Rusiya müdafiə naziri Sergey Şoyqu Moskva və Vaşinqtonun Suriyada terrorçulara qarşı ortaq hərbi əməliyyat keçirməyə çox yaxın olduqlarını bəyan edib.
Baki-xeber.com xəbər verir ki, Sergey Şoyqu "Rossiya 24” televiziyasına müsahibəsində ABŞ-la danışıqların çox aktiv bir mərhələsində olduqlarını deyib: "Vaşinqtonla həm Cenevrədə, həm də Əmmanda sıx təmasdayıq. Hələbdə sülhün təmin edilməsi və insanların evlərinə dönməsinə şərait yaradacaq bir düstura addım-addım yaxınlaşırıq".
Digər tərəfdən Şoyqu Rusiya və Qərbin "mülayim müxalif” termininə fərqli yanaşdığını deyib: "İntiharçını bir tankın içinə yerləşdirirlər, yanına da 200 kiloqram paylayıcı qoyurlar və qapağı möhkəm bağlayırlar ki bayıra çıxamasın… Bunlara necə mülayim müxalif demək olar? Bu insanların arxasında dayanıb onların işıqlı bir gələcək üçün döyüşdüyünü söyləyən insanları başa düşmürəm".
Rusiyanın "mülayim müxaliflərin” hansı bölgələrdə olması ilə bağlı Qərb partnyorlarına dəfələrlə müraciət etdiyini də deyən Şoyqu daha sonra bildirib: "Mülayim müxaliflər haradadır? Təyyarələrimiz haraları vurmamalıdır? Soruşduqda bizə cavab verə bilmədilər. O zaman biz də hara hücum edə biləcəyimizi, İŞİD-i, Əl-Nusra və onları dəstəkləyənlərin harada olduğunu soruşduq. Yenə cavab yoxdur”.
"Rusiyanın atdığı addımlar NATO-nun Suriyaya qanadlı raket zərbələrinin qarşısını almağa imkan verib”. APA-nın məlumatına görə, bunu da "Rossiya 24” telekanalının efirində Rusiya müdafiə naziri Sergey Şoyqu deyib.
"Suriya ilə bağlı durum dəyişirdi. Siz özünüzə sual versəniz ki, prezidentimiz kimyəvi silahın təhvil verilməsi ilə bağlı ideyanı reallaşdıra bilməsəydi, nə baş verəcəkdi? Orada 624 qanadlı raket hazır vəziyyətdə idi”, - deyə nazir vurğulayıb.
Şoyqu qeyd edib ki, bu cür miqyaslı zərbə endirilsəydi, Suriyada dövlət strukturunu bərpa etmək çox çətin olacaqdı.