"Bu, Azərbaycanla Ukrayna arasındakı münasibətlərə də mənfi təsir göstərə bilər"
Sentyabrın 14-də Ukraynada yaşayan azərbaycanlılar ölkənin Daxili İşlər Nazirliyinin qarşısında aksiya keçirib. Səbəb kimi son aylar Ukraynada yaşayan azərbaycanlı iş adamlarının qətlə yetirilməsi, ölkənin müxtəlif şəhərlərində həmyerlilərimizə məxsus böyük restoranların yandırılması göstərilir.
Aksiya iştirakçıları son vaxtlar Ukraynada azərbaycanlılara qarşı cinayətlərin artmasına, xüsusilə adam oğurluğu hallarına DİN tərəfindən lazımi reaksiya verilməməsinə, tədbirlər görülməməsinə etiraz edib. Aksiya iştirakçıları daxili işlər naziri Arsen Avakovdan son 2 ildə - o, nazir təyin ediləndən bəri 20-dən çox azərbaycanlı iş adamının və iş adamlarının övladlarının oğurlanmasına, tanınmış azərbaycanlılara qarşı sui-qəsdlərin üstünün açılmamasına aydınlıq gətirməsini tələb edib.
Mitinqdə iştirak edən Birləşmiş Ukrayna Azərbaycanlıları Konqresinin Ali Məclisinin sədri Akif Gülməmmədov bildirib ki, cinayətlərin üstü açılmadığı üçün mitinq keçirib şüarlar səsləndiriblər: "Mitinqə Ukraynanın müxtəlif şəhərlərindən 200-dən çox adam gəlmişdi. Daxili İşlər Nazirliyinin qarşısında tələblərimizi irəli sürüb, şüarlarımızı səsləndirdik. Bildirdik ki, bu işlərə baxılsın və tez bir zamanda cinayətkarlar cəzalandırılsın. Daxili İşlər Nazirliyindən bizə cavab veriləcəyi bildirildi. Hələ ki, biz də onlar cavab verənə qədər hər hansı bir aksiya keçirməyi düşünmürük. Cavabdan sonra buna uyğun olaraq müvafiq addımlar atacağıq".
Xatırladaq ki, Ukraynanın daxili işlər naziri Arsen Avakov milliyyətcə ermənidir. Azərbaycanlıların narazılığına səbəb olan vəziyyətin yaranmasında erməni nazirin nə kimi rolu ola bilər?
Beynəlxalq Diaspor Mərkəzinin sədri İsmayıl Ağayev qəzetimizə açıqlamasında bildirdi ki, Avakov Ukraynadakı erməni diasporunun ən üzdə olan simasıdır: "Belə bir adamın azərbaycanlılara qarşı qərəzli olması təəccüblü deyil. Avakov Xarkovda iş adamı kimi fəaliyyətə başlayıb, sonra isə müəyyən yollarla maddi baxımdan xeyli varlanıb. Sual oluna bilər: Ukraynada yaşayan ermənilərə qarşı niyə belə cinayət törədilmir? Bununla kimlərsə azərbaycanlılarla Ukrayna hakimiyyəti arasında sanki narazılıq yaratmağa çalışır. Avakovun nazir olması Ukraynanın özünə ziyandır. Ukraynada təxminən 500 min azərbaycanlı yaşayır ki, onları da narazı salmaq müsbət hal deyil. Bu, Azərbaycanla Ukrayna arasındakı münasibətlərə də mənfi təsir göstərə bilər.
Avakovla bağlı Ukrayna cəmiyyətində də birmənalı fikir yoxdur, ondan narazılıqlar çoxdur. Hesab edirəm ki, Ukrayna hakimiyyəti bu vəziyyəti ciddiyə almalıdır. Əks halda, bu xoşagəlməz hal başqa müstəviyə sıçraya bilər".
Məhəmmədəli QƏRİBLİ