"Boş iftira olduğu üçün ciddiyə alınmayacaq bir məlumatdır"
Ermənistan mətbuatı növbəti iftira dolu məlumat yayıb. Bəzi erməni KİV-inin verdiyi xəbərə görə, Ermənistan və qondarma "Dağlıq Qarabağ Respublikası"nın ombudsmanları Arman Tatoyan və Ruben Melikyan işğal altında olan Maqadis və Alaşan kəndlərində olub.
Bildirilir ki, ombudsmanlar aprel döyüşləri zamanı guya həmin kəndləri tərk edən talış əsilli vətəndaşlarla görüşüb və guya Azərbaycan əsgərlərinin orada talışlara divan tutduğu barədə "faktlar" toplayıblar. Görüşlərin yekunu olaraq xüsusi hesabatın hazırlanacağı və bunun beynəlxalq təşkilatlara təqdim olunacağı bildirilib.
Ermənistanın bu yalanı nəyə hesablana bilər? Həmin ərazilərdə talışlar yaşayırmı, yoxsa bu da Ermənistanın növbəti uydurmasıdır?
Konfliktoloq Aqşin Əliyev qəzetimizə açıqlamasında bildirdi ki, Ermənistan hər zaman diqqəti cəlb etmək üçün yalan məlumatlardan istifadə edir: "Aprel döyüşlərindəki itkilər onları bərk hiddətləndirib. Çünki Azərbaycanın bu dərəcədə güclü olduğunu təxmin etmirdilər. Həmin itkiləri kompensasiya etmək üçün müxtəlif bəhanələr uydurur, təxribatlara əl atırlar. Aprel döyüşləri zamanı hansısa kənddə dinc əhalinin öldürlməsilə bağlı şəkillər də paylaşdılar. Sonra öz mətbuatlarında yazılar getdi ki, həmin kəndin yaşlı sakinlərini məhz erməni əsgərləri güllələyib. Bir növ, faşist taktikasından istifadə ediblər ki, Azərbaycana nifrət oyatsınlar. Bu da kökündən yanlış olan məlumatdır. Ermənistan monoetnik bir ölkədir. Həmin ölkənin hətta ən böyük şəhərlərində belə ermənilərdən başqa kimsə yaşamır. Son vaxtlar ermənilərin siyasətində ölkəmizə qarşı yönələn bəzi incə məqamlar nəzərə çarpır. Onlar Azərbaycanda yaşayan etnik azlıq kartından istifadə etməyə çalışır. Hətta separatçılığı təbliğ edən "Talışıstan" adlı internet televiziyasının da oradan yayınlandığı dəqiqdir. Bu üsulla ölkəmizdə yaşayan talış əsilli vətəndaşlardan istifadə edəcəklərini zənn edirlər. Ermənistanda və işğal olunmuş torpaqlarda talışların yaşamadığı birmənalıdır. Bu təxribatda güdülən məqsədlərdən biri də budur ki, guya Ermənistan öz ərazisində yaşayan milli azlıqların hüququnu ciddi qoruyur. Zənn edirlər ki, bu cür təxribatla burdakı etnik azlıqların psixologiyasına təsir edə bilərlər. Boş iftira olduğu üçün ciddiyə alınmayacaq bir məlumatdır".
Məhəmmədəli QƏRİBLİ