Turan Rzayev: “Özəlin yeni partiya yaratması ən çox hakimyyətdə olan partiyanın işinə yarayır”
Türkiyənin Apellyasiya Məhkəməsinin Cümhuriyyət Xalq Partiyası (CHP) ilə bağlı aldığı “mütləq etibarsızlıq” (mutlak butlan) qərarından sonra ölkənin ana müxalifət partiyasında rəhbərlik məsələsi ilə bağlı mübahisələr yaranıb. Bunun fonunda ölkədə ana müxalifət partiyası ikiyə bölünüb və yeni siyasi partiyanın yaradılması prosesi gündəmə gəlib.
CHP-nin sabiq sədri Özgür Özel bu gün 91 millət vəkili ilə birlikdə rəsmi şəkildə CHP-dən istefa edib. Bununla da CHP-nin Türkiyə Böyük Millət Məclisindəki mandat sayı 44-ə enib. Özgür Özel yeni partiyasının yaradılması ilə bağlı təsis sənədini də imzalayıb. CHP-dən ayrılan 91 deputatın imzası ilə partiyanın qeydiyyatı üçün müraciət Türkiyənin Daxili İşlər Nazirliyinə təqdim olunacaq.
Baş verən proseslər fonunda ümumiyyətlə, Türkiyənin sabahı necə görünür? Bütün bunlar ölkədəki siyasi proseslərə necə təsir edəcək?
Sözügedən məsələni baki-xeber.com-a şərh edən politoloq Turan Rzayevin fikrincə, Özəlin yeni partiya yaratması ən çox hakimyyətin işinə yarayır: “CHP keçmiş sədri Özgür Özəl partiyanın qrup iclasında CHP ilə vidalaşdığını və yeni siyasi partiya yaradacağını açıqlayıb. Özəl yeni siyasi təşkilatın “Yeni Partiya” adı ilə fəaliyyət göstərəcəyini bildirib. Əvvəla onu deyim ki, CHP tarixində daxili fikir ayrılıqları, siyasi xətt mübarizələri və partiyadan ayrılmalar dəfələrlə yaşanıb. Partiya uzun müddət Türkiyənin əsas siyasi aktoru kimi çıxış etsə də, cəmiyyətin dəyişən tələbləri, ideoloji istiqamətlər və liderlik məsələləri zaman-zaman CHP daxilində ciddi müzakirələr yaradıb. CHP-də parçalanmalar və ayrılmalar yeni hadisə deyil. Lakin Özgür Özəlin yeni siyasi partiya yaratması mənə görə bir qədər fərqli situasiyadır. Əvvələr də CHP daxilindəki böhran baş verib. Özgür Özəlin yeni partiya yaratması ən çox hakim Ədalət və İnkişaf Partiyasının (AKP) işinə yarayır. Uzun illərdir alternativi olmadığını deyən partiya bu parçalanmanı seçki kampaniyalarında sözün əsl mənasında istifadə edəcək. Hətta istisna deyil ki, CHP sədri Kamal Kılıçdaroğlunun tələsik şəkildə partiya rəhbərliyinə gətirilməsi Prezident Rəcəb Tayyib Ərdoğanın beyin məhsuludur. Ərdoğan çox ağıllı, daxili siyasəti bilən təcrübəli siyasətçidir. Vaxtilə bu proseslərdən özü də keçib. Yəni oyunun qaydasını yaxşı bilir. Kamal Kılıçdaroğlunun potensialı və edə biləcəkləri hər kəsə bəllidir. Özgür Özəl isə yeni qan, yeni nəfəsdir. Amma bu nəfəsi kəsmənin yolu elə parçalanmadır. Özəl üçün qarşıdakı proses çətin olacaq. Çünki Özel və komandası yeni partiyanın Türkiyənin əsas müxalifət qüvvəsinə çevrilməsini hədəfləyir”.
Vidadi ORDAHALLI
