Ceyhun Məmmədov: “Bütün türk dövlətlərinin birgə hərbi təlimlərinin keçirilməsi mümkündür”
Azərbaycan, Türkiyə və Özbəkistan hərbi qulluqçularının iştirakı ilə ölkəmizdə “Birliyin Gücü – 2026” birgə hərbi təlimi başlayıb. Üç ölkənin hərbi qulluqçuları əməkdaşlıq təcrübələrini tətbiq edir, təcrübə mübadiləsi aparır və hərbi texnika, aviasiya və dronlardan istifadə edərək birgə təlimlər keçirir.
Birinci mərhələ Qarabağ iqtisadi bölgəsindəki Qızılqaya təlim mərkəzində keçirilir. Manevrlərdə üç ölkənin müdafiə nazirliklərinin, hərbi texnikanın, aviasiyanın, dəniz qüvvələrinin və dronların bölmələri iştirak edir.
Təlimin əsas məqsədi hərbi qulluqçuların birgə əməliyyatlara hazırlığını artırmaq və bölmələrarası əməkdaşlığı təkmilləşdirməkdir. Xüsusilə əlaqələndirilmiş hərəkətlərə, təcrübə mübadiləsinə və şəxsi heyətin təliminə vahid yanaşmalara diqqət yetirilir.
İştirakçılar həmçinin müasir təlim metodları və birgə əməliyyatların təşkili ilə bağlı praktik təcrübə qazanmaq imkanı əldə edəcəklər.
"Birliyin Gücü 2026" üç mərhələdə baş tutur. Hərbi qulluqçular Qarabağ İqtisadi Bölgəsindəki- Xocavənd rayonunda yerləşən “Qızılqaya” Təlim Mərkəzində, Naxçıvan Muxtar Respublikasındakı “Qarabağlar” Təlim Mərkəzində və Xəzər dənizinin Azərbaycan sektorundakı Böyük Zirə təlim poliqonlarında təlim keçəcəklər.
Təlim sentyabrın 21-dən oktyabrın 1-dək davam edir.
Birgə təlimin məqsədi hərbi qulluqçuların birgə əməliyyatlara hazırlıq səviyyəsini artırmaq, qoşunların koordinasiyasını, idarəetmə bacarıqlarını və qarşılıqlı uzlaşmanın effektivliyini təkmilləşdirməkdir.
Prezident İlham Əliyev türk dövlətləri arasında hərbi əməkdaşlığın genişləndirilməsini və birgə təlimlərin keçirilməsini milli təhlükəsizliyin və Türk Dövlətləri Təşkilatının potensialının artırılması üçün vacib strateji addım hesab edir.
Prezident İlham Əliyev qeyd edib ki, birgə hərbi təlimlər həm güc və həmrəylik rəmzidir, həm də orduların döyüş qabiliyyətinin artırılması üçün praktiki zərurətdir. Bu əməkdaşlıq hər hansı üçüncü tərəfə qarşı yönəlməyib, əksinə, bölgədə sabitliyin və təhlükəsizliyin qorunmasına xidmət edir. Türk dövlətləri arasında hərbi sahədə əməkdaşlıq və birgə təlimlər (məsələn, Azərbaycan, Türkiyə və Özbəkistanın iştirakı ilə keçirilən “Birliyin Gücü” təlimləri) bu strateji xəttin real həyatda təzahürüdür.
Bütün türk dövlətlərinin birgə hərbi təlimlərinin keçirilməsi mümkündürmü, mümkün deyilsə, niyə mümkün deyil?
Millət vəkili Ceyhun Məmmədov baki-xeber.com-a bildirdi ki, türk dövlətlərinin birgə hərbi təlimlərinin keçirilməsi olduqca vacib və mühüm məsələdir. “Bütün türk dövlətlərinin birgə hərbi təlimlərinin keçirilməsi mümkündür. Bu gün Azərbaycan, Özbəkistan, Türkiyə önəmli bir addım atır. Hesab edirəm ki, bu addımın çox böyük siyasi əhəmiyyəti var. Bu hərbi təlimlər yalnız Azərbaycan, Özbəkistan və Türkiyə arasında keçirilməli deyil. Bu gün dünyamız çox ciddi təhlükələrlə üz-üzədir, dünyamızda çox ağır və mürəkkəb proseslər getməkdədir. O mənada bu gün bizim üzərimizə düşən əsas vəzifə və missiyalardan biri də həmrəyliyimizi gücləndirməkdir. Tarix boyu ən böyük arzu bu olub. Çox sevindiricidir ki, bu gün bu proseslərin cənab Prezident gedir, o bir çox sahələrdə olduğu kimi bu sahəyə də öz töhfəsini verir”.
C.Məmmədovun fikrincə, Prezident İlham Əliyevin davamlı olaraq Türkiyəyə, Orta Asiyaya səfərləri, əlaqələrin, münasibətlərin gücləndirilməsi bir daha onu göstərir ki, ortada ciddi iradə var və tərəflər öz əlaqələrini daha da gücləndirirlər.
“Hesab edirəm ki, bu təlimlər bizim potensialımızı, imkanlarımızı daha da gücləndirəcək və dövlətlərin qarşısında duran vəzifələrə öz töhfəsini verəcək.
Biz çalışmalıyıq ki, bu ağır, mürəkkəb dövrdə ordumuzu, dövlətimizi, dövlətçiliyimizi gücləndirək”-deyə millət vəkili qeyd etdi.
İradə SARIYEVA
