"Ermənistan, eyni zamanda, bununla təhlükəsizliyinə tam qarantiya almaqla bağlı imitasiya edəcək"
Kollektiv Təhlükəsizlik Müqaviləsi Təşkilatı (KTMT) qurumunun hazırkı baş katibi, general Nikolay Bordyuja bəyan edib ki, quruma yeni baş katib seçiləcək. Həmin adamın adı KTMT-nin 14 oktyabrda İrəvanda keçiriləcək iclasında bəlli olacaq və o, Ermənistan nümayəndəsi ola bilər. Həmin şəxsin Ermənistanın indiki müdafiə naziri Seyran Ohanyanın olacağı haqda məlumat yayılıb. Lakin Ermənistanın müdafiə naziri S.Ohanyanın KTMT sədri olmaq istəmədiyi ortaya çıxıb.
Erməni mətbuatının verdiyi məlumatda bildirilir ki, Ohanyan həmin postu tutmaqda maraqlı deyil. Ölkəsinin mətbuatı onun bu postdan mümkün imtinasını "güclü gediş" adlandırıb. Bildirilir ki, KTMT əslində hərbi blok kimi yox səviyyəsindədir və Rusiyanın oyuncağıdır. Xatırladaq ki, KTMT-nin oktyabrın 14-də İrəvanda növbəti iclası keçiriləcək. Qurumun fəaliyyətdə olan sədri Nikolay Bordyuja həmin iclasda növbəti dönəm üçün sədrlik postuna Seyran Ohanyanın gətiriləcəyinin elan olunacağını bildirib. Hətta Ohanyan həmin postu tutmasa belə, Kollektiv Təhlükəsizlik Müqaviləsi Təşkilatının (KTMT) rəhbəri postuna Ermənistan nümayəndəsi təyin ediləcək. Bu adi prosedur olsa da, Qarabağla bağlı danışıqların getdiyi belə kövrək məqamda Ermənistanın hansısa hərbi təşkilata rəhbərlik etməsi nə dərəcədə məqsədəuyğun sayıla bilər?
Politoloq Qabil Hüseynlinin fikrincə, belə həssas məqamda Ermənistana sədrliyin verilməsi doğru deyil: "Ermənistan KTMT-nin tamhüquqlu üzvüdür. Ona görə də onun nümayəndələri qurumda hansısa vəzifə tutmaq hüququndan məhrum edilməyib. Ancaq Rusiya anlamalıdır ki, məhz belə məqamda Ermənistan əlavə dividendlər əldə etmiş olur. Düzdür, Kremlə yaxın politoloqlar bunun elə də böyük bir fəsad verəcəyini təxmin etmir. Moskva düşünür ki, hansısa digər bir addımla bu balansı qorumaq olar. Həmin qurum Ermənistana olan təcavüzə qarşı söz demək haqqına malikdirsə, bu heç də o anlama gəlmir ki, Qarabağda baş verənlərə təsiri olmayacaq. KTMT aprel döyüşlərinə də müdaxilə etmədi. Sədrin dəyişməsi heç də o anlama gəlmir ki, qurum Ermənistanın xeyrinə işləyəcək. KTMT bilavasitə Rusiyanın nəzarətindədir. Ancaq Ermənistan bununla əlavə avantajlar qazanır və psixoloji baxımdan üstünlük əldə edir.
Nikolay Bordyuja 2003-cü ildən KTMT baş katibi vəzifəsini icra edir. O, 3 dəfə bu posta təkrar seçilib. Hər halda, prosesi bir qədər də uzatmaq olardı. Ermənistan, eyni zamanda, bununla təhlükəsizliyinə tam qarantiya almaqla bağlı imitasiya edəcək".
Məhəmmədəli QƏRİBLİ