq kimi baxır. O səbəbdən fikrimcə, KTMT-yə erməni şəxsin başçı təyin olunması hərbi və hərbi-texniki sahədə Rusiya-Azərbaycan qarşılıqlı əlaqələrində hansısa başqa formatlarla Moskva tərəfindən kompensasiya ediləcək", - deyə politoloq bildirib.
Onun sözlərinə görə, Ermənistan nümayəndəsinin KTMT rəhbərliyinə gətirilməsi Rusiyanın Dağlıq Qarabağ konfliktinin həllinə yönəlik səylərinə təsir göstərməyəcək. Markovun qənaətincə, bu gün münaqişənin nizamlanmasında ciddi sıçrayış üçün real imkanlar var.
Markovun KTMT-yə ermənilərin rəhbərlik edəcəyi halda bunun hərbi-texniki sahədə Rusiya-Azərbaycan qarşılıqlı əlaqələrində hansısa başqa formatlarla Moskva tərəfindən kompensasiya ediləcəyi ilə bağlı səsləndirdiyi fikirdən hansı nəticəni çıxarmaq olar?
Hərbi ekspert Üzeyir Cəfərov qəzetimizə açıqlamasında bildirdi ki, Markovun bəyanatı boş söz yığınıdır: "Belə çıxır ki, onlar Azərbaycanla alver edirlər? Ohanyanın əli dinc azərbaycanlıların qanına batıb. Belə adamı necə mühüm hərbi quruma rəhbər təyin etmək olar? Gözləmək olmazmı?
Qəbul edək ki, bu bir prosedur, normadır. Ancaq indiki məqamda hansısa canini o posta təyin etmək doğru olmaz. Qoy hələlik Qazaxıstan sədrliyi götürsün. Problem həllini taparsa, onda Ermənistana verilsin. Düzdür, Ermənistan KTMT-də tək qərarlar qəbul etmək səlahiyyətində olmayacaq, ancaq məsələnin ağır bir psixoloji tərəfi də var ki, bu mütləq nəzərə alınmalıdır. Hesab edirəm ki, yaranmış vəziyyətlə bağlı Azərbaycan rəsmi etiraz etməlidir. Rusiya onsuz da bizə də, Ermənistana da pulla silah satır. Başqa nə kompensasiya ola bilər? Markovun bəyanatı bizim könlümüzü almağa yönəlib və ciddi heç nəyi ehtiva etmir".
Məhəmmədəli QƏRİBLİ