Zaur İbrahimli: “Görünür, keçmiş ermənipərəst senatoru Robert Menendezi 11 il müddətinə azadlıqdan məhrum edilməsi ibrətlik olmayıb”
Amerikadakı ermənipərəst qüvvələr Azərbaycana qarşı qərəzli münasibətlərini davam etdirirlər. ABŞ Nümayəndələr Palatasının Xarici İşlər Komitəsində anti-Azərbaycan mövqeyi sərgilənib.
Konqresin Erməni Məsələləri üzrə Qrupunun həmsədri, konqresmen Bred Şerman (Demokrat-Kaliforniya) tərəfindən maliyyələşdirilən və Komitə sədri Brayan Mast (Respublikaçı-Florida) tərəfindən dəstəklənən “təşəbbüs” irəli sürülüb. Bəzi ermənipərəst konqresmenlər tərəfindən Azərbaycanı əli azərbaycanlıların qanına batan, xalqımıza, dövlətimizə qarşı müharibə cinayətləri törətdiklərinə görə hazırda Bakıda həbsdə olan separatçıları azadlığa buraxmağa çağıran qətnamə qəbul olunub.
Amerika Konqresinin Vaşinqtonda ermənilərlə bağlı qəbul etdiyi qərəzli qətnaməni dəstəkləyənlərdən biri Florida ştatından olan Respublikaçı Brayan Mastdır.
Təəssüflər olsun ki, Azərbaycana qarşı qəbul olunan bu qətnaməyə Trampçıların dəstəyi olub. Bu Brayan Mastdır.
Politoloq Zaur İbrahimli baki-xeber.com-a bildirdi ki, bu qətnamə beynəlxalq hüququn əsas prinsiplərinə, o cümlədən dövlət suverenliyi, ərazi bütövlüyü və cinayət təqibi sahəsində daxili yurisdiksiya toxunulmazlığı prinsiplərinə əsaslı ziddiyyət təşkil edir. “Saxlanılan bütün şəxslərin "hərbi əsir" kimi təsnif edilməsi kökündən yanlışdır. 1949-cu il Cenevrə Konvensiyalarına və III Cenevrə Konvensiyasına əsasən, hərbi əsir statusu yalnız döyüş əməliyyatları zamanı əsir düşən döyüşçülərə şamil edilir. Hazırda Azərbaycanda saxlanılan şəxslər, o cümlədən Arayik Arutyunyan, Bako Sahakyan, Arkadi Qukasyan, Ruben Vardanyan, David Babayan, Levon Mnatsakanyan və David Manukyan müharibə başa çatdıqdan sonra, üçtərəfli bəyanatın (9 noyabr 2020-ci il) imzalanmasından sonra Azərbaycanın suveren ərazilərinə qanunsuz daxil olmuş şəxslərdir. Beynəlxalq humanitar hüquqa görə, onlar nə hərbi əsir, nə də mülki girov statusuna malikdirlər. Həmçinin, saxlanılan şəxslərin bir qismi terror-sabotaj fəaliyyətində, döyüş əməliyyatları zamanı mülki şəxslərin hədəfə alınmasında, habelə Azərbaycan hərbçilərinin ölümünə səbəb olan əməllərdə iştirak etmişlər. Məhz bu səbəbdən onlar cinayət məsuliyyətinə cəlb edilmiş və məhkəmə qərarları ilə müxtəlif həbs müddətlərinə məhkum edilmişlər”.
Z.İbrahimli qeyd etdi ki, hər bir dövlət öz ərazisində cinayət törətmiş şəxslərə qarşı istintaq aparmaq, təqib etmək və mühakimə etmək hüququna malikdir. “Azərbaycanın bu şəxslər üzərində məhkəmə yurisdiksiyası beynəlxalq səviyyədə tanınır, çünki cinayətlər Azərbaycanın suveren ərazisində, Dağlıq Qarabağ regionunda törədilmişdir. Məhkəmənin qüvvəyə minmiş hökmlərinin "simvolik" adlandırılması məhkəmə hakimiyyətinə hörmətsizlik və ABŞ Konqresinin başqa bir dövlətin daxili işlərinə qarışması faktıdır. ABŞ Nümayəndələr Palatasının üzvü Bred Şermanın "Human Rights Watch sənədləşdirilmiş edamlar" iddiası isə Azərbaycanın rəsmi orqanları tərəfindən dəfələrlə təkzib edilmiş və heç bir beynəlxalq məhkəmə instansiyasında sübuta yetirilməmişdir. Siyasi məhbus statusu yalnız sırf siyasi fəaliyyətinə görə təqib edilən şəxslərə şamil edilir. Saxlanılan şəxslər isə terror fəaliyyəti, qeyri-qanuni silahlı birləşmələrdə iştirak, dövlət sərhədinin pozulması, mülki əhaliyə qarşı cinayətlər və digər ağır cinayət əməllərində təqsirli bilinmişlər. Təşəbbüsün müəllifləri Azərbaycanı tənqid edərkən Ermənistanın hərbi cinayətləri, 1990-cı illərdə 700.000-dən çox azərbaycanlının etnik təmizləmə yolu ilə işğal olunmuş ərazilərdən qovulması, Xocalı soyqırımı, Azərbaycanın tarixi-mədəni irsinin, məscidlərin, qəbiristanlıqların və abidələrin, işğal dövründə məhv edilməsi barədə bəhs etməyiblər. Bu, açıq-aşkar seçici yanaşma və ikiüzlü standartdır. Bu təşəbbüs, həmçinin ABŞ-Azərbaycan münasibətlərinin inkişafı səylərinə kölgə salmağa hesablanıb. Bu təşəbbüsün arxasında duran əsas qüvvə erməni lobbisinin maliyyə və seçki təzyiqidir, hüquqi əsaslandırma isə sıfırdır. Kaliforniya ABŞ-da ən böyük erməni icmasına ev sahibliyi edir, təxminən 500.000–700.000 erməni əsilli ABŞ vətəndaşı Kaliforniyada yaşayır. Bu ştatın əhalisinin təxminən 1.5%-i deməkdir. Erməni icması Kaliforniyanın seçki dairələrində həlledici seçici qrupu təşkil edir, ABŞ Konqresindəki erməni əsilli nümayəndələr və onların dəstəkçiləri hər seçki dövründə erməni diasporundan milyonlarla dollar ianə alırlar. Açıq mənbələrin məlumatına görə, Bred Şerman 2020-2025-ci illərdə erməni mənşəli donorlardan təxminən 2.3 milyon dollar toplayıb. Məhz buna görə, ümumilikdə Tramp administrasiyasının Azərbaycanla strateji tərəfdaşlıq kursu yürütməsinə, dövlət başçısının konstruktiv mövqeyinə baxmayaraq, Respublikaçı konqresmenlər bu cür təşəbbüslər edirlər. Görünür, keçmiş ermənipərəst senatoru Robert Menendezi 11 il müddətinə azadlıqdan məhrum edilməsi ibrətlik olmayıb”-deyə Z.İbrahimli bildirdi.
İradə SARIYEVA
