"Regiona bu yaxınlarda səfər etməklə bağlı xüsusi planımız yoxdur, lakin prezidentlərin növbəti görüşünün təşkil edilməsi üçün tərəflərlə müntəzəm təmasları davam etdiririk". Bunu ATƏT-in Minsk Qrupunun amerikalı həmsədri Ceyms Uorlik APA-nın həmsədrlərin regiona mümkün səfəri ilə bağlı sorğusuna cavabında deyib.
C.Uorlik ABŞ Nümayəndələr Palatasının üzvü Cim Kostanın avqust ayındakı rəsmi təmaslar barədə son açıqlamasına da münasibət bildirib: "Konqresmen Kostanın Dağlıq Qarabağ münaqişəsinin sülh yolu ilə həlli yollarının tapılmasında bizimlə birgə işləmək marağını qiymətləndiririk. Vyana və Sankt-Peterburq görüşləri təmas xəttində zorakılığın azaldılması, substantiv danışıqların yenilənməsi və toqquşma risqinin azaldılması üçün təkliflərin irəli sürülməsi baxımından uğurlu olub. Sülh prosesindəki bu müsbət məqam prezidentlərin növbəti görüşünün təşkilinin davam etdirilməsi üçün vacibdir. Həmsədrlər prezidentlər arasında dialoqun davam etdirilməsinə sadiqdir və onların tezliklə bir araya gətirilməsi imkanlarının yollarını öyrənirlər".
Xatırladaq ki, bir neçə gün əvvəl ABŞ Konqesinin Nümayəndələr Palatasının üzvü Cim Kosta "news.am" saytına müsahibəsində avqust ayında Azərbaycan və Ermənistan xarici işlər nazirləri Elmar Məmmədyarov və Edvard Nalbandyanın həmsədr ölkələrin xarici işlər nazirləri ilə görüşünün olacağını bildirmişdi.
Ceyms Uorlik həmsədrlərin Ankaraya səfərinin nə zaman reallaşacağı ilə bağlı isə deyib ki, konkret dəvət gözləyirlər: "Həmsədrlər istənilən vaxt yüksək vəzifəli Türkiyə rəsmiləri ilə görüşmək üçün Ankaraya səfər etməyə hazırdırlar və biz konkret tarix üçün dəvət gözləyirik". "Dağlıq Qarabağ sülh prosesi ilə bağlı məsləhətləşmələr aparılması üçün Minsk qrupuna üzv hər ölkənin paytaxtına səfər etmişik. Türkiyə rəsmiləri ilə fikir mübadiləsi imkanını və onların həmsədrlərin danışıqların irəliyə doğru aparılması, habelə zorakılıq riskinin azaldılması ilə bağlı səylərinə dəstəyini qiymətləndiririk" - deyə, C.Uorlik qeyd edib.