Avqustun 7-də İstanbulun «Yenikapı» meydanında izdihamlı mitinq keçirilib. «Demokratiya və şəhidlər mitinqi» şüarı ilə keçirilən aksiyada iyulun 15-də dövlət çevrilişinə cəhd zamanı həlak olanların xatirəsi anılıb, ruhlarına dualar edilib.
Mitinqdə prezident Rəcəb Tayyib Ərdoğan, baş nazir Binəli Yıldırım, Türkiyə Böyük Millət Məclisinin (TBMM) sədri İsmayıl Qəhrəman, Türkiyə Silahlı Qüvvələrinin Baş Qərargah rəisi Hulusi Akar, Milliyyətçi Hərəkat Partiyasının (MHP) sədri Dövlət Baxçalı, Cumhuriyyət Xalq Partiyasının (CHP) sədri Kamal Kılıçdaroğlu çıxış ediblər. Bütün çıxışlarda dövlət çevrilişi cəhdi pislənib. Türk xalqının bu xain əməlin qarşısını aldığı qeyd olunub.
Bu mitinq Türkiyədə siyasi partiyaların birgə iştirak etdiyi ən böyük həmrəylik mitinqi kimi xarakterizə olunur. Mitinqə 5 milyona yaxın insan qatılıb.
İstanbulla yanaşı, Türkiyənin 80 vilayətində də demokratiyaya və dövlətə dəstək mitinqləri keçirilib.
Qeyd edək ki, meydanda çoxlu sayda Azərbaycan bayrağı da dalğalanıb.
Bu cür milli həmrəylik nümayişi ilə Türkiyə beynəlxalq güclərə hansı mesajı vermiş oldu?
Azərbaycan Sosialist Partiyasının sədri Elşən Həsənovun sözlərinə görə, belə bir həmrəylik mitinqi indiki zaman üçün Türkiyəyə lazım idi: «70 milyonluq ölkədə 5 milyonluq mitinq təşkil etmək o ölkənin hakimiyyəti üçün çətin deyil və onlar bunu etməklə dünyaya xalqın AKP-ni dəstəklədiyini nümayiş etdirmək istəyiblər. Məncə, normal bir yanaşmadır. Xarici güclərin devirmək istədiyi hökumətin bunu etməsindən normal bir şey ola bilməz. Çox təəssüflər olsun ki, bu məsələyə bizim ölkədə də fərqli yanaşma ortaya qoyulur. Bir prosesə tənqidi yanaşmaq olar, ancaq təhqirə qətiyyən yol verilməməlidir. Bu doğrudan da Türkiyənin onu sevməyən güclərə bir mesajı oldu. Bununla qarşı tərəf anladı ki, Türkiyə lazım olanda bir yumruq kimi birləşməyi bacarır.
Odur ki, bu aksiyanı Hitlerin 1939-cu ildə keçirdiyi faşist mitinqinə oxşatmaq Türkiyədəki hakimiyyəti devirmək istəyənlərin fətvasıdır və azərbaycanlılar çalışmalıdır ki, belə proseslərdə rol almasın.
Ərdoğanı sevməmək, onun siyasətini dəstəkləməmək olar. Yəqin ki, Türkiyənin özündə də onun tənqidçilərinin sayı az deyil.
Amma zərərli müqayisə olduqca yersizdir.
Hesab edirəm ki, bu mitinqin hazırkı anda keçirilməsi Türkiyə üçün olduqca vacib idi».
Məhəmmədəli QƏRİBLİ