Ermənistan parlamentinin doqquzuncu çağırışının ilk sessiyası ilə bağlı maraqlı vəziyyət yaranıb. Bu dəfə sessiyanın patriarxal xeyir-dua ilə açılacağı gözlənilmir. Katolikosa da dəvətnamə göndərilməyib. Erməni Apostol Kilsəsi bildirib ki, dəvətnamə almayıblar.
İndiyə kimi Ermənistan parlamentinin ilk iclasları Erməni Apostol Kilsəsinin Patriarxının xeyir-duası ilə açılıb. Bu, 44 günlük müharibədən sonra da, Erməni Apostol Kilsəsi Paşinyanı hakimiyyətdən getməyə çağıranda da davam etdi. 2021-ci il növbədənkənar seçkiləri ilə formalaşan parlamentin iclası bütün ermənilərin katolikosunun duası ilə başlayıb. Bütün ermənilərin katolikosunun iştirakı “Parlamentin Reqlamenti haqqında” Qanunda qeyd olunub. Respublika prezidenti və katolikos birinci sessiyanın açılışında salamlama nitqi söyləmək hüququna malikdirlər. Bundan sonra deputatlar and içirlər. Doqquzuncu çağırış parlamentin sessiyası 2 avqustda başlayır. Katolikosa dəvətnamə göndərəcəklərmi? Parlament aparatının rəhbəri bu suala cavab verməyib. Məsələ burasındadır ki, Paşinyanın indiki katolikosu devirmək məqsədi də onun rəhbərlik etdiyi partiya proqramında öz əksini tapıb. Seçki proqramında o, 2031-ci ilə qədər II Qaregini devirəcəyinə söz verir. Paşinyanın Erməni Apostol Kilsəsinə qarşı kampaniyası, xüsusən də son bir ildə zirvə nöqtəsinə çatıb. II Qaregini dəstəkləyən katolikos və yepiskoplara qarşı cinayət işləri açılıb. Bir qrup yüksək vəzifəli ruhani müxtəlif ittihamlarla aylarla həbsdə olub. Bir neçə çağırışda parlament üzvü olmuş "Hayastan" fraksiyasının üzvü Lilit Qalstyan kilsə liderinin yeni seçilmiş parlamentin ilk iclasında və ya prezidentin andiçmə mərasimində iştirak etmədiyini xatırlamır. O iddia edir ki, Paşinyan bu addımla erməni xalqını bölmək gündəliyini davam etdirir: “Bu hakimiyyətlərin gündəliyindən biri daxili bölünmədir - bütün mümkün birlik sahələrini məhv etmək. Bu, ən azı son üç ildə şahidi olduğumuz hədəflənmiş düşmən əl yazısıdır”. Millət vəkili güman edir ki, Paşinyanın Erməni Apostol Kilsəsinə qarşı atdığı addımlar fonunda katolikosa dəvət göndərməyəcək. Bütün bunlara baxmayaraq, müxalifətçilər Müqəddəs Eçmiədzində patriarxal xeyir-dua alacaqlar.
Samirə SƏFƏROVA
